Po o Tupe o le Puna o le Fiafia Moni?

NA FANAU Sonia i Sepania. A o laʻitiiti, sa auai o ia ma lona tinā i sauniga a Molimau a Ieova. Ae ina ua matua, sa siitia atu o ia i Lonetona i Egelani, ma oo ai ina faigaluega i se pisinisi tautupe.

Sa fiafia Sonia i lana galuega. Sa tele ana tupe na maua ai, ma sa tele foʻi tupe na maua e tagata na iai o latou sea i lea pisinisi. O se galuega sa fiafia ma taulau manuia ai o ia. E masani ona faigaluega Sonia i le 18 itula i le aso, ma i nisi pō, e na o le tasi pe lua itula e moe ai. O lona olaga atoa sa faaautū i lana galuega. Ae na faafuaseʻi lava ona suia mea uma, ina ua pē le isi itu o lona tino—ai ona o lona olaga pisi na iai. Sa na o le 30 ona tausaga.

Na pē le isi itu o le tino o Sonia, ma e leʻi mautinoa e fomaʻi pe e toe lelei lana tautala. Na malaga atu loa lona tinā i Egelani e tausi o ia. Ina ua amata ona toe savali Sonia, ona fai atu lea o lona tinā iā te ia, “O lea o le a ou alu i le sauniga a le faapotopotoga, ma e tatau ona ta ō auā e lē mafai ona ou tuua na o oe.” Sa ioe Sonia e alu. O le ā na iʻu i ai?

Ua manatua e Sonia e faapea, “E moni mea uma na ou faalogo i ai. E ese le manaia. Sa ou fiafia e talia se talanoaga faale-Tusi Paia ma se tasi o le toʻatele o i latou na ō mai e faafeiloaʻi aʻu, i le taimi muamua na ou alu ai i le Maota mo Sauniga. Ua lē o toe asiasi mai iā te aʻu i latou na ou masani ai, ae o aʻu uō fou, na māfana ma alolofa mai iā te aʻu.”

Na faasolosolo ina toe lelei le tautala a Sonia, ma na vave foʻi ona agaʻigaʻi i luma faaleagaga. E leʻi atoa se tausaga ae papatiso loa o ia. O le toʻatele o ana uō fou, e auai i le talaʻiga faa-Kerisiano faataimi atoa, ma sa ia vaaia lo latou fiafia. Sa manatu Sonia, ʻOu te fia faapena foʻi, ua ou manaʻo e avatu iā Ieova le mea aupito sili ou te mafaia!’ Ua auauna nei Sonia faataimi atoa i le talaʻiga.

O le ā na aʻoaʻoina e Sonia mai i le mea na oo iā te ia? “E ui sa tele ni tupe na ou maua, ae o le mafatia ma le lē saogalemu i le galuega, na ou popole ai ma lē fiafia. Ua ou iloa, o le mea e aupito sili ona tāua o le olaga, o le iai lea o se faiā lelei ma loʻu Tamā o i le lagi, o Ieova. I le taimi nei, ua ou matuā fiafia lava.”

Na tusi le aposetolo o Paulo e faapea, ‘O le manaʻo tele i tupe o le pogai lea o mea leaga eseese uma. O le manaʻo tele i ai, ua ō ese ai nisi mai le faatuatua, ma tuia ai i latou e i latou lava i le tele o tigā.’ (1 Timoteo 6:10) E faamaonia e Sonia le moni o nei upu.