O ʻOa Mai i le Atua

PE AFAI e te faatuatua i le Atua, po o le a ia faamanuia oe i ʻoa? Masalo, ae atonu e lē o ituaiga ʻoa na o loo e faatalitalia. Seʻi manatu iā Maria le tinā o Iesu. Na faaali atu le agelu o Kaperielu iā te ia ma faapea atu, ua “alofateleina” o ia e le Atua, ma o le a ia fanauina mai le Alo o le Atua. (Luka 1:28, 30-32) Ae peitaʻi, e leʻi mauʻoa o ia. Ina ua ofo atu e Maria se taulaga ina ua fanau mai Iesu, sa ia avatu “ni manutagi se lua po o ni tamaʻi lupe se lua,” o se taulaga e masani ona ofo atu e tagata matitiva iā Ieova.—Luka 2:24; Levitiko 12:8.

Pe na avea le mativa o Maria ma itu e faapea ai, e na te leʻi maua le faamanuiaga a le Atua? I le isi itu, ina ua alu atu e asiasi i lona tauaiga o Elisapeta, sa “faatumuina Elisapeta i le agaga paia. Ua alaga leotele o ia ma faapea mai: ʻAmuia oe [Maria] i fafine, amuia foʻi lē o le a fanau mai iā te oe!’” (Luka 1:41, 42) Sa faamanuiaina Maria i le avea ma tinā faalelalolagi o le Alo pele o le Atua.

O Iesu e lē o se tagata mauʻoa. E lē gata na fanau mai ma tausia aʻe i se aiga matitiva, ae na mativa foʻi o ia i lona olaga atoa i le lalolagi. I se tasi taimi, na ia taʻu atu ai i se tagata na manaʻo e avea ma ona soo e faapea: “E fai lua o alope, e iai foʻi mea e momoe ai manufelelei o le lagi, a o le Atalii o le tagata e leai se mea e moe ai.” (Luka 9:57, 58) Ae peitaʻi, o le mea na faia e Iesu Keriso ina ua afio mai i le lalolagi, na mafai ai e ona soo ona maua ni oloa se tele. Na tusi le aposetolo o Paulo e faapea: “Ua avea o ia o sē e mativa ona o outou, ina ia outou mauʻoa ai ona o lona mativa.” (2 Korinito 8:9) O ā ituaiga o ʻoa na avatu e Iesu i ona soo? Ae faapefea i tatou i aso nei?

O ā Ituaiga ʻOa?

E masani ona faalavelave ʻoa faaletino i le faatuatua, talu ai e ono faatuatua se tagata mauʻoa i ana tupe i lo le Atua. Na fetalai Iesu e faapea: “E matuā faigatā lava mo ē e tele tupe ona ulu atu i le malo o le Atua!” (Mareko 10:23) E manino lava la, o ʻoa na ofo  atu e Iesu i ona soo, e lē o ni ʻoa faaletino.

O le mea moni, o le toʻatele o Kerisiano i le uluaʻi senituri sa matitiva. Ina ua talosaga atu se tagata na pipili talu ona fanau mai mo se tupe, na tali mai Peteru: “E leai saʻu siliva po o se auro, ae ou te avatu iā te oe le mea lea ua iā te aʻu: I le suafa o Iesu Keriso le Nasareta, inā savali ia!”—Galuega 3:6.

Ua faaalia foʻi i upu a le soo o Iakopo e faapea, o le tele lava o tagata matitiva na faia aʻe ai le faapotopotoga Kerisiano. Na ia tusi e faapea: “Faalogo maia oʻu uso pele e, po ua lē filifilia ea e le Atua, ē matitiva i le lalolagi ina ia mauʻoa i le faatuatua, ma avea ma suli o le malo, lea na ia folafola mai i ē e alolofa atu iā te ia?” (Iakopo 2:5) E lē gata i lea, na taʻua foʻi e le aposetolo o Paulo e faapea, e lē toʻatele ni tagata e “popoto i la le tino” po o ē e “maualuluga” po o ni “tamālii na valaauina” e avea ma vaega o le faapotopotoga Kerisiano.— 1 Korinito 1:26.

Pe afai o ʻoa na avatu e Iesu e lē o ni ʻoa faaletino, o ā la ituaiga ʻoa na ia avatu iā i latou? I se tusi na avatu e Iesu i le faapotopotoga i Semurana, na ia taʻua ai e faapea: “Ua ou iloa lou puapuaga ma lou mativa, (ae peitaʻi ua e tamaoaiga).” (Faaaliga 2:8, 9) E ui lava e matitiva Kerisiano i Semurana, ae na latou mauaina ʻoa e sili mamao atu ona tāua i lo siliva ma auro. Na mauʻoa i latou ona o lo latou faatuatua ma le faamaoni i le Atua. E matuā tāua le faatuatua auā, “e lē o tagata uma e iai le faatuatua.” (2 Tesalonia 3:2) O i latou e lē faatuatua, e mautinoa e matitiva i le silafaga a le Atua.—Faaaliga 3:17, 18.

ʻOa e Maua Ona o le Faatuatua

O ā la auala e tāua ai le faatuatua? O i latou e faatuatua i le Atua, e maua aogā mai “i le tele o lona agalelei, faapalepale, ma le onosai.” (Roma 2:4) E latou te olioli foʻi i le  “faamagaloina o a [latou] agasala,” ona o lo latou faatuatua i le taulaga togiola a Iesu. (Efeso 1:7) E lē gata i lea, o loo iā i latou le atamai lea e avatu e “le upu a Keriso” i ē e faatuatua. (Kolose 3:16) A o latou tatalo ma le faatuatua i le Atua, o le a leoleoina o latou loto ma mafaufau i “le filemu mai le Atua, lea e silisili i mea uma lava e manatu i ai,” ma maua ai le lotomalie ma le fiafia.—Filipi 4:7.

E lē gata i nei aogā uma, ae o i latou e faatuatua i le Atua ma lona Alo, o Iesu Keriso, e maua le faamoemoe ofoofogia o le ola e faavavau. E lauiloa fetalaiga a Iesu Keriso e faapea: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) E faamalosia lenā faamoemoe tautele pe a maua e se tasi le poto saʻo e uiga i le Tamā ma lona Alo, auā na fetalai foʻi Iesu e faapea: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.”—Ioane 17:3.

Talu ai o faamanuiaga a le Atua e faaleagaga, ae e iai foʻi aogā i le itu tau faalogona ma le faaletino. O se faaaʻoaʻoga, o Dalídio i Pasili. A o ia leʻi mauaina le poto saʻo e uiga i fuafuaga a le Atua, sa iai sona faafitauli i le inu tele i le ʻava malosi. O lenei mea sa iai se aafiaga leaga i totonu o lona aiga. E lē gata i lea, e leʻi mautū foʻi lona tulaga tautupe. Ona amata lea ona ia suʻesuʻe le Tusi Paia ma Molimau a Ieova, ma matuā suia ai lona olaga.

O mea na aʻoaʻoina e Dalídio mai i le Tusi Paia, na ia lafoaʻia ai ana masaniga leaga. Na matuā agaʻigaʻi o ia i luma faaleagaga ma faapea mai: “E masani ona ou alu i lea fale kalapu ma lea fale kalapu; a o lenei ua ou alu mai i lea fale i lea fale.” Ua avea o ia ma faifeʻau faataimi atoa o le Afioga a le Atua. O lea suiga ua faaleleia ai e lē gata i lona soifua mālōlōina, ae faapea foʻi ma lona tulaga tautupe. Na faapea mai Dalídio, “O tupe ia na ou faaaogā i le ʻava malosi, ua ou faaaogāina nei e fesoasoani ai i isi o loo manaʻomia le fesoasoani, pe faatau ai mea ou te manaʻomia.” Ua tele foʻi uō moni ua ia faia e ala i lona auaufaatasi ma ē e tutusa la latou vaaiga i mea faaleagaga. Ua olioli nei Dalídio i le filemu o le mafaufau ma le lotomalie, e sili atu i lo se isi lava taimi, a o ia leʻi iloaina le Atua.

O se isi faaaʻoaʻoga o se olaga faaʻoaina na oo i sē na atiaʻe le faatuatua iā Ieova le Atua, o Renato. Pe a e vaai i ona foliga fiafia i aso nei, e faigatā ona e talitonu na matuā faileagaina o ia. Na lafoaʻi o ia e lona tinā ina ua faatoʻā fanau mai. Na tuu o ia i se taga i lalo o se nofoa umī, ua matuā maʻosiʻosia ma totoulia lona tino, ma e leʻi tāina lona pute. Na savavali ane ni fafine se toʻalua ma iloa ai se taga o loo minoinoi i lalo ifo o le nofoa umī. I le taimi muamua, na la manatu ai o se tamaʻi pusi na tuu ai e se tasi i inā. Ina ua la iloa o se pepe faatoʻā fanau mai, na vave loa ona la avatu i se falemaʻi e latalata ane mo se togafitiga.

O le tasi o fafine o se Molimau a Ieova, ma na ia taʻu atu iā Rita, o se isi foʻi Molimau, e uiga i le pepe. Sa mafatia Rita i nisi o ana pepe na fananau mai ua feoti, ma e na o le toʻatasi lava lana tama teine. Sa manaʻo lava o ia i sana tama tama, o lea na ia filifili ai e vaetamaina Renato.

 Na taʻu atu e Rita iā Renato a o laʻitiiti lava, e lē o ia o lona tinā moʻi. Ae sa ia tausi ma le alofa faapelepele iā te ia, ma taumafai e totō aʻoaʻoga faaleagaga iā te ia. A o faasolo ina matua, sa fiafia o ia i le Tusi Paia. Sa ia lotofaafetai foʻi i le auala mataʻina na laveaʻiina ai o ia. E maligi ona loimata i taimi uma lava e na te faitauina ai upu a le faisalamo o Tavita e faapea: “E ui lava ina tuua aʻu e loʻu tamā ma loʻu tinā, a e talia aʻu e Ieova.”—Salamo 27:10.

I le faaalia o lona talisapaia ma le lotofaafetai i mea uma ua faia e Ieova mo ia, na papatiso ai Renato i le 2002, ma avea ma faifeʻau Kerisiano faataimi atoa i le tausaga na sosoo ai. E na te lē o iloa lava po ai lona tamā ma lona tinā moni, ma atonu o le a ia lē iloaina lava. Ae peitaʻi, ua manatu Renato, o se tasi o meaalofa sili ua ia maua, o lona iloaina lea o Ieova, ma faatuatua iā te ia o se Tamā alofa ma tausi lelei iā te ia.

Atonu o loo e moomoo ia maua se faiā māfana ma le alofa ma le Atua, lea e mafai ona faatamaoaiga moni ai lou olaga. Ua tatala atu i tagata uma—o ē mauʻoa ma ē matitiva, le avanoa e maua ai se faiā ma Ieova le Atua ma lona Alo o Iesu Keriso. Atonu e lē aumaia ai se tamaoaiga faaletino, ae o le a iʻu ai i le filemu ma le lotomalie, e lē mafai e tupe uma i le lalolagi ona faatau mai. Ua moni ai upu o loo i le Faataoto 10:22: “O le faamanuia a Ieova, o lea e faatamaoaiga aʻi; na te lē faaopoopo i ai se tigā.”

E matuā fiafia Ieova le Atua i tagata e ō atu iā te ia: “E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.” (Isaia 48:18) Ma ua ia folafola mai e faapea, o i latou e ō atu iā te ia ona o uunaʻiga ma se uiga saʻo, o le a matuā tele le taui e maua: “O le taui o le faamaulalo ma le mataʻu iā Ieova, o le oloa lea, ma le viiga, ma le ola.”—Faataoto 22:4.

[Faamatalaga faaopoopo i le itulau 6]

O le faatuatua i le Atua e iʻu ai i le filemu, lotomalie, ma le fiafia

[Ata i le itulau 5]

E ui ina matitiva i le itu faaletino, ae na matuā faamanuiaina e le Atua le aiga faalelalolagi o Iesu