Se Asiasiga i se Fale Lomitusi Mataʻina

O LE mekasini o loo e faitauina, atonu e lē o se lomiga muamua lea o nei mekasini ua e vaai i ai. Atonu na asiasi atu Molimau a Ieova i lou fale ma ofo atu le Olomatamata ma le Ala Mai! e fesoasoani iā te oe e malamalama lelei ai i le Tusi Paia. Pe atonu foʻi na e vaai i Molimau o ofoina atu na lomiga faale-Tusi Paia i le auala tele, po o se nofoaga faitele i lo outou vaipanoa. O le mea moni, o le tufaina atu o lenā mekasini i masina taʻitasi, ua oo atu i le 35 miliona kopi, ma ua sili atu ai ona salalau lenei mekasini i le lalolagi atoa.

Po o e silafia le nofoaga ma le auala o loo lomia ai nei lomiga? Ina ia iloa le tali, seʻi o tatou vaavaai i se tasi o fale lomitusi mai i le tele o fale lomitusi o loo faaaogā e Molimau a Ieova i atunuu eseese, o le fale lomitusi lea i Wallkill, i Niu Ioka, i Amerika. E toʻatele tagata faitau o a tatou lomiga e lē mafai ona asiasi atu i le fale lomitusi o loo faaaogā e Molimau a Ieova i le Iunaite Setete, ae o le a fesoasoani nei faamatalaga ma ata ina ia e iloa ai mea o loo faia i inā.

O le mea moni, e amata ona lomia i upu ua tusia. E maua e le Matagaluega e Sauniunia ai lomiga ia tusitusiga e tatau ona lomia, mai i le Matagaluega o Tusitusiga i Brooklyn, i Niu Ioka, e ala i komepiuta. O nei tusitusiga e faaaogā e faia ai lapa lomitusi ua uma ona vane ai tusitusiga e manaʻomia ona lomia. I Wallkill i masina taʻitasi, e taunuu ane ai i le fale lomitusi ni taaʻiga pepa e 1,400 ia e tusa ma le 80 i le 100 tone o pepa i le aso. O nei taaʻiga pepa, e sili atu i le 3,000 pauna le mamafa, ma e tuuina i totonu o masini lomitusi tetele e lima. E lomia pepa i vaega, ma vaevae i ni vaega e taʻitolu sefululua itulau i le vaega e tasi. O le mekasini o loo e faitauina, e tasi le vaega. Ae faapefea tusi? I le masini e tuufaatasia ai, e mafai ona faamau faatasi ai vaega ina ia maua ai se tusi e tasi. E lua itu o le masini e tuufaatasia ai tusi, o le itu muamua, e mafai ona saunia ai tusi faavaa malō e 50,000 po o le 75,000 tusi faavaa vaivai i le aso e tasi. Ae i le itu lona lua, e mafai ona tuufaatasia ai tusi faavaa vaivai e tusa ma le 100,000 i le aso e tasi.

I le 2008, na lomia ai e lenei fale lomitusi le sili atu ma le 28,000,000 tusi, ma e sili atu i le 2.6 miliona o nei tusi, o Tusi Paia. I lenā lava tausaga, e 243,317,564 mekasini na lomia. Na teuina e le fale lomitusi nei lomiga faale-Tusi Paia i le tusa ma le 380 gagana. Pe a lomia lomiga, o le ā le isi mea e sosoo ai?

E maua e le fale lomitusi talosaga mai i faapotopotoga e 12,754 a Molimau a Ieova i le Iunaite Setete, ma le 1,369 mai i le Karipeane ma Hawaii. E afīfī e le Matagaluega o Felaʻuaʻiga nei mea uma o loo talosaga mai ai, ma  aauina atu i vaa i tuatusi talafeagai. I tausaga taʻitasi, e tusa ma le 30 miliona pauna (14 miliona kilokalama) o lomiga e aauina atu i vaa i faapotopotoga i le Iunaite Setete.

O le vaega aupito sili ona tāua o lenei fale lomitusi, e lē na o masini, ae e aofia ai ma tagata. E sili atu i le 300 tagata e galulue i Matagaluega e Sauniunia ai lomiga, e pei o le ʻautusiata, faia o faasologa, potu e lolomi ai tusi, o le vaega e tuufaatasia ai, ma le Matagaluega o Felaʻuaʻiga. E lē totogia tagata faigaluega, e tauofo i latou, ma e amata mai i le 19 tausaga e oo i le 92 tausaga le matutua.

E naunau fiafia i latou i tagata uma, o le a talia ma le naunau nei lomiga ma aʻoaʻoina ai, faalaeiauina, ma taʻitaʻia ai i mataupu silisili o le Tusi Paia o loo i ai. Ua matou faamoemoe o loo e iai faatasi ma na tagata faitau, ma o le a fesoasoani iā te oe lomiga o loo lomia i inei ina ia faaauau ai ona ave i fale le poto e uiga iā Ieova le Atua ma Iesu Keriso, e maua ai le ola e faavavau.—Ioane 17:3.