Pe e Talafeagai Taua ma le Faa-Kerisiano?

“O le ā le tapulaa tau amio ua solia e taua po ua avea ai foʻi ma agasala? O inei la ua iso ai.”—Oliver O’Donovan, polofesa o tapulaa i amioga Faakerisiano.

O SE ata e taʻua o le Sacrifice, na māfua ona o le Taua Muamua ma o loo faaali i le Fale Mataaga i Kanata, o loo faaalia ai ni fitafita ua fasia i le taua, o fitafita ua matuā vaivai mai le taua ma o latou aiga ina ua toe foʻi. I luga aʻe o le ata lea, o loo tautau ai le ata o Iesu Keriso o loo faasalaina i se koluse. Ua faateʻia nisi o tagata maimoa ona o Iesu, o le “Alii o le filemu,” o loo sosoo ma se vaaiga o ni taua. (Isaia 9:6) Ua fiafia nisi ona o faataulaga ua faia e o latou tagatānuu, ma manatu e faatalitalia e le Atua ma lona Alo ia Kerisiano e tau ina ia puipuia ai le saogalemu ma le saʻolotoga o lo latou malo.

Ua faitau senituri o lagolagoina e taʻitaʻi lotu ia faigātaua. I le tausaga e 417 T.A., na tusi ai se tagata poto i mataupu faalelotu o Augustine e faapea: “Aua e te manatu faapea, e leai se tasi e auauna o se fitafita, ma faaaogāina auupega i taua, e taliaina e le Atua. . . . O isi o loo tau ma fili e lē o vaaia mo outou e ala i le tatalo, a o outou o loo outou tau faasaga i tagata o nuu ese mo i latou.” I le senituri lona 13, na faamatala ai e Thomas Aquinas e faapea, “e tonu ma saʻo taua, o le mea tāua ia puipuia ai tagata matitiva ma le atunuu atoa mai faiga taufaalata a se fili.”

O le ā sou manatu? Pe a amata gaoioiga a se vaegaʻau mo se māfuaaga lelei, e puipuia ai le saʻolotoga o se atunuu po o le faasaʻoloto ai foʻi o tagata ua puapuagatia i faiga leaga—po o iai le faamanuia a le Atua i na tulaga? O ā “tapulaa tau amio” e liliu atu i ai Kerisiano ina ia iloa ai le finagalo o le Atua i lea mataupu?

Le Faaaʻoaʻoga a Iesu Keriso

Pe e mafai ona iloa le finagalo o le Atua i se mataupu faigatā e pei o faigātaua i aso nei? E iloa e le aposetolo luʻitau o loo tatou fesagaʻi: “ʻPo o ai na te iloa manatu o Ieova, e na te faatonu ai o ia?’ Ae ua tatou iloa manatu o Keriso.” (1 Korinito 2:16) Ina ia tatou iloa le mea e fai, na auina mai e Ieova Iesu i le lalolagi e avea ma o tatou Faaaʻoaʻo. O mea na fetalai i ai Iesu ma faia, e atagia mai ai le finagalo ma ala o Ieova. O lea la, o le ā na fetalai i ai Iesu e faatatau i faigātaua? O le ā lona tulaga i taua?

E foliga mai e leai se māfuaaga e sili ona tāua mo le faaaogāina o auupega e puipuia ai, nai lo le puipuia o le soifua ma le saogalemu o Iesu Keriso. Na faapena lagona o se tasi o ona aposetolo. Ina ua faalataina ma puʻea Iesu e ni tagata faaauupegaina i le vaeluapō,  “ua tago o ia [Peteru] i lana pelu ua seʻi, ma tā ai le pologa a le ositaulaga sili, ma tipiesea lona taliga.” Pe e saʻo le puipuia o Iesu e ala i se auupega? Na fetalai atu Iesu iā Peteru: “Ia toe sulu lau pelu i lona faamoega, auā o i latou uma e tago i le pelu, e faaumatia i le pelu.”—Mataio 26:47-52.

E lē o se mea e faateʻia ai le auala na tali atu ai Iesu. I le lua tausaga muamua atu, na ia fetalai: “Ua outou faalogo ua faapea mai le upu, ‘Ia e alofa atu i lē lua te tuaoi ae ʻinoʻino i lou fili.’ Ae ou te fai atu iā te outou: Ia alolofa atu pea i o outou fili ma tatalo mo ē ua sauāina outou; ina ia avea ai outou ma atalii o lo outou Tamā o i le lagi, o lē na te faaoso lona lā i ē amioleaga ma ē amiolelei, ma faatotō mai le timu i ē amiotonu ma ē amiolētonu.” (Mataio 5:43-45) Pe e talafeagai le manatu faapea, e mafai ona alofa ma tatalo se Kerisiano mo ona fili a o tau faasaga iā i latou?

Ua faaalia i talafaasolopito e tele fili o Kerisiano. O se faataʻitaʻiga, na faasalaina ma fasiotia e tagata Roma Iesu Keriso. E leʻi umi lava, o le tau ina faapea mai o se tasi o ia o se Kerisiano, sa avea o se agasala mamafa. Na silafia e Iesu o le a tofotofoina Kerisiano e faaaogā auupega ma fouvale faasaga i faiga leaga a Roma, e pei ona sa faia e nisi o tagata Iutaia. O lea na ia taʻua ai e faatatau i ona soo e faapea: “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioane 17:16) E filifili Kerisiano e leai sa latou vaega fai i faiga faapolotiki. E leai ni faiga lē tonu pe taufaafefe iā i latou po o le atunuu o loo latou nonofo ai, e taʻutonuina ai le faia o sa latou vaega i gaoioiga faafitafita

O Ē e Lagolagoina le Malo o le Atua

E lagolagoina e Kerisiano moni mea e finagalo i ai Iesu, ma e leai sa latou vaega fai i faiga faapolotiki. Seʻi manatu i le mea na tupu i Ikonio, o se aai anamua i Asia Itiiti. “Ona taupulepule lea o tagata o nuu ese ma Iutaia atoa ma o latou taʻitaʻi, ina ia sauāina [Paulo ma Panapa] ma fetogi i laʻua i maa, ma ina ua la iloa lenei mea, ona la sosola ai lea i aai o Lukaonia, o Lusa, o Teipe, ma nuu tuaoi; ma ua la folafola atu ai pea le tala lelei i inā.” (Galuega 14:5-7) Seʻi mātau, ina ua fesagaʻi ma teteega ogaoga, e leʻi faaaogāina e Kerisiano ni auupega pe toe taui atu. Nai lo lea, sa faaauau pea ona latou talaʻi atu “le tala lelei.” O le ā le tala lelei sa latou talaʻia?

 Sa talaʻia e Kerisiano le feʻau lea foʻi sa talaʻia e Iesu. Na ia fetalai e faapea: “E tatau ona ou folafola atu le tala lelei o le malo o le Atua.” (Luka 4:43) Sa lagolagoina e Iesu ma ono soo le Malo o le Atua. E leʻi faaaogāina e Keriso se vaegāau e puipuia ai lenā Malo. Na ia fetalai e faapea: “O loʻu malo e lē mai le lalolagi lenei. Ana mai le lalolagi nei loʻu malo, semanū ua tau aʻu auauna, ina neʻi tuuina atu aʻu i tagata Iutaia. A o lenei, e lē mai i inei loʻu malo.”—Ioane 18:36.

‘Ia Outou Fealofani’

O le leai o se vaega fai i taimi o faigātaua, o se faailoga lea o le tapuaʻiga moni. Na fetalai Iesu e faapea: “O le mea lea e iloa ai e tagata uma o oʻu soo outou, pe afai tou te fealofani.” (Ioane 13:35) E faitau miliona i latou ua latou iloa se vaega o loo faaalia lenā alofa, e ui lava o lo latou mumusu e faaaogā auupega, ua faifaia, faafalepuipuiina ma fasiotia ai i latou.

E tusa ma le 10,000 Molimau a Ieova na faafalepuipuiina e taʻitaʻi o le ʻau Nasi i Europa, e aofia ai le pe tusa o le 3,000 o i latou na avatu i nofoaga o faasalaga mamafa. Ae i le taimi e tasi, e silia i le 4,300 Molimau a Ieova i le Iunaite Setete na faafalepuipuiina ona o lo latou lē auai i vaegāau. E leʻi faaaogāina e Molimau i Siamani ma Amerika ni auupega e tau faasaga ai i o latou uso Kerisiano po o se isi lava tagata. E faapefea ona latou tau ae o loo faapea mai e alofa le tasi i le isi, ma alolofa i o latou uso a tagata?

O le toʻatele o tagata e manatu faapea e talafeagai gaoioiga faafitafita e avea ma auala e puipuia ai. Ae seʻi manatu foʻi: E ui lava na sauāina leaga Kerisiano i le uluaʻi senituri, ma mumusu e toe tau atu, ae na soifua pea. Sa lē mafai e le Emepaea malosi o Roma ona tafiesea le Faa-Kerisiano. O loo olaola Kerisiano moni e oo mai lava i aso nei, ma o loo faaauau ona latou lē auai i faigātaua. Nai lo o le toe tau atu, e latou te vāai atu ma le mautinoa i le Atua mo se fesoasoani. Ua taʻua i lana Afioga, le Tusi Paia e faapea: “Le ʻaupele e, aua tou te tauimasui, ae ia tuu atu i le toʻasā o le Atua; auā ua tusia: ʻO aʻu e faia le tauimasui; ou te taui atu lava, ua fetalai mai ai Ieova.’”—Roma 12:19.

[Pusa i le itulau 30]

TAUA NA FAAMANUIA E LE ATUA

O Isaraelu anamua, o se malo na filifilia patino e le Atua i le faitau senituri a o leʻi faavaea le Faa-Kerisiano, sa iai taimi na faatonuina ai e faapotopoto se ʻautau ma ō atu e tau. A o leʻi ulu atu i Kanana, le nuu na folafola atu e le Atua iā Aperaamo, na taʻu atu i tagata Isaraelu e faapea: “A tuuina mai [malo e fitu] iā te oe e Ieova lou Atua e te fasia i latou, ia e matuā faaumatia lava i latou, aua e te osi se feagaiga ma i latou, aua foʻi e te alofa iā te i latou.” (Teuteronome 7:1, 2) O lea na faatoʻilalo ai e le Taʻitaʻiʻau o Isaraelu o Iosua, ia na nuu “e pei ona poloaʻi mai ai Ieova le Atua o Isaraelu.”—Iosua 10:40.

Pe sa faatoʻilaloina ma le lē alofa e Isaraelu na nuu ese? E leai. Sa tele le ifo i tupua, faamasaatoto, ma feusuaʻiga matagā i na nuu. E oo lava i tamaiti na fasiotia ma susunu e fai ai taulaga. (Numera 33:52; Ieremia 7:31) O le paia, le faamasinotonu, ma le alofa o le Atua mo ona tagata, na uunaʻia ai o ia e aveesea mea lē mamā uma mai le nuu. Ua faapea foʻi ona saʻilia e Ieova loto o tagata uma—o se mea e lē mafai e se taʻitaʻiʻau ona fai i aso nei—ma faasaoina i latou ua lotomalilie e lafoaʻia ala leaga ae auauna atu iā te ia.

[Ata i le itulau 31]

Pe na faatalitalia e Iesu ona soo e tau ina ia puipuia o ia po o uso Kerisiano?

[Ata i le itulau 31]

Se vaega o Molimau a Ieova ina ua tatalaina mai i le nofoaga o faasalaga i Buchenwald i le 1945