Le Auala E te Malamalama ai i le Tusi Paia

1. Talosaga Atu i Lē e Ana le Tusi mo se Fesoasoani

Na faapea mai le faamatalaga a Ninfa e nofo i Italia, “Sa iai se taimi na ou faitauina ai le Tusi Paia ae ou te leʻi moe. Sa ou faia faapea ona na ou manatu o le Afioga lea a le Atua, ma e ui lava ou te leʻi fiafia tele e faitau, ae sa ou fia iloa po ā mea o loo tusia ai. Sa ou filifili loa e faitau uma. I le amataga sa faigofie, ae ina ua oo atu i vaega e faigatā, ona tuu loa lea o laʻu faitau.”

PE NA oo iā te oe le tulaga na feagai ma Ninfa? E toʻatele e faapena. Peitaʻi e pei ona tatou iloa mai i le mataupu muamua, e finagalo Lē e Ana le Tusi Paia o Ieova le Atua, ia e malamalama i lana Afioga. E faapefea la ona e malamalama i ai? O le auala muamua, o le talosaga atu lea i Lē e Ana le tusi mo se fesoasoani.

Sa manatu i aposetolo o Iesu o ni tagata ‘e leʻi aʻoaʻoina ma faatauvaa,’ auā e leʻi auai i latou i aʻoga faafaifeʻau a lotu. (Galuega 4:13) Ae peitaʻi, na faamautinoa atu e Iesu iā i latou e mafai lava ona latou malamalama i le Afioga a le Atua. E faapefea? Na faamatala atu e Iesu: “O le fesoasoani, o le agaga paia lea e auina mai e le Tamā i loʻu igoa, e aʻoaʻo iā te outou i mea uma.” (Ioane 14:26) Na faaaogā e le Atua le agaga paia po o le mana  e fai ai le lalolagi ma meaola uma o loo iai. (Kenese 1:2) Na ia faaaogā foʻi le agaga paia e faagaee ai pe tusa ma le toʻa 40 tusitala, e tusia ona manatu i le Tusi Paia. (2 Peteru 1:20, 21) O loo mafai foʻi ona fesoasoani lenā agaga iā i latou o loo saʻili e fia malamalama i le Tusi Paia.

E faapefea ona e maua le agaga paia o le Atua? E tatau ona e talosaga atu i ai i le faatuatua. O le mea moni, e manaʻomia ona e talosaga atu pea i ai. Na fetalai Iesu: “Ia talosaga atu pea, ona foaʻiina mai lea iā te outou . . . afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē ōle atu iā te ia!” (Luka 11:9, 13) E foaʻi atu e Ieova le agaga paia iā i latou e talosaga moni atu i ai. E fesoasoani lenā mana iā te oe, e malamalama ai i uiga o upu faagaeeina ua tusia i le Tusi Paia i le faitau afe o tausaga ua mavae. E mafai foʻi ona avatu e le agaga o le Atua iā te oe le atamai e manaʻomia, e faatatauina ai i lou olaga le feʻau malosi o loo i le Tusi Paia.—Eperu 4:12; Iakopo 1:5, 6.

O taimi uma lava e te faitau ai i le Tusi Paia, ia tatalo i le Atua, talosaga atu iā te ia mo le agaga paia e fesoasoani iā te oe ia malamalama i lana Afioga.