Le Vatican Codex—Aiseā ua Avea ai ma ʻOa Tāua?

E TELE mea tāua o loo iai i le Vatikana. O ata, o faatagata ua vaneina, ma le auala ua fauina ai fale, ua avea ma mea tāua ona o le matagofie tele. Ae e faitau selau tausaga o taofia le oo atu i le mea o loo iai se ʻoa tāua tele. I le Faletusi a le Vatikana, o loo iai se manusikulipi tāua tele, e tatou te malamalama atili ai i vaega o le Afioga a le Atua, lea na tusia i le faitau afe o tausaga ua mavae. Ua taʻua o le Vatican Codex. *

O isi uluaʻi manusikulipi e lua o le Tusi Paia, o le Alexandrine ma le Sinaitic, ua matuā faatāuaina e tagata atamamai, ona o loo iai ni talaaga mataʻina i le auala na maua ma faasaoina ai mai le faatamaʻiaga. I le isi itu, e lē o tele se mea o iloa e faatatau i le amataga mai o le Vatican Codex.

Se ʻOa sa Natia

O fea la na tupuga mai ai le Vatican Codex? O le uluaʻi faamatalaga e faatatau i lea tusi, na maua i le lisi o tusi i le Faletusi o le Vatikana i le senituri lona 15. Na manatu le ʻau atamamai atonu na faia mai i Aikupito, Kaisareia, po o Roma. Ae ina ua uma ona fefuafuataʻi nei manatu, na faapea mai le polofesa o J. Neville Birdsall, o le Iunivesite o Birmingham, i Egelani: “Pe a faapuupuu, e tatou te lē o mautinoa le aso tonu ma le nofoaga na uluaʻi tusia ai le Codex Vaticanus, ma e ui i taumafaiga atamai na faia, ae sa lē mafai lava ona iloa lona talaaga a o lumanaʻi le senituri lona sefululima.” E ui i lea, ua taʻua le Vatican Codex o se tasi o manusikulipi e sili ona tāua o le Tusi Paia. Aiseā?

I le tele o senituri, na iai ni mea sesē na faia e nisi o ē na toe siiina le Tusi Paia. O le luʻi mo tagata faaliliu na mananaʻo e faaliliu mai i se faaliliuga e sili ona saʻo, o le mauaina lea o ni manusikulipi e maufaatuatuaina o loo taʻua ai mea na tusia i uluaʻi tusitusiga. Seʻi manatu la i le naunau o tagata atamamai e suʻesuʻe le Vatican Codex, o se manusikulipi Eleni na tusia mai le senituri lona fā T.A., e itiiti ifo i le 300 tausaga talu ona māeʻa le tusiaina o le Tusi Paia! O lenei tusi o loo iai atoa Tusitusiga Eperu ma Tusitusiga Kerisiano Eleni, seʻi vaganā ai ni nai vaega na leiloloa a o faagasolo taimi.

Sa umi se taimi o faatalatū le pulega a le Vatikana e maua e tagata atamamai o le Tusi Paia se avanoa e vāai ai i le Codex. Na taʻua e se tagata iloga i mea tau tusitusiga e igoa iā Sir Frederic Kenyon e faapea: “I le 1843, ina ua mavae ona faatalitali mo ni nai masina, na faataga ai le [tagata faitofā o le Tusi Paia o Konstantin von] Tischendorf, e vaai i le manusikulipi mo le ono itula. . . . I le 1845, na faataga ai foʻi se isi tagata e sili ona atamai o Peretania e igoa iā Tregelles, ina ia vaai i le manusikulipi, ae e lē mafai ona ia kopiina se upu.” Sa talosaga Tischendorf e toe fia vaai i le manusikulipi, ae sa lē faatagaina, ona na ia kopiina ni itulau se 20. Peitaʻi, e pei ona lipotia e Kenyon, “na toe talosaga foʻi ma faataga ai loa o ia mo aso e ono e suʻesuʻeina ai le manusikulipi, lea na tusa ma le sefulu fā aso e taʻi tolu itula i le aso e tasi; ma e ala i le faaaogā tatau o lona taimi, na mafai ai e Tischendorf ona lomia le lomiga e sili ona lelei  o le manusikulipi i le 1867, lea o le a maua.” Na mulimuli ane maua e le Vatikana se kopi o le manusikulipi e sili atu ona lelei.

“Malupuipuia Lelei”

O le ā le ituaiga o manusikulipi na manino mai i le Vatican Codex? Ua taʻua i le tusi, The Oxford Illustrated History of the Bible e faapea, “o loo faaalia ai le tausisi i le auala e sipela ai upu, le saʻo ona kopiina, ma le lelei o le auala na toe faia ai ma le faaeteete lenei lomiga.” Ua faaauau mai le faamatalaga a lenei tusi: “Ua talafeagai ai la ona faapea atu, o lenei lomiga o se galuega e matuā atamai le auala na kopiina mai ai.”

O tagata iloga atamamai e toʻalua na maofa i le lelei o le auala na tusia ai le Vatican Codex, o B. F. Westcott ma F.J.A. Hort. Sa tatalaina i le 1881 le la tusi o le, New Testament in the Original Greek, ma na faavae mai i manusikulipi o le Vatican ma le Sinaitic. O loo avea pea lea tusi ma lomiga autū mo isi faaliliuga i aso nei o Tusitusiga Kerisiano Eleni, e aofia ai le lomiga, The Emphasised Bible a J. B. Rotherham, ma le New World Translation.

Ae peitaʻi, na manatu nisi o tagata faitio e faapea, ua tuu sesē le faatuatuaga o Westcott ma Hort i le Vatican Codex. Pe na saʻo ona faaliliuina le manusikulipi mai i le uluaʻi lomiga na iai? O le lomiga o le Bodmer lea na tusia i paʻu o laau i le va o le 1956 ma le 1961, na faagaeetia ai tagata atamamai ona na aofia ai vaega o le tusi a Luka ma le tusi a Ioane, mai le amataga o le senituri lona tolu T.A. Pe na lagolagoina e nei tusitusiga manatu na mulimuli ane lomia i le Vatican Codex?

Na tusia e Philip B. Payne ma Paul Canart i le Novum Testamentum e faapea: “E iai se mea mataʻina e talitutusa ai le Vaticanus ma le tusi o le Bodmer o loo iai. Pe a fua i le tulaga talitutusa o nei lomiga, ua talafeagai ai ona faapea atu, na kopi mai e le tagata na uluaʻi tusia le Vaticanus se manusikulipi e talitutusa ma le Bodmer. O lea la, atonu na kopi mai e lē na tusia le Vaticanus se manusikulipi ua tuai lava, po o se manusikulipi na faavae mai i se manusikulipi tuai.” Na taʻua e le polofesa o Birdsall e faapea: “O nei manusikulipi e lua e fesootaʻi vavalalata le tasi i le isi. . . . [O le Codex] o se lomiga na kopiina ma le faaeteete: o le auala na faatonutonu ai ua iloa ai na malupuipuia lelei mea na tusia ai.”

Ua Aogā i Tagata Faaliliu

O le mea moni, e lē faapea a aupito i tuai le manusikulipi, ona faapea ai lea o le manusikulipi lea ua sili ona pipii atu i le uluaʻi faaliliuga na iai. Ae peitaʻi, o le faatusatusa o le Vatican Codex ma isi manusikulipi, ua fesoasoani tele i tagata atamamai e iloa ai mea sa tusia i le uluaʻi faaliliuga. O se faataʻitaʻiga, e lē o iai i le vaega lea e totoe o le manusikulipi o le Sinaitic, lea foʻi na tusia i le senituri lona fā T.A., le tele o tusi mai le Kenese seʻia oo i le 1 Nofoaʻiga a Tupu. Ae o le iai o ia tusi i le Vatican Codex, ua fesoasoani e faamaonia ai, o nei tusi ua aofia i tusi ua faamaonia e le Tusi Paia.

E tusa ai o le tusi, The Oxford Illustrated History of the Bible, na taʻua e faapea, “o vaega ia o loo faasino atu iā Keriso o se peresona ma faasino atu i le Tasitolu paia,” sa sili ona tele ai feteenaʻiga i le va o tagata atamamai. Na faapefea ona fesoasoani le Vatican Codex e faamanino nei vaega?

Manatu i se faataʻitaʻiga. E pei ona faamauina i le Ioane 3:13, na fetalai Iesu: “E leai foʻi se tasi na alu aʻe i le lagi, e na o lē na alu ifo mai le lagi, o le Atalii lea o le tagata.” Ua faaopoopo i ai e nisi o tagata faaliliu le upu “o lē o loo i le lagi.” Ua taʻu mai ai e na upu faaopoopo, sa iai Iesu i le lagi ma le lalolagi i le taimi e tasi—o se manatu o loo lagolagoina ai le talitonuga i le Tasitolu. O loo iai na upu faaopoopo i nisi o manusikulipi mai i senituri lona lima ma le lona sefulu T.A. Ae ona na aveese e uluaʻi manusikulipi o le Vatican ma le Sinaitic, ua iʻu ai ina aveese e le toʻatele o tagata faaliliu i aso nei lea faaupuga. O lenei auala ua manino mai ai le tulaga o Keriso, ma ua ōgatusa lelei ma isi vaega uma o le Tusi Paia. Nai lo o le iai o Iesu i ni nofoaga se lua i le taimi e tasi, na maliu mai  Iesu mai le lagi, ma e leʻi umi ae toe afio atu i le lagi, ua “alu aʻe i” lona Tamā.—Ioane 20:17.

Ua fesoasoani mai foʻi le Vatican Codex iā i tatou ina ia malamalama lelei i fuaiupu e faatatau i fuafuaga a le Atua mo le lalolagi. Mātau mai se faataʻitaʻiga. E tusa ai ma le King James Version, na valoia ai e le aposetolo o Peteru e faapea, “o le lalolagi foʻi ma galuega o i ai e susunuina lava.” (2 Peteru 3:10) E faapena foʻi ona faitauina isi faaliliuga, e faavae i le Alexandrine Codex lea na tusia i le senituri lona lima, ma manusikulipi mulimuli ane ai. Ma ua manatu ai le toʻatele o tagata faitau faamaoni o le Tusi Paia, o le a faaumatia e le Atua le lalolagi.

Ae peitaʻi, pe tusa o le senituri a o leʻi tusia le Alexandrine Codex, na faamatala e le Vatican Codex (ma le Manusikulipi o le Sinaitic o loo iai i le taimi nei) le valoaga a Peteru e faapea, “e faaalia foʻi le lalolagi ma ana galuega.” Po o ōgatusa lenei manatu ma isi vaega uma o le Tusi Paia? Ioe! O le lalolagi faitino e “lē gaee e faavavau faavavau lava.” (Salamo 104:5) E faapefea la ona “faaalia” le lalolagi? Ua faaalia e isi mau e faapea, o le upu “lalolagi” e mafai ona faafaatusa lona faaaogāina. E mafai e “le lalolagi” ona tautala i se gagana ma usuina pese. (Kenese 11:1; Salamo 96:1) O lona uiga la, e mafai ona faasino atu le “lalolagi” i tagata, po o le sosaiete o tagata. Pe e lē o se faamāfanafanaga le iloaina, o le a lē faaumatia e le Atua lo tatou paneta, ae o le a ia faaalialia ma aumaia le iʻuga atoatoa i mea leaga, ma i latou o loo faia na mea?

“E Tumau Lea e Faavavau”

E faanoanoa, ona e faitau senituri o matuā lē faatagaina ona oo atu nisi i le mea na iai le Vatican Codex, ma sa masani ona faasesēina tagata faitau o le Tusi Paia, i le uiga moni o nisi o fuaitau o le Tusi Paia. Ae mai lava i le taimi na lomia ai, ua fesoasoani le Vatican Codex ma faaliliuga maufaatuatuaina o le Tusi Paia o loo iai i aso nei, i tagata o loo saʻilia le upu moni e aʻoaʻoina aʻoaʻoga moni a le Tusi Paia.

I manusikulipi a tagata na uluaʻi siiina mai isi manusikulipi, e masani ona latou faaaofia ai i totonu le faaupuga lenei: “O le lima na tusia [lenei] lomiga, ua liu efuefu i le tuugamau, ae o loo tumau pea mo le tele o tausaga mea ua tusia ai.” I aso nei, ua tatou talisapaia taumafaiga fitā a na tagata na siiina mai manusikulipi, ae e lē o iloa o latou igoa. O le faasaoina o le Tusi Paia, e sili ona viia ai Lē na faapogaia lona tusiaina, lea na faagaeeina lana perofeta i aso ua mavae e tusi e faapea: “E magumagu le mutia, e toʻulu le fuga; a o le afioga a lo tatou Atua, e tumau lea e faavavau.”—Isaia 40:8.

[Faaopoopoga i lalo]

[Pusa i le itulau 20]

Fuaina o le Taimi na Tusia ai Manusikulipi Anamua

E ui lava na faamauina e nisi o tagata na siiina manusikulipi le aso na māeʻa ai la latou galuega, ae o le tele o manusikulipi Eleni e lē o iai ni aso o tusia ai. E faapefea la ona iloa e tagata atamamai po o anafea na tusia ai se manusikulipi o le Tusi Paia? E pei lava ona iai le eseesega i gagana ma galuega taulima mai i lea tupulaga i le isi tupulaga, e faapena foʻi i le auala e tusitusi ai. O se faataʻitaʻiga, o mataʻitusi e tai pei a lapotopoto, lea e iloa i mataʻitusi lapopoʻa e faaofuofu ma tutusa lelei laina e tusia ai, sa faaaogā i le senituri lona fā ma faaauau mai ai mo le faitau selau o tausaga. O tagata atamamai na faatusatusaina manusikulipi na tusia i mataʻitusi e pei a lapotopoto e lē o taʻua se aso na tusia ai, ma tusitusiga o loo taʻua aso na tusia ai, ua mafai ona latou iloa lelei aso na tusia ai uluaʻi manusikulipi.

O le mea moni, e gata le aogā o lea auala. Na taʻua e le Polofesa o le Princeton Theological Seminary, o Bruce Metzger e faapea: “Talu ai e ono mafai ona tumau le auala e tusitusi ai se tagata i lona olaga atoa, e lē talafeagai la ona fuaina le aso na tusia ai le manusikulipi i se vaitaimi e itiiti ifo i le limasefulu tausaga.” E faavae i na iloiloga na faia ma le faaeteete, ua ioe ai tagata atamamai e faapea, na tusia le Vatican Codex i le senituri lona fā T.A.