Ua Fesili Mai le ʻAufaitau

O le ā le Auala ua Tasi ai Iesu ma Lona Tamā?

Na fetalai Iesu: “E tasi i maʻua ma le Tamā.” (Ioane 10:30) Ua faaaogā e nisi lenei mau e faamaonia ai o Iesu ma lona Tamā o ni vaega e lua o se Atua tolutasi. Ae po o le uiga lenā o le faamatalaga a Iesu?

Seʻi o tatou iloiloina le mataupu atoa. I le fuaiupu e 25, na faapea mai ai Iesu e na te faia galuega i le suafa o lona Tamā. I le fuaiupu e 27 i le 29, o loo ia taʻua ai mamoe faafaatusa na foaʻi atu e lona Tamā iā te ia. E lē faigofie ona malamalama lana ʻaufaalogologo i na faamatalaga a Iesu, pe ana faapea o Iesu o lona Tamā foʻi lenā. Ae o le uiga o le faamatalaga a Iesu, ‘Ona e ma te autasi ma loʻu Tamā, o le a lē mafai la e se isi ona aveesea mamoe mai iā te aʻu, pe aveesea mai loʻu Tamā.’ E pei lava o loo fai atu se atalii i le fili o lona tamā, ‘A e osofaʻia loʻu tamā, ua e osofaʻia foʻi aʻu.’ E leai se isi o le a manatu e faapea e tasi le tagata lea o loo faatatau i ai le faamatalaga. Ae o le a malamalama, e māfana tele le faiā a le tamā ma le atalii.

Ua “tasi” foʻi Iesu ma lona Tamā o Ieova le Atua ona ua autasi i laʻua i fuafuaga, ma tapulaa. E lē pei Iesu o Satani le Tiapolo ma Atamu ma Eva, ona e lē fia tutoatasi o ia mai le Atua. Na faamatala mai e Iesu: “E lē faia e le Atalii se mea i lona lava loto, a o mea ua ia vaai i ai o loo faia e le Tamā. Auā o mea ua Ia faia, ua faapena foʻi ona faia e le Atalii.”—Ioane 5:19; 14:10; 17:8.

Peitaʻi, e lē avea le autasi o le Atua ma lona Alo o Iesu ma mea e lē iloa ai le eseesega o i laʻua. E iai o la uiga e eseese ai. E ese lagona ma manatu o Iesu ma e mafai ona ia filifili mo ia lava, ma na ia filifili e fai le finagalo o lona Tamā. Na fetalai Iesu e tusa ai ma le Luka 22:42: “E lē o loʻu loto, ae ia faia lou finagalo.” E leai se uiga o na upu pe ana faapea o i laʻua o le tino e tasi. Afai e moni e tasi le tino o Iesu ma lona Tamā, aiseā la na ia tatalo ai i le Atua ma taʻua ma le lotomaulalo lona lē iloa o mea e na o lona Tamā e na te silafia?—Mataio 24:36.

I le tele o lotu, o loo tapuaʻia e tagata atua e feʻainaʻi ma tauaʻimisa ma sui o o latou aiga. O se faataʻitaʻiga, i talatuu Eleni, na faatoʻilalo e le atua o Cronus lona tamā o Uranus, ma na nofo ma toe ʻai lana fanau. Ua eseese mamao lea mai le autasi o Ieova le Atua ma lona Alo o Iesu, lea e faavae i le alofa! Ma o lo la autasi lea ua pele ai i laʻua iā i tatou! O le mea moni, e lē mafaatusalia le faaeaga ua iā i tatou o le autasi lea ma Ieova ma Iesu, o ē e silisili i le vateatea aoao. Na taʻua e Iesu ona soo i lana tatalo e faapea: “Ua ou talosaga atu . . . ina ia tasi i latou uma e pei o oe le Tamā e autasi ma aʻu, o aʻu foʻi e autasi ma oe, ina ia autasi foʻi i latou ma i taʻua.”—Ioane 17:20, 21.

O lea, ina ua fetalai Iesu, “E tasi i maʻua ma le Tamā,” e lē o uiga lana fetalaiga i se Tasitolu e faigatā ona malamalama i ai, ae o loo faatatau i le autasi po o le faiā e sili ona māfana ma lona Tamā.