E Mafai e le Tusi Paia Ona Suia Olaga

Aiseā ua faaaogā ai e se fafine sa lē fiafia i lotu, le tele o lona taimi e aʻoaʻo ai isi e faatatau i le Atua? O le ā na uunaʻia ai se tamāloa sa fiafia i taaloga sauā, ina ia avea ma sē e tausia le filemu? Na mafai faapefea i se tamāloa sa aafia i le faaaogāina o fualaau faasāina, le inu ava malosi ma le faamisa i nofoaga faitele, ona suia lona olaga? Seʻi o tatou faitau i a latou faamatalaga.

FAAMATALAGA O LONA OLAGA

IGOA: PENELOPE TOPLICESCU

TAUSAGA: 40

ATUNUU: AUSETALIA

TALAAGA: SA LĒ FIAFIA I LOTU

O LOʻU OLAGA SA IAI: Sa ou fanau i Sini, i Ausetalia, ae ina ua faatoʻā lua oʻu tausaga, sa siitia atu lo matou aiga i Papua Niu Kini. E lata i le lua tausaga o matou nonofo i Rabaul, ona matou nonofo lea i Bougainville mo le valu tausaga. I aso na, e leai ni TV i Papua Niu Kini, o lea, a o ma feola aʻe ma loʻu tuagane, o le tele o taimi e ma te ō ai e ʻauʻau ma tofutofu i le sami, ma tafafao ma momoe i le paka.

O le sefulu o oʻu tausaga sa amata ai ona ou fiafia i le lotu. E Katoliko loʻu tinā, ma na fai mai ou te alu i aʻoga Tusi Paia e faia e se taupousa i le nuu. Sa ou taliaina le lotu Katoliko ma papatiso i le sefulu o oʻu tausaga.

Peitaʻi, ina ua matou toe foʻi i Ausetalia ma a o oʻu talavou, sa amata ona ou fesiligia oʻu talitonuga faalotu. I taimi a o oʻu iai i aʻoga maualuluga, sa ou suʻesuʻe i talafaasolopito anamua, ma sa uumi a ma talanoaga ma loʻu tamā e faatatau i le tupuaga o lotu, ma tala i le Tusi Paia sa ma manatu i ai o uputuu. Mulimuli ane, na ou tetee i le lotu Katoliko.

O le 16 o oʻu tausaga na teteʻa ai oʻu mātua. Sa faigatā tele lea tulaga i loʻu tinā, ma na mulimuli ane oʻu alu ma nonofo faatasi ma loʻu tamā ma lana teine. Na nonofo loʻu tuagane ma loʻu tinā, ma sa siitia atu i se isi setete. Na ou misia ai lava loʻu aiga. E lua tausaga faatoʻā toe lelei le ma va ma loʻu tinā. Na amata ona ou inu, faaaogā fualaau faasāina, ma alu i patī. Na ou lē toe aʻoga ae amata ona faigaluega, ma mai le 20 o oʻu tausaga, sa faamaʻimau loʻu olaga ona o le ola lē mamā.

O le 25 o oʻu tausaga na ou toe mafaufau ai  e uiga i le Tusi Paia. Na fou laʻu galuega, ma na ma feiloaʻi ai ma Liene, o se teine e ese le lelei ma e faaaloalo i lana pule i taimi uma, e ui e lē mafaufau uiga o le pule iā te ia. Ina ua ou fesili iā Liene pe aiseā e lē toe tali atu ai i le pule, na ia fai mai o loo latou suʻesuʻeina le Tusi Paia ma Molimau a Ieova, ma o loo taumafai e faatatau taʻiala o le Tusi Paia i lona olaga. Sa fai mai Liene e ma te suʻesuʻe i le Tusi Paia. Ona o loʻu lē malamalama, na ou faapea ai e mafai ona ou aʻoaʻoina mea uma e na te iloa mai le Tusi Paia i se lesona e tasi, mo na o le tasi le itula. I lenā pō, e tolu itula na faaalu e Liene e tali ai aʻu fesili e faatatau i le Tusi Paia. Sa ou ofo ona o tali uma na ia aumaia, e faavae mai i le Tusi Paia.

Ou te manatua loʻu foʻi i le fale i lea pō ina ua uma le ma talanoaga ma Liene, ma sa ou ita tele i le Atua ona o le tuai ona faailoa mai iā te aʻu o le upu moni. Na ou iloa o Molimau e ola i se olaga mamā, ma sa ou manatu ua fai si tuai ona toe sui aʻu masaniga. Sa ou manatu foʻi, e lē taitai mafai ona ou alu e talaʻi mai lea fale i lea fale e pei ona faia e Molimau. Sa faaauau ona matou suʻesuʻe ma Molimau, ae sa ou fia suʻeina se faalētonu i o latou talitonuga, ina ia maua ai se faamolemolega e tuu ai laʻu suʻesuʻega. Ae i se tasi aso, na ou iloa ai, e lē mafai ona ou maua se mea e faalētonu ai aʻoaʻoga a Molimau a Ieova.

LE AUALA NA SUIA AI E LE TUSI PAIA LOʻU OLAGA: O le tele o loʻu iloa o tapulaa o le Tusi Paia, o le atili ōia ai foʻi lea o loʻu lotofuatiaifo. Sa ou taumafai e faalelei loʻu lotofuatiaifo, ma na ou lē toe faaaogāina ai fualaau faasāina. Ae ina ua ou alu i atunuu mamao, na toe amata foʻi ona ou patī ma inu tele. E foliga mai o taimi uma lava ou te taumafai ai e ola e tusa ma mataupu silisili o le Tusi Paia, ou te toe foʻi lava i oʻu ala tuai. Ona o loʻu mā, ou te tatalo ai iā Ieova, ae e leaga lava oʻu faalogona.

Ina ua ou iloa le tala e uiga i le tupu o Tavita ma Patisepa, ma le auala na feutagaʻi ai Ieova ma i laʻua i le alofa mutimutivale, na fesoasoani lenā tulaga iā te aʻu. Sa lototele Tavita e taʻutino lana agasala ina ua aʻoaʻia o ia, e aunoa ma le taumafai e fai se faamolemolega mo ana gaoioiga. Sa ia talia ma le lotomaulalo le aʻoaʻiga na tuuina atu. (2 Samuelu 12:1-13) O taimi uma ou te lē taulau ai, ou te toe mafaufau i lenā tala ma faigofie ai ona faailoa atu iā Ieova loʻu salamō. Ona ou filifili loa lea, a oo mai faaosoosoga, ia ou tatalo muamua ina ia mafai ai ona ou teena, nai lo le tatalo mulimuli a ua uma ona lolo e fai, ma na aogā tele lea faiga iā te aʻu.

LE AOGĀ IĀ TE AʻU: O laʻu masani o le ita leaga. Peitaʻi, na aogā iā te aʻu le manatu o loo i le Efeso 4:29-31, ina ia taumafai ai e tuu le “ita umi, ma le itaitagofie, ma le lotoa.” A o faasolo ina ou iloa pulea loʻu ita, na faapena foʻi ona pulea ai ma aʻu tala e fai. E lē gata i lea, na aogā iā te aʻu le fautuaga a Iesu e faapea, “ia avea la outou upu o le Ioe, ia Ioe,” ina ia mafai ai ona ou iloa tonu le mea e ao ona fai.—Mataio 5:37.

I le taimi muamua, sa tetee loʻu tinā i loʻu auai i Molimau a Ieova, ae na mulimuli ane fai mai, ua fiafia lava i laʻu taumafaiga. Na ia faapea mai foʻi, “Ou te iloa ua māfua ona suia ou uiga ona o mea ua e aʻoaʻoina e uiga iā Ieova, ae e lē ona o mea na aʻoaʻoina ai oe a o e tuputupu aʻe.” Sa ou fiafia lava i lana tala.

Ua ou iloa ua iai nei se fuafuaga o loʻu olaga ma ua aogā. Ua iva nei tausaga talu ona ma galulue ma laʻu tane o ni faiaʻoga faataimi atoa o le Tusi Paia. Ioe, o lea ou te auai i le talaʻiga mai i lea fale i lea fale, ma ua ou iloa o le galuega pito i sili lenei ona tauia ua ou faia.

 FAAMATALAGA O LONA OLAGA

IGOA: DENIS BUSIGIN

TAUSAGA: 30

ATUNUU: RUSIA

TALAAGA: E FIAFIA I LE KARATE

O LOʻU OLAGA SA IAI: Sa ou fanau i le aai o Perm’ ma ola aʻe i Furmanov, o se aai i le vaipanoa o Ivanovo, i Rusia, ma e tusa ma le 40,000 tagata e nonofo ai. O Furmanov o se aai e matagofie, e tele ona laau aulelei lea a oo i le tau e afu ai mea e lanu samasama ma lanu mūmū. I vaitausaga o le 1980 ma le 1990, sa faatuputeleina ai le solitulafono i le aai. Sa faatauvaa le tulaga o si o matou aiga ona sa itiiti le tupe maua. Sa matou nonofo ma oʻu mātua ma loʻu uso laʻitiiti i se fale e tasi le potu moe, o lona uiga la sa fai si pūmoomoo o le matou fale.

O le fitu o oʻu tausaga na amata ai ona aʻo laʻu karate. Sa ou fiafia tele i le taaloga, ma sa autū i ai loʻu olaga. O taimi uma ou te avanoa ai ou te alu i le fale toleni, ma o aʻu uō o ni tama e taaalo uma. O le 15 o oʻu tausaga na maua ai loʻu fusi mūmū i le karate, ae i le tausaga mulimuli ane ai na maua ai loʻu fusi enaena. O aʻu le isi tagata o le ʻau karate lea na tauvā i suʻega siamupini, ia na fai i Rusia ma Europa ma Asia. Na foliga mai o le a lelei loʻu lumanaʻi, peitaʻi na suia atoa loʻu olaga i le 17 o oʻu tausaga.

Sa matou solia ma nisi o aʻu uō le tulafono, ma na maua i matou. E lua tausaga na ou falepuipui ai. Sa faigatā le olaga i le falepuipui. Peitaʻi, a o oʻu iai i le falepuipui, o i inā faatoʻā ou vaai ai i se Tusi Paia. Sa ou faitauina le tusi o Kenese, Salamo, ma le Feagaiga Fou. Sa ou taulotoina foʻi le tatalo Lo Matou Tamā, ma ou faia i pō taʻitasi ae ou te leʻi moe, ma le manatu o le faia faapea atonu o le a aogā iā te aʻu.

Na ou magalo mai i le falepuipui i le 2000, peitaʻi na ou lē iloa po o le ā se fuafuaga ma se mea e fai i loʻu olaga. Sa amata ona ou tagofia fualaau faasāina. O le taimi tonu foʻi lea na oti ai si oʻu tinā. Sa sili ona pele o ia iā te aʻu, ma sa faigatā tele lea tulaga. Peitaʻi, sa ou lē toe tagofia fualaau faasāina ma amata ona toe alu i le fale toleni. Sa ou siitia foʻi i le aai o Ivanovo. Na maua i inā saʻu galuega i se faleoloa. O le tamaʻitaʻi e fesoasoani i le pule i lenā faleoloa, o se Molimau a Ieova. Sa ia faamatala mai iā te aʻu nisi o upu moni faavae mai i le Tusi Paia, ma faatulaga se isi Molimau e na te faia e lē aunoa laʻu suʻesuʻega i le Tusi Paia.

LE AUALA NA SUIA AI E LE TUSI PAIA LOʻU OLAGA: A o fai laʻu suʻesuʻega, na pāʻia loʻu loto ina ua ou iloa le fuafuaga a le Atua o le a avea le lalolagi ma parataiso, ma na ou manaʻo ia ou maua lea lumanaʻi. E leʻi umi ae ou iloaina, e finagalo Ieova ia ola tagata e tusa ai ma ana tapulaa maualuluga. O le tele o taimi o loʻu olaga sa ou mafaufau lava na o aʻu. Ae o lea ua ou iloa, e finagalo Ieova ia ou manatu i isi ma ia atiaʻe uiga e pei o le agalelei ma ia tausia le filemu, o uiga e leʻi iā te aʻu muamua.

A o faasolo ina ou mafaufau loloto i mea uma ua faia e Ieova mo aʻu, e pei o le foaʻi mai o lona Alo e fai ma taulaga mo aʻu agasala, na suia ai loʻu olaga ona o le talisapaia o le alofa o le Atua. O se faataʻitaʻiga, na ou aʻoaʻoina mai i le Salamo 11:5 e faapea, e ʻinoʻino Ieova i le sauā. O lea na ou lē toe matamata ai i ata o le TV e faaali mai ai uiga sauā ma le ita.  Sa faigatā tele iā te aʻu ona tuu aʻu taaloga e atagia mai ai uiga sauā. Na fesoasoani mai le taʻiala o loo i le 1 Korinito 15:33 ina ia ou iloa ai, e tele se aafiaga iā te aʻu o tagata e matou te aumea. Na faamaonia lea manatu ona na ou falepuipui ona o taaʻiga mai i aʻu uō. O lea na ou filifili ai e lē toe aumea ma tagata e fiafia i taaloga e atagia mai ai uiga sauā.

LE AOGĀ IĀ TE AʻU: O le auaufaatasi ma Molimau a Ieova ma le suʻesuʻeina o le Tusi Paia, ua fesoasoani iā te aʻu e avea ai ma sē e faamaoni. O se faataʻitaʻiga, na ou aʻoaʻoina mai i le Eperu 13:5, e manaʻomia ona lotomalie i mea ua maua ma aua le manaʻo tele i tupe. O le faatatauina o lenei fautuaga ua fesoasoani iā te aʻu e ʻalofia ai le pepelo ma le gaoi.

E tāua iā te aʻu le iai o ni uō. I taimi ua teʻa, na ou mātauina ai ua avea le matapeʻapeʻa po o le fefe ma itu e faaleagaina ai uō. E lē lelei atoatoa Molimau a Ieova, ae ou te iloa e latou te tausia tapulaa a le Atua, ma taumafai malosi e faatatau ana fautuaga i le auala e feutagaʻi ai ma isi. Ua iai nei ni aʻu uō moni i Molimau a Ieova.

E fai ma ou mafaufau po o faapeʻī loʻu olaga pe ana ou lē aʻoaʻoina tapulaa o le Tusi Paia. Atonu ua ou toe falepuipui, pe faatigā i isi ma mafatia ai. Peitaʻi, i le taimi nei ua ou maua se avā lelei ma e toʻalua laʻu fanau tama, ma o se fiafiaga i lo matou aiga le fesoasoani e aʻoaʻo isi i le upu moni e faatatau i le Atua.

FAAMATALAGA O LONA OLAGA

IGOA: JOSÉ CARLOS PEREIRA DA SILVA

TAUSAGA: 31

ATUNUU: PASILI

TALAAGA: FAAMISA I NOFOAGA FAITELE

O LOʻU OLAGA SA IAI: Sa ou ola aʻe i le vaipanoa matagā toe palapalā o Americana, i São Paulo. E lē mamā a matou vai inu ma e leai ni falelētaʻua. Sa sauā tagata i lea vaipanoa ma sa tele ai le solitulafono.

Sa ou sauā ma fia malosi a o oʻu tuputupu aʻe. O taimi uma ou te aafia ai i misa i nofoaga faitele, ma o lea sa fefefe ai tagata o le matou vaipanoa iā te aʻu. Sa faaalia loʻu fia malosi i oʻu lavalava, teuga ma foliga vaaia. Sa malosi laʻu inu, ma e masani lava ona ou inu seʻia oo ina lē iloa se mea. Sa ou pei o oʻu uso, na ou faaaogāina fualaau faasāina. Ma na oti se tasi o oʻu uso ona o le ova o le inu fualaau.

LE AUALA NA SUIA AI E LE TUSI PAIA LOʻU OLAGA: Ina ua matou feiloaʻi ma Molimau a Ieova, na latou faamatala mai iā te aʻu mai i le Tusi Paia e faapea, o le a faia e le Atua le lalolagi atoa o se parataiso. (Luka 23:42, 43; Faaaliga 21:3, 4) Na ou aʻoaʻoina foʻi e faapea, o ē ua oti e latou te lē o toe iloa se mea, ma e leai foʻi se afi i seoli e faasala ai e le Atua tagata amioleaga. (Failauga 9:5, 6) O se faamāfanafanaga tele lea iā te aʻu. O mea na ou aʻoaʻoina e uiga i le Atua na matuā uunaʻia ai aʻu e sui loʻu olaga. Ae e leʻi faigofie ona ou faia nei suiga, o le tuu o fualaau faasāina, le inu ava, le faamisa ma le palauvale, o mea sa ou masani ai.

 E ui i lea, sa matuā faalaeiauina aʻu i upu a le aposetolo o Paulo o loo i le 1 Korinito 6:9-11. O loo taʻua i lenā mau e faapea, o nisi Kerisiano i le uluaʻi senituri sa aafia foʻi i nisi o masaniga leaga, e pei lava foʻi o aʻu. Ae o loo taʻua foʻi i lea mau: “Sa faapena foʻi nisi o outou. A ua faamamāina outou ma faapaiaina, ma ua taʻuamiotonuina outou i le suafa o lo tatou Alii o Iesu Keriso, ma le agaga o lo tatou Atua.” O na upu na ou mautinoa ai, e mafai foʻi ona ou faia suiga o loo manaʻomia, ina ia faafiafiaina ai le Atua.

Ina ua amata ona ou aufaatasi ma Molimau a Ieova, ua ou mautinoa ai o loo latou ola e tusa ai o le tapuaʻiga moni. Sa latou iloa loʻu talaaga sauā ma le faamisa, ae na latou talia fiafia aʻu e aufaatasi ma i latou.

LE AOGĀ IĀ TE AʻU: Pe ana ou lē suʻesuʻeina le Tusi Paia ma suia loʻu olaga, semanū faapenei ua ou oti. Nai lo lea, ua ou maua le faaeaga o le fesoasoani i se tasi o oʻu uso e aʻoaʻoina le Tusi Paia, ma taofia lana masaniga o le faaaogāina o fualaau faasāina. Ua suʻesuʻe foʻi e isi o loʻu aiga le Tusi Paia, ona o loʻu faalaeiau i ai. Ou te matuā lotofaafetai ona ua mafai ona tuuina atu loʻu ola e auauna i le Atua, o lē e matuā manatu mamafa mai iā i tatou!

[Faamatalaga faaopoopo i le itulau 24]

‘Na ou filifili a oo mai faaosoosoga, ia ou tatalo muamua ina ia mafai ai ona teena, ma na aogā tele lea faiga iā te aʻu’