Pe e Mafai Ona Malamalama i le Tusi Paia?

“O Aso Sa uma e faitau ai e lo matou aiga le Tusi Paia. Ou te leʻi fiafia tele i ai. Ou te talitonu o le Tusi Paia o le Afioga lea a le Atua, ae ou te leʻi malamalama i le tele o mea na ou faitau i ai.”—Sitivi, mai i Peretania.

“Ina ua 17 oʻu tausaga, sa ou taumafai e faitau le Tusi Paia. Ae na ou iloa e faigatā lava ona ou malamalama i ai, o lea na ou tuua ai loa.”—Valvanera, mai i Sepania.

“E faatasi lava ona ou faitauina le Tusi Paia ona o aʻu o se Katoliko, e tatau lava ona ou faitauina. E tolu tausaga na ou faitauina ai faatoʻā uma! Ae na faigatā ona ou malamalama i ai.”—Jo-Anne, mai i Australia.

O LOO tumau pea ona avea le Tusi Paia ma tusi e sili ona lauiloa i le lalolagi. O loo sili atu pea ona alumia lenei tusi nai lo o isi tusi, ma e maua e le toʻatele i le tele o gagana, ma le tele o isi auala. Peitaʻi, e toʻatele tagata e iai Tusi Paia e lē malamalama i ai. Po o lou manatu lenā i le Tusi Paia?

Pe Finagalo Lē e Ana le Tusi ia Tatou Malamalama i Lana Afioga?

Ua faapea mai le Tusi Paia: “O Tusitusiga Paia uma e mai le agaga o le Atua.” (2 Timoteo 3:16) Ioe, o Ieova le Atua e ana le Tusi Paia. Pe e finagalo o Ia ia tatou malamalama i lana Afioga? Po o lona finagalo moni ia faafaigatā ona tatou malamalama i le Tusi Paia, ae filifilia na o taʻitaʻi lotu ma tagata aʻoga o le Tusi Paia ia malamalama i ai?

Ia iloilo mau nei mai i le Tusi Paia:

“Auā o lenei poloaʻiga ou te fai atu ai iā te oe i le aso nei, e lē faigatā iā te oe, e lē mamao foʻi ia.”—Teuteronome 30:11.

“O le faaalia mai o au afioga e faamalamalamaina ai; e faalotomatalaina ai ē ua faigofie.”—Salamo 119:130.

“I lenā taimi, ua matuā fiafia ai o ia i le agaga paia, ma faapea atu: ‘Ou te vivii atu iā te oe i luma o tagata, loʻu Tamā e, le Alii o le lagi ma le lalolagi, auā ua e matuā natia nei mea mai tagata popoto ma ē atamamai, a ua faaalia i tamaiti.’”—Luka 10:21.

Ioe, e finagalo Lē e Ana le Tusi Paia ia e malamalama i lana Afioga! Ae peitaʻi, o loo tumau pea le mea moni, o le toʻatele o tagata e naunau moni, e faigatā ona latou malamalama. O le ā e fesoasoani iā i latou? E tolu ni auala o loo aumaia i mataupu ia e sosoo mai, e fesoasoani iā te oe e malamalama ai i le Tusi Paia.