O Tamā Faaaposetolo—Pe na Ōgatusa a Latou Aʻoaʻoga ma Aʻoaʻoga a le ʻAuaposetolo?

E OO ane i le amataga o le senituri lona lua T.A., ua amata ona filogia vai manino o le upu moni faa-Kerisiano ona o aʻoaʻoga sesē. E tusa ai ma valoaga faagaeeina, ina ua mavae atu le ʻauaposetolo, na tuua e nisi le upu moni ma liliu atu i “tala sesē.” (2 Timoteo 4:3, 4) Pe tusa o le 98 T.A., na lapataʻi mai ai le aposetolo mulimuli o Ioane e faatatau i nei aʻoaʻoga sesē, ma tagata na “taumafai e taʻitaʻisesēina” Kerisiano faamaoni.—1 Ioane 2:26; 4:1, 6.

E leʻi umi ae taumafai loa tagata na taʻua o Tamā Faaaposetolo, e faauaʻi atu isi iā i latou e ala i a latou tusitusiga. O le ā na latou faia e tusa ai ma aʻoaʻoga sesē faalelotu? Pe na latou utagia le lapataʻiga faagaeeina a le aposetolo o Ioane?

 O Ai i Latou?

O le faaupuga “Tamā Faaaposetolo,” o loo faatatau atu i tusitala o talitonuga faalotu, o ē atonu na iloaina se tasi o aposetolo o Iesu, ia pe atonu foʻi na aʻoaʻoina e soo o ē sa aʻoaʻoina e le ʻauaposetolo. I le tulaga masani, o nei tane sa ola i le vaitaimi o le faaiʻuga o le senituri muamua T.A., e oo atu i le ogatotonu o le senituri lona lua T.A. * Sa aofia ai i na tane ia Clement o Roma, Ignatius o Anetioka, Papias o Iarapoli, ma Polycarp o Semurana. O le taimi lava foʻi lenā sa tusia ai tusitusiga ia e lē o taʻua mai o latou tusitala, e iai le The Didache (Aʻoaʻoga a Aposetolo), le Epistle of Barnabas (Tusi a Panapa), le Martyrdom of Polycarp (Le Fasiotia o Polycarp Ona o Ona Talitonuga), ma le tusi lona lua a Clement.

I aso nei, ua matuā faigatā ona iloa po o le ā le tele o loo ōgatusa ai aʻoaʻoga a Tamā Faaaposetolo ma aʻoaʻoga a Iesu. E lē taumatea o le sini o nei tane, ia lagolagoina pe faaauiluma o latou lava talitonuga faa-Kerisiano. Sa latou taʻusalaina le ifo i tupua ma amioga lē mamā. Sa latou talitonu o Iesu o le Alo o le Atua ma na toetū o ia. Peitaʻi, sa lē mafai ona latou taofia le faatuputupulaʻia o aʻoaʻoga a ē ua fulitua i le upu moni. Peitaʻi, o nisi o i latou sa faaopoopo atu foʻi i ai ma a latou aʻoaʻoga sesē.

Pe na Faatauvaa Nei Suiga?

O nisi aʻoaʻoga a nei tagata anamua na faapea mai o Kerisiano, sa salaese ma aʻoaʻoga a Keriso ma ana aposetolo. O se faataʻitaʻiga, e ese mai i le faiga lea na faavaeina e Iesu i le Talisuaga Afiafi a le Alii, lea foʻi e taʻu o le Talisuaga Mulimuli, na fautua mai lē na tusia le Didache e faapea, e tatau ona tufa muamua le uaina a o leʻi tufaina le areto. (Mataio 26:26, 27) Na taʻua foʻi e lenei tusitala e faapea, afai e leai se vai e faatofu ai le tagata i le taimi o le papatisoga, ua lava le faatulutulu o le vai i lona ulu. (Mareko 1:9, 10; Galuega 8:36, 38) O loo faalaeiauina foʻi Kerisiano i lea tusitusiga ina ia anapogi faalua i le vaiaso, ma ia faatolu ona fai i le aso le tatalo, Lo Matou Tama e.—Mataio 6:5-13; Luka 18:12.

Na aʻoaʻo e Ignatius e faapea e ao ona toe faamaopoopoina le faapotopotoga Kerisiano, ma e toʻatasi le epikopo e pule e “avea ma sui o le Atua.” O lenei epikopo e na te pulea patele e toʻatele. O na aʻoaʻoga fou na atili ai ona maua le avanoa e faaofi atu ai isi aʻoaʻoga e lē faale-Tusi Paia.—Mataio 23:8, 9.

Talitonuga ua Soona Fai, Faamaturoina, ma le Ifo i Tupua

Ona o talitonuga ua soona fai ae lē faavaea, na māfua ai ona tafetafea ese nisi o Tamā Faaaposetolo mai le upu moni. Sa galala Papias mo le upu moni, ma sa ia saʻili atu i Tusitusiga Kerisiano Eleni. I le taimi e tasi, sa talitonu o ia e faapea i le taimi o le Pulega a Keriso i le Afe Tausaga lea na valoia, o le a tutupu mai i vine lālā e 10,000, e oso mai i lālā taʻitasi tamaʻi lālā e 10,000, e oso mai i tamaʻi lālā taʻitasi tātupu e 10,000, e oso mai i tātupu taʻitasi fuifuivine e 10,000, e maua mai i fuifuivine taʻitasi vine e 10,000, ma e 1,000 lita o le uaina e maua mai i le vine e tasi.

 Sa lotomalie Polycarp e oti ona o ona talitonuga, nai lo le teena o lona faatuatuaga faa-Kerisiano. Ua lipotia e faapea sa aʻoaʻo o ia e le ʻauaposetolo ma isi o ē sa iloaina Iesu. Sa ia sii mai manatu o le Tusi Paia, ma e foliga mai sa ia taumafai e ola e tusa ai ma taʻiala faa-Kerisiano.

Peitaʻi, sa avea le naunau o isi iā Polycarp ma itu na pei ai ua tapuaʻi iā te ia. Ua taʻua i le Martyrdom of Polycarp e faapea, ina ua mavae lona maliu, sa naunau nei tagata e avatu lona tino e latou te tausia. Sa latou manatu i ona ponaivi “e sili atu ona tāua nai lo o ni maatāua e sili ona matagofie, ma e sili ona mamā nai lo o le auro.” E manino mai, sa faasolo ina faatuputeleina aʻoaʻoga sesē a i latou ua fulitua i le upu moni.

Tusitusiga Faaopoopo

O nisi Tamā Faaaposetolo sa iai le manatu e faapea, sa faagaeeina nisi tusitusiga faaopoopo e uiga i le Tusi Paia. O se tasi o i latou o Clement o Roma, o lē sa otoina mai ni manatu i tusitusiga e taʻu o le Poto ma le Iutita. O loo faasino atu le tusitala o le Epistle of Polycarp i le tusi o Topita, e faamaonia ai le manatu e faapea, o le faia o foaʻi, e mafai ona faasao ai mai le oti le tagata e faia le foaʻi.

I le senituri lona lua T.A., na faasalalau ai e evagelia pepelo tala sesē e faatatau i le olaga o Iesu, ma na masani ona faamaonia e Tamā Faaaposetolo na manatu. O se faataʻitaʻiga, na oto mai e Ignatius manatu mai le tusitusiga e taʻu o le Gospel of the Hebrews (Evagelia a Tagata Eperu). Ma ua taʻua e se tusitusiga e faatatau iā Clement o Roma e faapea: “E foliga mai na iloa e Clement Keriso, e lē ala mai i Evagelia, ae mai i tusitusiga e manatu tagata e mai i le Tusi Paia.”

Ua Saputu Mai Aʻoaʻoga Sesē

E ala i le faaaogā o talafatu, talitonuga faaagaga, ma filosofia ina ia faamatala ai le faatuatuaga faa-Kerisiano, na tatala ai e nei tagata le avanoa mo le tele o isi aʻoaʻoga sesē. O se faataʻitaʻiga, sa liliu atu Clement i le talafatu e faatatau i le manulele e taʻu o le phoenix, ina ia faamaonia ai le aʻoaʻoga o le toetū. Na taʻua e faapea o lenei manulele e toe ola mai i ona lefulefu, ma na fesootaʻi ma le tapuaʻiga i le lā i tala faaanamua a Aikupito.

O se isi tusitala na ia mimilo sesē le upu moni o le Tusi Paia, o le tusitala o le tusi e taʻu o le Epistle of Barnabas. Sa ia faamatala e faapea o le Tulafono a Mose o se talafaatusa. Ua ia fai mai, o manuvaefa mamā, lea e latou te toe ʻaina a latou mama ma e magalua o latou atigivae—e faatusa i ai tagata o ē e manatunatu loloto i le Afioga a le Atua. Na taʻua e le tusitala e faapea, o le atigivae e magalua o le manu, e faaatagia ai le tagata amiotonu o loo “ola i lenei lalolagi,” a o le taimi e tasi o loo taulaʻi atu i le olaga i le lagi. E lē mai i le Tusi Paia na manatu.—Levitiko 11:1-3.

Le Molimau a le Aposetolo o Ioane

A o faagasolo le uluaʻi senituri, na lapataʻi mai le aposetolo o Ioane e faapea: “Le ʻaupele e, aua tou te talitonu i upu uma mai i agaga, ae ia tofotofo i upu mai i agaga ina ia iloa ai pe e tupuga mai i le Atua, auā e toʻatele perofeta pepelo ua ō atu i le lalolagi.” (1 Ioane 4:1) Ua talafeagai lelei nei upu!

E oo ane i le faaiʻuga o le uluaʻi senituri, ua toʻatele i latou e faapea mai o Kerisiano ua lafoaʻia aʻoaʻoga a Iesu ma ana aposetolo. Nai lo le tetee atu i le tele o aʻoaʻoga a ē ua fulitua i le upu moni, na faaopoopo atu Tamā Faaaposetolo i na aʻoaʻoga sesē. Na latou faafilogia le upu moni i aʻoaʻoga sesē. Na faapea mai le aposetolo o Ioane e tusa ai ma i latou na: “O lē e fia pule ma e lē tumau i aʻoaʻoga a le Keriso, e lē autasi o ia ma le Atua.” (2 Ioane 9) Mo ē e loto faamaoni ma o loo saʻilia moni lava upu moni o le Tusi Paia, sa manino lelei lea lapataʻiga na faagaeeina e le Atua, ma o loo manino pea.

[Faaopoopoga i lalo]

[Faamatalaga faaopoopo i le itulau 29]

O nisi Tamā Faaaposetolo e aofia ai Clement, sa faaaogā i a latou tusitusiga talafatu, talitonuga faaagaga ma filosofia

[Ata i le itulau 28]

Sa lotomalie Polycarp e oti ona o ona talitonuga

[Ē Ana le Ata]

The Granger Collection, New York