O le ā le Agaga Paia?

NA IAI se taimi na fesili ai Iesu i ona soo: “O ai se tamā o iā te outou e ōle mai lona atalii iā te ia mo se iʻa, ae ia avatu iā te ia se gata ae lē o se iʻa? Pe e ōle mai foʻi mo se fuāmoa, ae e avatu i ai se akarava?” (Luka 11:11, 12) Sa fiafia tamaiti o Kalilaia i fuāmoa ma iʻa; sa latou iloa lelei meaʻai e latou te fia aai ai.

Na fetalai Iesu e faapea, ia tatou ōle atu pea mo le agaga paia, e pei o se tamaitiiti o loo augani mai i le fiaʻai. (Luka 11:9, 13) O lo tatou iloa po o le ā le agaga paia, o le a malamalama ai i le tāua o le iai o le agaga paia iā i tatou. O lea la, seʻi o tatou iloilo muamua le aʻoaʻoga a le Tusi Paia e faatatau i le agaga paia.

“Mana o le Silisili Ese”

Ua faamanino mai i Tusitusiga Paia e faapea o le agaga paia, o se mana o loo faaaogā e le Atua e faatino ai lona finagalo. Na taʻu atu e le agelu o Kaperielu iā Maria o le a fanau sana tama e ui o ia o se taupou, ma faapea atu: “E iā te oe le agaga paia, ma e faamalumalu ifo iā te oe le mana o le Silisili Ese. O le mea lea e taʻua ai lē o le a fanau mai, e paia ma o le Alo o le Atua.” (Luka 1:35) E tusa ai ma upu a Kaperielu, e iai le sootaga o le agaga paia, ma le “mana o le Silisili Ese.”

O le manatu foʻi lenā o loo i isi vaega o le Tusi Paia. Na fai mai le perofeta o Mika: “Ua faatumuina aʻu i le mana e le Agaga o Ieova.” (Mika 3:8) Na folafola e Iesu i ona soo: “Ae e maua e outou le mana, pe a oo ifo iā te outou le agaga paia.” (Galuega 1:8) Ma na taʻua foʻi e le aposetolo o Paulo le “mana o le agaga paia.”—Roma 15:13, 19.

O lea la, o le ā ua tatou iloa mai i mea na taʻua? E iai le sootaga o le agaga paia, ma le  mana o le Atua. O le agaga paia o le auala lea e faagaoioi ai e Ieova lona mana. Pe a faafaigofie, o le agaga paia, o le mana o le Atua po o lona malosi galue. Maʻeu le ofoofogia o lenei malosi! E lē oo so tatou malamalama i le tele o le mana lea na manaʻomia e faia ai le vateatea aoao. Ua fautua mai Ieova e ala i le perofeta o Isaia, ia tatou manatunatu i lenei mea: “Seʻi tetepa aʻe i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau iā te i latou uma i o latou igoa; ona o le tele o lona malosi ma lona mana tele; e leai so latou e lē iloa.”—Isaia 40:26.

O lea la, ua faaalia mai e le Tusi Paia ua maopoopo ma sologa lelei le vateatea ona o le ‘tele o le malosi’ po o le mana o le Atua e ona le malosi uma lava. O lea, e tele naʻuā le  malosi galue o le Atua, ma e faalagolago i ai lo tatou ola pea.—Tagaʻi i le pusa  “Galuega a le Agaga Paia.”

E faaaogā e Ieova lona agaga paia i se galuega telē, e pei o le faia o le vateatea aoao. Peitaʻi, e na te faaaogā foʻi e fesoasoani ai i tagata. E tele faaaʻoaʻoga i le Tusi Paia i le auala na faamalosia ai e le Atua ana auauna i le lalolagi e ala i lona malosi galue.

“Ua i Oʻu Luga le Agaga o Ieova”

O le faiva a Iesu ua tatou maua ai se vaaiga mataʻina i le auala na faamalosia ai e le agaga o le Atua ana auauna. Na taʻu atu e Iesu i tagata Nasareta, “Ua i oʻu luga le agaga o Ieova.” (Luka 4:18) O le ā na faataunuuina e Iesu e ala i le “mana o le agaga”? (Luka 4:14) Na ia faamālōlōina maʻi eseese, faatoʻafilemu le sami, fafagaina le faitau afe o tagata i nai falaoa ma iʻa, ma toe faatutū mai ē na maliliu. Na taʻua e le aposetolo o Peteru Iesu o se ‘tagata na faailoa mai e le Atua e ala i galuega mamana ma mea ofoofogia, ma faailoga na faia e le Atua e ala iā te ia.’—Galuega 2:22.

E lē o faia e le agaga paia na vavega i le taimi nei. Peitaʻi, e mataʻina mea e mafai ona ia faia mo i tatou. Ua faamautinoa e Iesu i ona soo le fiafia o Ieova e foaʻi mai lona agaga paia i ona tagata tapuaʻi. (Luka 11:13) O lea ua faapea mai ai le aposetolo o Paulo: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Filipi 4:13) Pe e mafai ona aafia faapena lou olaga ona o le agaga paia? O le a talanoaina le tali i le mataupu o sosoo mai.

 [Pusa/Ata i le itulau 5]

Le Pogai e Faapea atu ai e Lē o se Peresona le Agaga Paia

O loo faatusa e le Tusi Paia le agaga paia i le vai. Ina ua folafola mai faamanuiaga mo le lumanaʻi i ona tagata, na fetalai mai le Atua: “Ou te liligi atu le vai i le nuu naumati, ma vaitafe i le eleele mātūtū; ou te liligi atu loʻu Agaga i luga o lau fanau, ma laʻu faamanuia i luga o ē tutupu mai iā te oe.”—Isaia 44:3.

Ina ua liligi ifo e le Atua lona agaga i luga o ana auauna, ona ‘tumu lea o i latou i le agaga paia,’ po ua ‘faatumuina i le agaga paia.’ Na potopoto faatasi Iesu, Ioane le Papatiso, Peteru, Paulo, Panapa, ma soo i le aso Penetekoso 33 T.A., ma na tutumu pe faatumuina i latou i le agaga paia.—Luka 1:15; 4:1; Galuega 4:8; 9:17; 11:22, 24; 13:9.

Seʻi manatu i le mea lenei: Pe e mafai ona “liligi” se tagata i luga o isi tagata? Pe e mafai ona “faatumuina” se vaega o tagata i se isi tagata? E lē talafeagai lenā mea. O loo faamatala e le Tusi Paia tagata ua faatumuina i le atamai, malamalama, po o le poto saʻo, ae e lē o faapea mai ua faatumu se tasi i se isi tagata.—Esoto 28:3; 1 Tupu 7:14; Luka 2:40; Kolose 1:9.

O le upu Eleni o le pneuʹma, ua faaliliuina i le “agaga,” o lona uiga, o se mana e lē vaaia. I le Expository Dictionary of New Testament Words a Vine, o le upu pneuʹma, “e faasino saʻo lava i le matagi . . . po o le mānava; ae faapitoa lava i le agaga lea e pei o le matagi e lē vaaia, e leai sona tino ae e malosi tele.”

O lea la, o le agaga paia, e lē o se tagata. *

[Faaopoopoga i lalo]

[Ē Ana le Ata]

Photodisc/SuperStock