O le Agaga Paia—Le Mana e Manaʻomia i Lou Olaga

“AUA e te lafoaʻiina aʻu i ou luma; aua foʻi e te aveeseina lou Agaga Paia iā te aʻu.” (Salamo 51:11) O le tatalo faatauanau lenā a le tupu o Tavita ina ua uma ona ia faia se sesē matuiā.

Sa masani ona tofo Tavita i le mana o le agaga paia i lona olaga. A o talavou o ia, sa mafai ai ona ia faatoʻilalo le fitafita mataʻutia o Koliata. (1 Samuelu 17:45-50) Sa mafai ai foʻi ona ia tusia nisi o salamo e sili ona matagofie ua fatuina. Na faapea mai Tavita: “O aʻu na fetalai ane ai le Agaga o Ieova; o lana afioga foʻi sa i loʻu laulaufaiva.”—2 Samuelu 23:2.

O Iesu lava na faamautinoa mai le galuega a le agaga paia i le olaga o Tavita. Na iai se taimi na taʻu atu ai e Iesu i lana ʻaufaalogologo e faapea: “E ala i le agaga paia, na faapea atu ai Tavita, ‘Ua fetalai atu Ieova i loʻu Alii: “Ia e nofo i loʻu itu taumatau seʻia oʻu tuuina ou fili i lalo o ou vae.”’” (Mareko 12:36; Salamo 110:1) Na silafia lelei e Iesu, na taʻitaʻia Tavita e le agaga paia ina ua tusia ana salamo. Po o mafai ona tatou  maua le fesoasoani mai i lenā agaga paia?

“Ia Talosaga Atu Pea, Ona Foaʻiina Mai ai Lea iā te Outou”

Ailoga a mafai ona e tusia se salamo. Ae atonu o le a e fesagaʻi ma faafitauli mataʻutia e pei ona fesagaʻi o Tavita ma Koliata. Seʻi mātau mai le tulaga o Isapela. * Na tiaʻi o ia e lana tane ona o se isi fafine talavou, ma sa iai se aitalafu telē, ae e aunoa ma se fesoasoani tautupe na maua e tausi ai le la fanau teine laiti e toʻalua. Na faapea mai o ia: “Na ou lagona ua ʻolegia aʻu ma agaleagaina. Ae peitaʻi, talu ona alu o ia, ou te lagona le lagolago mai pea o le agaga o le Atua.”

Pe na faafuaseʻi ona maua e Isapela le agaga paia? E leai, ae sa ōle atu o ia i le Atua i aso uma ina ia foaʻi mai lona agaga. Sa iloa e ia lona manaʻomia o le mana mai i le Atua ina ia lototele ai e feagai ma le lumanaʻi, ia tausi lelei lana fanau, ma faaleleia ona faalogona mafatia. Na usitaʻi o ia i upu a Iesu e faapea: “Ia talosaga atu pea, ona foaʻiina mai ai lea iā te outou. Ia saʻili atu pea, ona outou maua ai lea. Ia tuʻituʻi atu pea ona tatalaina mai ai lea iā te outou.”—Mataio 7:7.

Na iloa foʻi e Ropeti lona manaʻomia o le agaga o le Atua. O lana masani o le ulaula tapaa ma le mariuana. E lua tausaga o tauivi o ia e tuu, ae e leʻi mafai. Na faapea mai Ropeti: “A lē ulaina se tapaa po o se mariuana, ou te lagona le atuatuvale. O aso uma lava e tagi mai ai loʻu tino i le manaʻo i fualaau faasāina.”

Na fai mai atili Ropeti: “Ae sa ou manaʻo ia suia loʻu olaga ma auauna i le auala e fiafia ai le Atua. Na ou taumafai e faatumu loʻu mafaufau i manatu lelei mai i le Tusi Paia. Sa ou talosaga faatauanau i aso uma i le Atua e foaʻi mai le malosi ina ia ou ola mamā. Na ou iloa e lē mafai ona ou taulau i aʻu lava taumafaiga. Ma na ou iloa le tali mai o Ieova i aʻu tatalo, aemaise lava pe a ou lē taulau ma ou lotovaivai ai. Ou te talitonu ana lē seanoa le fesoasoani mai a le agaga paia o le Atua, e lē mafai ona tuu laʻu masaniga.”—Filipi 4:6-8.

Sii Aʻe “Apaʻau e Pei o Aeto”

E faitau miliona Molimau a Ieova ua tofo i le mana o le agaga paia i o latou olaga, e pei o Isapela ma Ropeti. E mafai ona e maua le mana galue o Ieova lea sa ia faaaogā e fai ai le vateatea, pe a e manaʻo ai. E finagalo ma naunau le Atua e foaʻi mai lona agaga, pe a e talosaga i ai. Ae ina ia e maua le agaga, e ao ona tatou suʻesuʻe le upu moni e uiga iā te ia, ma ia matuā saʻili e faia lona finagalo.—Isaia 55:6; Eperu 11:6.

O le a e maua le malosi e auauna ai i le Atua ma fesagaʻia ai luʻi e tulaʻi mai i le olaga e ala i le faamalosi mai o le mana o le agaga paia. Ua faamautinoa mai i le Tusi Paia e faapea: “Na te [Ieova] avatua le malosi i ē ua vaivai; o ē ua leai se malosi, na te faatuputele i ai le malosi. . . . A o ē faatalitali iā Ieova, e toe faafouina lo latou malosi; latou te sii aʻe apaʻau e pei o aeto; latou te femoʻei, a e lē vaivai; latou te savavali, a e lē tigāina.”—Isaia 40:28-31.

[Faaopoopoga i lalo]

[Faamatalaga faaopoopo i le itulau 8]

‘Sa ou talosaga faatauanau i aso uma i le Atua e foaʻi mai le malosi. Na ou iloa e lē mafai ona ou taulau i aʻu lava taumafaiga. Ma na ou iloa le tali mai o Ieova i aʻu tatalo’

 [Pusa/Ata i le itulau 7]

GALUEGA A LE AGAGA PAIA

Na faaaogā e le Atua le agaga paia e faia ai le lalolagi ma isi mea uma i le vateatea. “Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa. E te auina atu lou Agaga, ua faia ai i latou.”—Salamo 104:24, 30; Kenese 1:2; Iopu 33:4.

O le agaga paia na faagaeeina ai tagata amioatua e tusia le Tusi Paia. Na faapea mai le aposetolo o Paulo: “O Tusitusiga Paia uma e mai le agaga o le Atua, ma e aogā.” (2 Timoteo 3:16) O le upu Eleni lea ua faaliliuina, “mai le agaga o le Atua,” o lona uiga moni, ua “mānava i ai le Atua.” O le mānava a Ieova, po o lona agaga, na taʻitaʻia ai manatu o tusitala o le Tusi Paia ina ia tusia “afioga a le Atua.”—1 Tesalonia 2:13.

O le agaga paia na faamalosia ai auauna a le Atua e valoia ma le saʻo le lumanaʻi. Na faapea mai le aposetolo o Peteru: “E leai se valoaga o Tusitusiga Paia e tupuga mai i manatu o tagata. Auā e lē o loto o tagata na aumai ai valoaga, ae na tautatala tagata i mea na faailoa mai e le Atua e ala i le taʻitaʻiga a le agaga paia.”—2 Peteru 1:20, 21; Ioelu 2:28.

O le agaga paia na fesoasoani iā Iesu ma isi tagata faatuatua e talaʻi le tala lelei o le Malo o le Atua ma faia ai vavega. Na fetalai Iesu: “Ua i oʻu luga le agaga o Ieova, auā ua ia faauuina aʻu e folafola le tala lelei i ē matitiva, ma ia auina atu aʻu e talaʻi le saʻolotoga i ē ua saisaitia, ma ia toe pupula mata o ē tauaso.”—Luka 4:18; Mataio 12:28.

 [Pusa/Ata i le itulau 9]

AUALA E FESOASOANI MAI AI LE AGAGA PAIA

E mafai e le agaga paia ona faamalosia oe e tauivi ma manumalo i masaniga leaga. Na tusi le aposetolo o Paulo: “E faamaoni le Atua, ma e na te lē tuua outou i se faaosoosoga e sili atu nai lo o le mea tou te mafaia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.”—1 Korinito 10:13.

E mafai e le agaga paia ona fesoasoani ia e atiaʻe uiga e fiafia i ai le Atua. ‘O le fua o le agaga, o le alofa, olioli, filemu, faapalepale, agalelei, mataalofa, faatuatua, agamalu, ma le amio pulea.’—Kalatia 5:22, 23.

E mafai e le agaga paia ona faamalosia oe ia tumau i tofotofoga. “O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Filipi 4:13.