Ia Aʻoaʻo Lau Fanau

Na Iloa e Semu le Leaga o Lalolagi Uma e Lua

O LE atalii o Noa o Semu, na sao mai le faaumatiaga o le tasi lalolagi ma oo atu ai i le isi lalolagi. O le ā le māfuaaga na faaumatia ai le lalolagi muamua lea na ola ai Semu, ma na faapefea ona sao o ia ma lona aiga?— * Seʻi o tatou talanoa i ai.

A o laʻitiiti Semu, ua faapea mai le Tusi Paia, sa “leaga tele lava tagata.” O mea uma na manatu i ai tagata “ua na ona leaga ia i aso uma lava.” E te iloa la le mea na faia e le Atua?— Na ia aumaia le lolo ma faaumatia ai lenā lalolagi leaga. Na tusi le aposetolo o Peteru: “Na oo ai le faaumatiaga i le lalolagi i lenā taimi, ina ua lofia i le vai.”—Kenese 6:5; 2 Peteru 3:6.

Po ua e iloa la le māfuaaga na faaumatia ai e le Atua lenā lalolagi?— Sa leaga tagata, ma o o latou manatu, “ua na ona leaga ia i aso uma lava.” Na taʻua e Iesu lea mea ina ua faapea mai: “A o leʻi oo i le lolo,” na “aai ma inu” tagata ma “faaipoipo alii ma tamaʻitaʻi.” Ona toe faapea mai lea o Iesu: “Latou te leʻi ano i ai seʻia oo mai le lolo ma tafiesea ai i latou uma.”—Mataio 24:37-39.

O le ā na lē ano i ai tagata?— O Noa le tamā o Semu, sa ia ‘talaʻia le amiotonu,’ ae e leʻi fia faalogo tagata iā te ia. Na usitai Noa i le Atua ma fau le vaa e mafai ona opeopea ina ia sao ai o ia ma lona aiga i le Lolo. E na o Noa ma lana avā ma ona atalii—o Semu, Hamo, ma Iafeta—ma a latou avā na faalogo i le mea na finagalo le Atua e latou te faia. A o isi tagata, na fai lava le mea na manaʻo ai le tagata ia, ma na tafiesea uma i latou i le Lolo.—2 Peteru 2:5; 1 Peteru 3:20.

Ina ua mavae le tausaga talu ona amata le Lolo ona ulufafo lea o Semu ma lona aiga mai le vaa. Ua faaumatia uma tagata leaga, ae e leʻi pine ae sui lea tulaga. O Kanana le atalii o Hamo le uso o Semu, na ia faia se mea leaga ma na faapea atu Noa: “E malaia Kanana.” Sa leaga foʻi Nimarota le atalii o le atalii o Hamo. Na tetee o ia i le Atua moni, o Ieova, ma faatonuina tagata e fau se olo maualuga e taʻu o Papelu ina ia taʻutaʻua ai i latou. Po o le  ā se lagona o Semu ma lona tamā i lea mea?—Kenese 9:25; 10:6-10; 11:4, 5.

Na faanoanoa i laʻua ma e faapena foʻi Ieova. Pe e te iloa le mea na faia e Ieova?— Na faafenumiaʻi e Ieova gagana a tagata ina ia lē femalamalamaaʻi. Sa lē mafai ai e tagata ona faaauau le galuega, ae taape atu i isi nofoaga faatasi ma ē e tutusa a latou gagana. (Kenese 11:6-9) Ae e leʻi suia e le Atua le gagana a Semu ma lona aiga, ma sa mafai ai ona latou nonofo faatasi ma fesoasoani le tasi i le isi e auauna i le Atua. Pe e te iloa o le ā le umi na auauna ai Semu iā Ieova?—

E 600 tausaga o le soifuaga o Semu. E 98 tausaga o Semu a o leʻi oo le Lolo ma na faaopoopo le isi 502 mulimuli ane. Sa fesoasoani o ia iā Noa e fau le vaa ma lapataʻia tagata i le oo mai o le Lolo. Ina ua mavae le Lolo, o ā mea a Semu na fai i le sili atu ma le 500 tausaga na ola ai?— Na taʻua e Noa Ieova o “le Atua o Semu.” E lē taumatea na faaauau pea ona ia auauna iā Ieova ma fesoasoani i tagata o lona aiga e faia faapea. Mulimuli ane, na tupuga mai Aperaamo, Sara, ma Isaako i le gafa o Semu.—Kenese 9:26; 11:10-31; 21:1-3.

Seʻi toe mafaufau i le lalolagi lea ua iai nei, ua faateleina le leaga talu mai aso o Semu. O le ā le mea o le a tupu i le lalolagi?— Ua faapea mai le Tusi Paia, o le a “mavae atu.” Ae mātau mai: “A o lē e faia le finagalo o le Atua e tumau e faavavau.” O lea, afai e tatou te faia le finagalo o le Atua, o le a tatou iai faatasi ma ē e faasaoina i le lalolagi fou. Ma o le a fesoasoani mai le Atua ina ia mafai ona tatou ola fiafia e faavavau i le lalolagi!—1 Ioane 2:17; Salamo 37:29; Isaia 65:17.

[Faaopoopoga i lalo]

Fesili:

○ O le ā le lalolagi na ola muamua ai Semu, ma o ā māfuaaga e lua na faaumatia ai e le Atua?

○ O le ā le umi na ola ai Semu, ma e faapeʻī ona uiga?

○ O le ā ua lē pine ae tupu i lenei lalolagi?

○ O le ā e ao ona tatou faia ina ia faasaoina ai i le iʻuga o lenei lalolagi?