O se Tusi Mai i Polivia

Fiafia ma Iai se Faamoemoe e ui i le Mativa

A O AUAUNA o se misionare i se atunuu tauatiaʻe, e lē masani ona ou vaai i le mativa ma le leai o se faamoemoe. Sa ou fia vaai vave i se mapusaga o tagata uma mai mafatiaga. Ae ua ou iloa e na o le Malo o le Atua o le a na foʻia na faafitauli. Ae peitaʻi, e tele taimi na ou vaai ai i tagata na mulimuli i le Afioga a le Atua, o fiafia e ui lava i tulaga faigatā. O se tasi o i latou o Sabina.

I le tele o tausaga ua mavae, sa sii ai e Sabina lana fanau teine e toʻalua, ma tulimataʻi lana tane a o oso i luga o se pasi, e saʻili mo se galuega e lelei le totogi i se isi atunuu. Sa faatalitali i lona toe foʻi mai, ae e leʻi toe foʻi mai o ia. Talu lava ona alu ese o ia, sa galue mamafa Sabina i aso taʻitasi ina ia maua mea e tausi ai o ia ma lana fanau teine, o Milena ma Ghelian.

Na ou feiloaʻi muamua iā Sabina i se tasi aoauli a o ia fesoasoani atu ma le onosaʻi i le toʻatele o tagata faatau i le faleoloa o lona uso. Sa ou iloa atu i mata o Sabina lona vaivai tele, ona sa ia galue mamafa i le aso atoa. Na ou fai atu i ai pe manaʻo e fai ni a matou lesona faale-Tusi Paia, o ia ma lana fanau. Sa tali mai o ia, “Ou te fiafia lava i ai, ae o lea ou te pisi. Ae ou te manaʻo e fai ni a outou lesona ma laʻu fanau teine.” Na ou ioe i ai. A o agaʻigaʻi i luma lesona a teine, sa ou iloa ai Sabina ma ou malamalama i tulaga faigatā o loo iai o ia.

E amata le aso o Sabina i le 4:00 i le vaveao a o momoe pea lana fanau teine i lo latou potu e tasi, na faamumū e Sabina le afi i se ulo alamini. Sa ia kuka ai fasi povi e fai ai ana pai povi, ma faatau atu e maua ai se tupe e tausi ai lona aiga. I le pō, e sauni ai e Sabina le paluga mo nei pai povi.

E tuu ma le faaeteete e Sabina mea uma e manaʻomia mo lenā aso i se taavale toso na ia faanoi mai—se faamalu, se ogaumu mata tasi, se fagu kesi, se laulau, ni nofoa, ulo, ma le gaʻo, faatasi ai ma le paluga mo pai, ma se vai suamalie.

I le 6 i le taeao, e sauni ai Sabina ma lana fanau teine e toʻalua e ō. E tapuni ma loka le faitotoʻa o lo latou fale. E lē fiafia o latou foliga, e leai se tasi e tautala pe ata. E tuu uma atu lo latou malosi i le galuega o loo latou faia. I le tele o taeao, ou te vaavaai atu ai mai le faamalama o le fale o misionare, ma sa ou mātauina ai vaaiga faapenei. Ioe, o Sabina o se tasi o le toʻatele o fafine e tuua o latou aiga a o leʻi tafa mai ata, ina ia faatau atu meaʻai ma vai inu i ala tetele o Polivia.

 I le 6:30 i le taeao, a o osooso aʻe le mata o le lā i mauga, ae ua taunuu Sabina ma lana fanau i le latou tulimanu e faatau ai a latou mea. E latou te aveese a latou mea mai le taavale e aunoa ma se upu, ma faatū la latou umukuka feaveaʻi. O le pai muamua lava e tuu i le gaʻo ua pupuna, e ʻiʻī. E sasala le manogi lelei i le mālū o le sau i le vaveao, ma e vave ai ona tosina mai tagata fia aai.

E fesili atu Sabina i le tagata faatau “E fia pai?” E aunoa ma se ea aʻe i luga, e faalālā mai tamatamaʻilima e lua o le tagata, ona ia avatu lea iā te ia o pai vevela e lua. Ona tago atu lea ma aumai le tau itiiti o le pai. E faia pea lenei gaoioiga i le aso atoa. Pe a taulia loa le pai mulimuli, ona tapena lea o a latou mea ma toe foʻi i le aiga. E ui lava ina tigā vae o Sabina ona o galuega o le taeao, ae e toe alu lava i le isi ana galuega i le faleoloa o lona uso.

Ina ua ou taunuu atu i le faleoloa mo le uluaʻi lesona a lana fanau, ae ua uma ona faatulaga ni nofoa se lua i se tulimanu. Mai lava i le amataga, e tulimataʻi ma le naunau e Milena ma Ghelian, e 9 ma le 7 tausaga, lesona taʻitasi ma e sauniuni lelei. Na faasolosolo ona talanoa mai nei teine matamumuli iā te aʻu, ma matou faauō loa. Ina ua iloa e Sabina ua māfana mai lana fanau, na pāʻia ai lona loto. Sa ia filifili loa e fai ni a ma lesona faale-Tusi Paia e ui lava e matuā pisi o ia.

A o faateleina le poto o Sabina, sa faateleina foʻi lona alofa iā Ieova le Atua. Ua amata ona ia tofo i se mea e fou iā te ia—o le fiafia! O lē sa faatau atu ana oloa i le auala, sa vaivai ma mata faanoanoa, ua ese nei ona foliga. Ua tū saʻo, ua ea i luga lona ulu, ma ua foliga fiafia. Ua faapea mai lona uso: “Ua mata ataata Sabina i taimi uma. Ae e leʻi masani aʻi.” Ua faapena foʻi ona vaaia e isi se suiga tele iā Sabina ma lana fanau teine. Ua faamalieina nei le manaʻoga faaleagaga ua leva ona ia manaʻo i ai.

Sa fiafia Sabina i lana suʻesuʻega, ae ona o le pisi tele o lana faasologa, na lē mafai ai ona ia auai i sauniga faa-Kerisiano. Ae na iʻu lava ina ia talia laʻu valaaulia e asiasi atu i le Maota mo Sauniga. Na amata mai i lenā taimi, e na te leʻi toe misia se sauniga. Na maua e Sabina ni uō moni i le faapotopotoga. Sa ia iloa foʻi, e moni lava e saunia e Ieova mea e manaʻomia mo i latou e alolofa iā te ia, ma faia ni faataulaga ina ia auauna atu iā te ia.—Luka 12:22-24; 1 Timoteo 6:8.

Sa fiafia Sabina i mea na ia aʻoaʻoina, ma naunau ai e tufa atu i isi. Ae na faapea mai o ia, “O so o se taimi lava ou te mafaufau ai e talaʻi atu i le lautele, ou te lagona le fefe.” Sa ia manatu e faapea, ʻE mafai faapefea iā te aʻu, o se fafine e matamuli, ma e leʻi lelei ni aʻoga ona aʻoaʻo se tasi?’ Ae o le agalelei na faaalia atu iā te ia, ma mea lelei ua ia tofo i ai i lona olaga, na uunaʻia ai o ia e faia lenei laasaga tāua. Sa ia iloa foʻi e vaavaai atu lana fanau teine iā te ia o se faaaʻoaʻoga lelei. O lea, sa amata loa ona ia taʻu atu i isi le tala lelei. Sa aufaatasi atu ma le maelega lana fanau teine iā te ia.

I aso nei, ua lē o toe avea Sabina o se tasi o fafine mativa e galue tautigā i lea aso ma lea aso. E lē o telē se suiga i lona tulaga tau tupe. A ua suia lana vaaiga i le olaga. I le taimi nei, i le avea o se Kerisiano papatisoina, o loo ia talaʻi atu le tala lelei o le Malo o le Atua i isi—e na o lea le vaifofō tumau i le tulaga mativa ma le atuatuvale o le lalolagi.—Mataio 6:10.

I le 5:00 i le taeao, ua sauni Sabina e tuua le potu e tasi o loo nofo ai. Ae i le taeao lenei, e na te lē o faatauina atu ni pai povi. O loo feiloaʻi o ia ma se vaega o uso ma tuafāfine Kerisiano, ina ia molimau atu i le ala tele. O le faaavanoa o sona taimi i vaiaso taʻitasi e fesoasoani ai i isi, ua atili ai ona fiafia lona olaga. Ua ia loka le faitotoʻa, ma agaʻi atu i le ala tele ma ona foliga fiafia. Nai lo o le tulei o se taavale toso, o loo ia ave se ato. O loo iai i totonu lana Tusi Paia ma lomiga faale-Tusi Paia, lea o le a ia faaaogā e faailoa atu ai le faamoemoe i isi. Ua ataata Sabina ma faapea mai, “Ou te leʻi mafaufau o le a mafai ona ou talanoa atu i isi e uiga i le Tusi Paia.” Ua ia faaopoopo mai, “Ou te fiafia tele i ai!”