O le ā e Mana‘omia e Ieova Mai iā i Tatou?
Ia Mafuta Atu i le Atua
O le ā e Manaʻomia e Ieova Mai iā i Tatou?
O NISI taimi, e lē faigofie ai le filifiliga pe usitai pe leai. E usitai tagata i se pule e sauā ma soona tagisā, ae e fai ma le musuā. Ae e fiafia tagata tapuaʻi o Ieova le Atua e usiusitai iā te ia. Aiseā? Seʻi o tatou iloiloina upu a Mose o loo i le Teuteronome 10:12, 13. *
Na taʻua e Mose mea ua manaʻomia e le Atua ina ua ia lāgā se fesili faatupu manatu e faapea: “Se ā se mea e finagalo i ai Ieova lou Atua iā te oe?” (Fuaiupu 12) E i le Atua le aiā e tāpā mai ai iā i tatou so o se mea e finagalo i ai. Auā o ia o le Alii Pule Silisili Ese, ma le Puna o le ola ma Lē e faatumauina. (Salamo 36:9; Isaia 33:22) O se mea tatau lo tatou usitaia o Ieova. Peitaʻi, e lē fiafia o ia pe a fosi lo tatou usitai atu. O le ā e manaʻomia e le Atua mai iā i tatou? Ia tatou ‘usiusitai mai i o tatou loto.’—Roma 6:17.
O le ā e uunaʻia i tatou ia usitai ma le fiafia i le Atua? E iai se vala na taʻua e Mose e faapea: “Ia e mataʻu iā Ieova lou Atua.” * (Fuaiupu 12) E lē o se mataʻu ona o le fefe i āuga leaga, ae o se mataʻu tatau ma le faaaloalo i le Atua ma ona ala. Pe a iā i tatou le mataʻu i le Atua, o le a tatou lē faia se mea e lē fiafia i ai o ia.
O le ā le uunaʻiga sili e tatou te usitaia ai le Atua? Ua faapea mai Mose: ‘Ia e alofa iā te ia, ma auauna iā Ieova lou Atua ma lou loto atoa ma lou agaga atoa.’ (Fuaiupu 12) O le alofa i le Atua, e lē na o faalogona e aofia ai. Ua taʻua i se tasi tusi e faapea: “O veape Eperu mo faalogona, e faasino atu i nisi taimi i gaoioiga e māfua mai i na faalogona.” Ua faapea mai lenā lava tusi, o le uiga o le alofa i le Atua, o le “gaoioi ma le alofa” iā te ia. O lona uiga, afai e tatou te alolofa moni i le Atua, o le a tatou gaoioi pea i auala e tatou te iloa e fiafia ai o ia.—Faataoto 27:11.
O le ā le tele e ao ona tatou usitaia ai le Atua? Ua faapea mai Mose: “Ia e savali i ona ala uma lava.” (Fuaiupu 12) E finagalo Ieova ia tatou faia mea uma e na te manaʻomia mai iā i tatou. Pe e feteenaʻi lenā tulaga ma lo tatou lelei? E leai.
E faamanuiaina i tatou pe a tatou usitai ma le fiafia. Na tusi Mose e faapea: “Ia e tausiusi i poloaʻiga . . . ou te fai atu ai iā te oe i le aso nei, ina ia manuia ai oe.” (Fuaiupu 13) Ioe, o poloaʻiga uma a Ieova, po o mea ua ia faafinagaloina, e mo lo tatou lelei. Aiseā e moni ai lenā manatu? Ua faapea mai le Tusi Paia: “O le Atua o le alofa lava ia.” (1 Ioane 4:8) O lea, na o poloaʻiga e aogā mo lo tatou lelei e faavavau ua ia tuuina mai. (Isaia 48:17) O lo tatou fai o mea uma e manaʻomia e le Atua, o le a faaitiitia ai faanoanoaga i le taimi nei, ma maua ai faamanuiaga e faavavau i le pulega a lona Malo i le lumanaʻi. *
Pe a oo i mea e manaʻomia e le Atua mai iā i tatou, e na o le tasi lava le filifiliga atamai e ao ona fai. E sili le usiusitai ma le fiafia i taimi uma. O le faamaoni e faia faapea, o le a atili ai ona tatou mafuta atu iā Ieova le Atua alofa, o lē e finagalo ia tatou maua le mea e sili ona lelei.
[Faaopoopoga i lalo]
^ pala. 4 Na faatatau upu a Mose iā Isaraelu anamua, ae e aogā foʻi taʻiala o iai i so o se tagata i aso nei, o loo manaʻo e faafiafia le Atua.—Roma 15:4.
^ pala. 6 I le tusi atoa o Teuteronome, ua faamamafa ai e Mose e faapea, o le mataʻu i le Atua, o se taʻiala e ao ona taʻitaʻia ai olaga o Ana auauna.—Teuteronome 4:10; 6:13, 24; 8:6; 13:4; 31:12, 13.
^ pala. 9 Mo nisi faamatalaga, tagaʻi i le mataupu e 3 o le tusi O ā Aʻoaʻoga Moni a le Tusi Paia? “O le ā le Finagalo o le Atua mo le Lalolagi?” ua lomia e Molimau a Ieova.