Pe e Lelei Lotu Uma?

O LOO tatou ola i se lalolagi e iai le anoanoaʻi o lotu eseese. Ua faailoa mai i se tasi suʻesuʻega talu ai nei, e 19 lotu autū ma nisi o lotu laiti e 10,000 o loo iai i le lalolagi atoa. Ua ofo mai e nei lotu eseese i tagata ni filifiliga e leʻi faapea ona iai muamua. O lea la, pe e afāina po o lē fea lotu e te filifilia?

Ua faapea mai nisi tagata, o lotu eseese e tai pei o ni auala eseese e tau atu i se mauga. Iā i latou, e lē afāina po o lē fea auala e te filifilia, auā e tasi le taunuuga o auala uma. Ua latou faapea mai e na o le toʻatasi le Atua Silisili Ese, ma e tatau la ona tau atu lotu uma iā te ia.

Pe e Tau Atu Lotu Uma i le Atua?

O le ā na taʻua e Iesu Keriso, o se tasi o taʻitaʻi lotu e sili ona faaaloalogia i le talafaasolopito, e uiga i lenei mataupu? Na ia faapea atu i ona soo, “Ia outou ulu atu i le faitotoʻa va apiapi.” Aiseā? “Auā e va tele le faitotoʻa, e lautele foʻi le ala e tau atu i le faaumatiaga, e toʻatele foʻi i latou o ē ui atu i ai. Ae e va apiapi le faitotoʻa, e vaitiiti foʻi le ala e tau atu i le ola, e toʻaitiiti foʻi i latou o ē e maua.”—Mataio 7:13, 14, The Holy Bible—New International Version.

Po o le uiga o le fetalaiga a Iesu, o nisi lotu e tau atu “i le faaumatiaga”? Pe na ia aʻoaʻo e na o ē e lē talitonu o loo i le ala vatele, a o ē e talitonu i le Atua—e tusa lava po o le ā le lotu e iai—o loo i le ala vaitiiti e tau atu i le ola?

Ina ua uma ona taʻua e na o le lua auala, ona fetalai lea o Iesu e faapea: “Ia outou faaeteete i perofeta pepelo. E latou te ō mai iā te outou i foliga agamalu e pei o mamoe, ae e matuā mataʻutia lava i latou e pei o luko feʻai.” (Mataio 7:15, New Century Version) Mulimuli ane na ia fetalai e faapea: “E lē sao atu i le malo o le Lagi i latou uma o ē fai mai iā te aʻu, ‘Le Alii e, le Alii e’; ae e na o i latou e faia le mea e finagalo i ai loʻu Tamā o i le  lagi.” (Mataio 7:21, Today’s English Version) Pe afai e taʻu se isi o se perofeta pe faapea mai o Iesu o lona “Alii,” e tatau ona manatu e faapea o ia o se tagata lotu, po o sē e talitonu i le Atua. Ua manino la, na lapataʻi mai Iesu e faapea, e lē o lotu uma e lelei, ma e lē o taʻitaʻi lotu uma e ao ona talitonuina.

Pe e Mafai Ona Iloa le Ala Vaitiiti?

Talu ai e lē o lotu uma e tau atu i le Atua, e faapefea la ona e maua le lotu moni e tau atu i le ola mai i le faitau afe o lotu eseese? O se faataʻitaʻiga: Seʻi faapea ua e fesēaʻi i se aai telē. Ona e fesili lea mo se fesoasoani. Ua taʻu mai ma le mautinoa e se tasi tagata, e te alu i sasaʻe. A ua fai mai le isi, e te alu i sisifo. A ua faapea mai le isi, faitalia oe po o lē fea itulagi e te agaʻi i ai. Mulimuli ane, ua faaaogā e se isi tagata faimalaga se faafanua e saʻo, e faasino atu ai iā te oe le auala saʻo. Ona ia avatu lea iā te oe o le faafanua e fai ma vaai i ai a o e faimalaga. Ua e mautinoa nei la, o le a e taunuu i le mea o loo e alu i ai.

O le tulaga foʻi lenā e iai pe a oo ina filifilia po o lē fea lotu e saʻo, e tatou te manaʻomia se faafanua faaleagaga e maufaatuatuaina. Po o iai se faafanua faapena? Ioe, e iai. O lenā faafanua o le Tusi Paia, lea o loo taʻu mai ai e faapea: “O Tusi Paia uma lava e mai le Agaga o le Atua ia, ma e aogā e aʻoaʻo ai, e aʻoaʻi ai, e faasaʻo ai, e faatonu ai foʻi i le amiotonu.”—2 Timoteo 3:16, King James Version.

Atonu o loo maua i lau gagana se faaliliuga o le Tusi Paia e mafai ona e faaaogā o se faafanua faaleagaga e taʻitaʻia ai oe i le tapuaʻiga saʻo. Ua saunia e Molimau a Ieova, o ē o loo lomiaina lenei lomiga, se faaliliuga maufaatuatuaina o le Tusi Paia ua taʻua o le Tusi Paia a le Lalolagi Fou. Peitaʻi, pe afai e lē o oe o se Molimau a Ieova, atonu la e te manaʻo e faaaogā se isi faaliliuga pe a iloiloina le auala e iloa ai le lotu lelei ma le lotu leaga. O lea la, o loo faaaogā i lenei faasologa o mataupu mau mai i faaliliuga eseese o le Tusi Paia, ia o loo faaaogā e isi lotu.

A o e faitauina mataupu o loo mulimuli mai, ia faatusatusa mea ua e iloa ma mea o loo taʻua i le Tusi Paia. Ia mātau fetalaiga a Iesu e faatatau i le eseesega o le lotu lelei ma le lotu leaga. Na ia fetalai e faapea: “E fua mai e le laau lelei fua lelei, ae e fua mai e le laau leaga fua leaga. E lē mafai e le laau lelei ona fua mai fua leaga, e lē mafai foʻi e le laau leaga ona fua mai fua lelei.” (Mataio 7:17, 18, Contemporary English Version) Seʻi o tatou iloiloina na o ni fua lelei se tolu o loo taʻua i le Tusi Paia, e iloa ai le “laau lelei.”

[Faamatalaga faaopoopo i le itulau 3]

Ua pei le Tusi Paia o se faafanua maufaatuatuaina e mafai ona fesoasoani i se tagata e maua ai le ala i le lotu moni