Ia Mafuta Atu i le Atua

O se Faamasino e Faia Pea le Mea e Tonu

Numera 20:2-13

E ONO faia e faamasino faaletagata ni faaiʻuga e lē tonu ma lē alofa, ae e lē faapena Ieova le Atua o lē ‘fiafia i le faamasinotonu.’ (Salamo 37:28) E faapalepale o ia ae e lē faatuutuu i le mea sesē. E na te faia pea le mea ua tonu. Seʻi mātau le auala na ia taulimaina ai se mea na tupu ai le finau ma le fouvale, o loo i le Numera mataupu e 20.

Ina ua lata i le faaiʻuga o le faigamalaga a Isaraelu i le vao, na lē lava le vai mo tagata. * Na finau atu tagata iā Mose ma Arona e faapea: “Se a ea le mea ua oulua au mai ai le faapotopotoga a Ieova i lenei vao, ina ia oti ai o i matou, atoa foʻi ma a matou manu?” (Fuai. 4) Na faitio tagata e faapea o le vao o se nofoaga “leaga” e lē maua ai ni “mati, po o vine, po o rimoni,” o fualaau ʻaina na sa aumai e ē na ō faalilolilo e mataʻi le Nuu o le Folafolaga, ma e “leai foʻi ni vai e inu ai.” (Fuai. 5; Numera 13:23) E tusa ua latou tuuaʻia Mose ma Arona, ona e lē pei le vao o le laufanua lauolaola lea na lē fia ulu i ai le tupulaga na muamua atu o ē na faitio!

Na talia e Ieova le manaʻoga o ē muimui. Ma e tolu mea na ia faatonuina Mose e fai, ia ave lona tootoo, ia aofaʻi mai tagata, ma “tautala atu i le papa i o latou luma, ona foaʻiina mai ai lea e ia o lona vai.” (Fuai. 8) Na usitaia e Mose mea muamua e lua, ae e leʻi usitai o ia i le mea lona tolu. E leʻi tautala o ia i le papa ma le faatuatua, ae na tautala atu ma le ita i tagata e faapea: “Ina faalogologo mai ia o outou ē ua fouvale; ma te faatafeina mai ea le vai ai lenei papa mo outou?” (Fuai. 10; Salamo 106:32, 33) Na tā faalua e Mose le papa i lona tootoo ona “tafe tele mai ai lea o le vai.”—Fuai. 11.

Na faia e Mose ma Arona se agasala matuiā. Na fetalai atu le Atua iā i laʻua: “Ua oulua fouvale i laʻu upu.” (Numera 20:24) Ona o le tetee i faatonuga a le Atua, na fouvale ai Mose ma Arona, o le mea na la tuuaʻia ai tagata. Na manino le faamasinoga a Ieova: E lē taʻitaʻia e Mose ma Arona le fanauga a Isaraelu i le Nuu o le Folafolaga. Pe na mamafa tele lenā faasalaga? E leai, ona o māfuaaga nei.

Muamua, e leʻi fetalai atu le Atua iā Mose e tautala i tagata, pe faamasinoina le ʻaufouvale. Lona lua, e leʻi faamamaluina e Mose ma Arona le Atua. Na fetalai le Atua: “Na oulua lē . . . faapaiaina ai aʻu.” (Fuai. 12) I le faapea atu o Mose, “ma te faatafeina mai ea le vai,” sa foliga mai o laʻua na faia le vavega ae lē o le Atua. Lona tolu, na talafeagai ma isi faaiʻuga na faia muamua e le Atua. E leʻi faatagaina e le Atua le tupulaga muamua o tagata fouvale e ulu atu i Kanana, ma e tutusa foʻi ma lana faaiʻuga ua faia iā Mose ma Arona. (Numera 14:22, 23) Lona fā, o Mose ma Arona o ni taʻitaʻi o Isaraelu. O ē ua iai tofiga e tele, e tele mea e tāpā e le Atua mai iā i latou.—Luka 12:48.

E faia pea e Ieova le mea e tonu. E lē taitai ona faia e Ieova se faaiʻuga lē tonu, auā e fiafia o ia i le faamasinotonu. Ua tatau ma onomea ona tatou faatuatuaina ma faaaloalogia lenā Faamasino.

[Faaopoopoga i lalo]