Po o Folafola Mai e le Atua iā te Oe ni ʻOa?

‘E manaʻo le Atua ia e mauʻoa—ia tele ni taavale, ma se pisinisi e ola. Ia tau lava ina talitonu iā te ia, tatala lau ato tupe, ma foaʻi atu iā te ia mea uma e te maua’

O LE feʻau lenā o loo faatāuaina e nisi o lotu i Pasili, e tusa ai ma se nusipepa na lomia i inā. O se feʻau ua manatu mamafa i ai le toʻatele o tagata. E tusa ai ma se palota na faia e tagata i le Iunaite Setete o ē ua faapea mai o Kerisiano, na lipotia mai e le mekasini o le Time: “E 61 pasene e talitonu e manaʻo le Atua ia mauʻoa tagata. Ma e 31 pasene . . . e ioe, afai e te avatu i le Atua au tupe, o le a foaʻi mai e le Atua iā te oe nisi tupe se tele.”

O talitonuga faapenei, e masani ona taʻua, o talitonuga i le vave ona tamaoaiga, aemaise lava i atunuu i Amerika Latina e pei o Pasili, ma ua lolofi atu tagata i lotu e latou te folafola mai ni faamanuiaga faaletino mai le Atua. Ae po o folafola moni mai e le Atua ni ʻoa iā i latou o loo auauna iā te ia? Pe na tamaoaiga auauna uma a le Atua i aso ua mavae?

E masani ona tatou faitau i tusitusiga Eperu, e fesootaʻi faamanuiaga a le Atua ma le mauaina o mea faitino. O se faaaʻoaʻoga, i le Teuteronome 8:18, ua tatou faitau ai e faapea: “Ia e manatu iā Ieova lou Atua, auā o ia na te avatua iā te oe le malosi e maua mai ai oloa.” O le faamautinoaga lenei na avatu i tagata Isaraelu, afai e latou te usiusitaʻi i le Atua, ona avea lea o i latou ma nuu e faamanuiaina.

Ae faapefea tagata taʻitoʻatasi? Na matuā tamaoaiga lava le tagata faatuatua o Iopu, ma ina ua faamativaina o ia e Satani, na toe faafoʻisia e Ieova ana oloa “ua lua mea i mea uma na muaʻi iā te ia.” (Iopu 1:3; 42:10) Sa mauʻoa foʻi Aperaamo. Ua faapea mai le Kenese 13:2, sa “mauʻoa tele lava Aperaamo i manu, ma ario, ma auro.” Ina ua puʻea Lota le atalii o le uso o Aperaamo, e ʻautau a tupu e toʻafā o malo mai Sasaʻe, ‘sa saunia e Aperaamo ona tagata ua aʻoaʻoina, o ē na fananau i lona aiga, e toʻatolu selau ma le toʻasefulu ma le toʻavalu.’ (Kenese 14:14) E toʻa 318 “tagata ua aʻoaʻoina” e mafai ona faaaogāina auupega, e lē taumatea la le matuā toʻatele lava o le aiga o Aperaamo. Ona o le mafai ona ia tausia o sea aiga e matuā toʻatele, ua faaalia ai o ia o se tagata e matuā mauʻoa i lafumanu.

Ioe, o le toʻatele o auauna faamaoni a le Atua i aso ua mavae, e pei o Aperaamo, Isaako, Iakopo, Tavita, ma Solomona, ua na o ni nai tagata na ua taʻua sa mauoloa. Ae peitaʻi, po o le uiga o lenei mea, o le a faatamaoaiga e le Atua i latou uma e auauna atu iā te ia? I le isi itu, pe e avea le mativa o se tasi ma mea e faapea ai, e na te lē o maua le faamanuiaga a le Atua? O le a talanoaina nei fesili i le mataupu o loo sosoo mai.