E Mafai e le Tusi Paia Ona Suia Olaga

Aiseā na filifili ai se tauleʻaleʻa sa autū atu lona olaga i le tiʻetiʻe pasika, fualaau faasāina ma taaloga, ina ia avea ma faifeʻau faataimi atoa? O le ā na uunaʻia ai se tagata sa ola i taaloga faitupe, e lafoaʻi lana masaniga ae tausia lona aiga e ala i se galuega e talafeagai? O le ā na uunaʻia ai se tamaʻitaʻi talavou, sa ola aʻe o se Molimau a Ieova ae na ia lafoaʻia tapulaa o le Tusi Paia, ina ia toe iloilo le auala na ia ola ai? Seʻi o tatou iloilo faamatalaga a nei tagata.

FAAMATALAGA O LONA OLAGA

IGOA: TERRENCE J. O’BRIEN

TAUSAGA: 57

ATUNUU: AUSETALIA

TALAAGA: SA IA FAAAOGĀINA FUALAAU FAASĀINA, MA E FIAFIA E TIʻETIʻE PASIKA

O LOʻU OLAGA SA IAI:A o oʻu laʻitiiti sa ou ola aʻe i le aai pisi o Brisbane, le taulaga o Kuiniselani. O le matou aiga e Katoliko, ae ina ua valu oʻu tausaga, sa matou lē toe ō i le lotu ma ua lē toe talanoa foʻi e faatatau i lotu. Ina ua sefulu oʻu tausaga, sa siitia atu lo matou aiga i le Gold Coast i Ausetalia. Sa matou nonofo latalata i le matafaga, ma sa faaalu uluaʻi tausaga o loʻu talavou i le aau ma le faasee i galu.

Ae ui i lea, sa lē fiafia loʻu olaga a o oʻu laʻitiiti. Sa tuua e loʻu tamā lo matou aiga ina ua valu oʻu tausaga. Sa toe fai le isi toʻalua o loʻu tinā, ma sa avea le ʻava malosi ma taugāupu ma vaega masani o le olaga i lo matou aiga. I se tasi pō, ina ua uma se taugāupu mataʻutia i le va o oʻu mātua, sa ou saofaʻi i luga o loʻu moega ma tautō e faapea, pe afai ae ou faaipoipo, o le a lē taitai ona ma tau upu ma laʻu avā. E ui lava i faafitauli i totonu o lo matou aiga—lea e toʻaono tamaiti, tinā, ma lo matou tamāfai—ae sa matou māfana pea.

I tausaga mulimuli ane o loʻu talavou, o le toʻatele o aʻu aumea sa fouvale i ē e i le tulaga pule. Sa latou faaaogāina mariuana, tapaa, ma isi fualaau faasāina, ma sa latou faaaogāina sesē le ʻava malosi. Sa ou aafia ai foʻi ma aʻu i lenā olaga soonafai e pei o aʻu aumea. Sa ou fiafia foʻi e tiʻetiʻe pasika. E ui lava sa ou aafia i nisi o faalavelave faafuaseʻi mataʻutia, ae sa ou fiafia pea e fealuaʻi i le pasika ma ou manatu ai e alu i le isi itu o Ausetalia.

E ui lava i loʻu saʻolotoga na iai, ae e masani ona ou lagona le lē fiafia pe a mafaufau i le tulaga o le lalolagi, ma le lē manatu mamafa o le  toʻatele i faafitauli o tagata. Na ou naunau e iloa le upu moni e faatatau i le Atua, lotu, ma tulaga o le lalolagi. Ae ina ua ou fesili atu i patele e toʻalua o le lotu Katoliko, sa ou lē fiafia i a la tali. Sa ou talanoa atu i mataupu lava na i faifeʻau eseese o le lotu Porotesano, ae sa na o le lē fiafia na oso aʻe ai i a latou tali mai. Ona faatulaga lea e saʻu uō e ma te feiloaʻi ma Eddie, o se Molimau a Ieova. E faafā ona fai ma talanoaga ma Eddie, ma o ia taimi taʻitasi na ia faaaogāina le Tusi Paia e tali ai aʻu fesili. Mai lava i le uluaʻi talanoaga, na ou iloa ai ua ou maua se mea faapitoa. Ae i lenā taimi, ou te leʻi iloa e manaʻomia ona suia le auala ou te ola ai.

LE AUALA NA SUIA AI E LE TUSI PAIA LOʻU OLAGA:I le taimi o laʻu malaga i le isi itu o Ausetalia, sa faia ai ni a matou talanoaga ma isi Molimau, o ē na matou fetaui i le ala. Ae ina ua ou toe foʻi i Kuiniselani, sa lē toe iai sa matou fesootaʻiga ma Molimau mo le ono masina.

Ae i se tasi aso a o oʻu alu atu i le fale mai le galuega, na ou vaaia ai ni tamāloloa se toʻalua e ofu lelei ma o loo uu a la ato ma savavali i le ala, ma na ou mateʻia o i laʻua o ni Molimau a Ieova. Sa ou faalatalata atu iā i laʻua, ma ou iloa ai, e saʻo lava o i laʻua o ni Molimau a Ieova, ma ou talosaga atu e la te suʻesuʻe faatasi ma aʻu le Tusi Paia. E leʻi umi ae amata ona ou auai i sauniga a Molimau ma iʻu lava ina auai i se tauaofiaga tele na faia i Sini i le 1973. Ae ui i lea, ina ua iloa e lo matou aiga—aemaise lava loʻu tinā—le mea ua ou faia, sa matuā lē fiafia i latou. Ona o lea faatasi ai ma isi māfuaaga, na ou lē toe aufaatasi ai ma Molimau. Pe tusa o se tausaga, ae taaʻina aʻu i se isi mea sa sili ona ou fiafia i ai, o le taalo kirikiti.

Peitaʻi, mulimuli ane, na ou iloa ai e pau le taimi na ou lagona ai le fiafia moni, o le taimi lea na ou suʻesuʻeina ai le Tusi Paia ma Molimau a Ieova. O lea na ou toe faafesootaʻi ai i latou ma amata ona auai i sauniga. Sa ou lē toe faifaimea faatasi foʻi ma aʻu uō ia e faaaogāina fualaau faasāina.

O le itu sa matuā uunaʻia ai aʻu e faia nei suiga, o le mea na ou aʻoaʻoina e faatatau i le tagata o loo taʻua i le Tusi Paia, o Iopu. O se molimau e agalelei ae ua fai si matua e igoa iā Bill, sa ma talanoaina faatasi e lē aunoa le Tusi Paia. Ina ua uma ona ma suʻesuʻeina le tala iā Iopu, na fesili mai Bill iā te aʻu po o ai isi o loo tuuaʻia e Satani i le auauna atu i le Atua e aunoa ma le lotoatoa. (Iopu 2:3-5) Sa ou lisi atu i ai igoa o tagata o le Tusi Paia na ou iloa, ma na tali mai ma le onosai Bill, “Ioe, e saʻo, ma i latou foʻi na.” Ona ia tilotilo saʻo mai lea iā te aʻu ma faapea mai, “O le tala foʻi lenā o loo fai atu e Satani iā te oe!” Sa matuā faateʻia lava aʻu. A o leʻi faia lenā suʻesuʻega, sa ou iloa o aʻoaʻoga o loo oʻu aʻoaʻoina e moni. Ae o lea ua ou malamalama i le māfuaaga e ao ai ona ou gaoioi e tusa ma mea ua ou aʻoaʻoina. I le fā masina mulimuli ane ai, na ou papatiso ai o se Molimau a Ieova.

LE AUALA NA AOGĀ AI IĀ TE AʻU:O taimi uma ou te mafaufau ai po o le a faapeʻī loʻu olaga i le taimi nei, pe ana ou lē aʻoaʻoina e ola e tusa ai ma tapulaa a le Tusi Paia. Atonu e oo mai i lenei taimi ua ou oti. O le toʻatele o aʻu uō sa iai i le taimi muamua, ua feoti ona o fualaau faasāina po o le ʻava malosi. Sa lē fiafia foʻi a latou faaipoipoga. Ou te manatu semanū e faapena foʻi loʻu olaga.

I le taimi nei ua ou faaipoipo, ma o loo ma auauna ma le olioli ma laʻu avā o Margaret, i le ofisa o le lālā o Molimau a Ieova i Ausetalia. E leai se tasi o loʻu aiga o aufaatasi ma aʻu i le tapuaʻiga iā Ieova. Peitaʻi, ua tele tausaga o ma olioli ma Margaret i le faamanuiaga o le  suʻesuʻeina o le Tusi Paia, ma le toʻatele o tagata taʻitoʻatasi ma ulugalii, o ē ua suia o latou olaga, e pei foʻi o aʻu. I le faia faapea, ua iai ni a ma uō lelei. E lē gata i lea, ua fesoasoani mai iā te aʻu Margaret, o lē na ola aʻe o se Molimau, ina ia tausia pea le tautoga na ou faia i le toetoe 40 tausaga ua mavae. Ua silia i le 25 tausaga o la ma faaipoipoga fiafia. E lē o taimi uma e ma te ioe ai i mea uma, ae e leʻi iai se taimi ua ma tau upu ai. E ma te tau fai lagona uma le lotofaafetai ma le talisapaia o le Tusi Paia mo lenā tulaga.

FAAMATALAGA O LONA OLAGA

IGOA: MASAHIRO OKABAYASHI

TAUSAGA: 39

ATUNUU: IAPANI

TALAAGA: TAALO I TAALOGA FAITUPE

O LOʻU OLAGA SA IAI:Sa ou ola aʻe i Iwakura, o se tamaʻi nofoaga e tusa ma le ʻafa itula e sau ai i le nofoaafi mai i Nagoya. Ou te manatua o oʻu mātua o ni tagata e ese le agalelei. Ae na ou iloa mulimuli ane, o loʻu tamā o se yakuza, po o se tagata o se kegi, o lē sa tausia lo matou aiga e toʻalima mo se taimi e ala i auala faagaoi. Sa malosi lana inu i aso uma, ma i le 20 o oʻu tausaga, na maliu ai o ia i se maʻi o le ate.

O loʻu tamā o le Korea, o lea e masani ai ona faaesea lo matou aiga e le toʻatele o tagata o le nuu. O lenei tulaga ma isi faafitauli na avea ma itu sa lē fiafia ai loʻu olaga talavou. Sa ou auai i le aʻoga maualuga, ae sa ou lē alu i nisi taimi, ma lē toe aʻoga ai loa ina ua uma le tausaga e tasi. Ua iai faamaumauga a leoleo i aʻu solitulafono, ona tuufaatasi lea ma loʻu tulaga o se ʻafa Korea, na matuā faigatā ai ona maua saʻu galuega. Mulimuli ane, na maua saʻu galuega ae na afāina oʻu tulivae ma lē mafai ai ona ou faia se galuega faaletino.

Na amata ona ou saʻilia mea e ola ai e ala i le taalo i se ituaiga taaloga faitupe e taʻu o le pachinko. E oo ane i lenā taimi, o loo ma mafuta ma se tamaʻitaʻi na manaʻo e suʻe saʻu galuega lelei ma ma faaipoipo. Ae na ou matele i le taalo i taaloga faitupe, ma ou te leʻi manaʻo foʻi e sui le auala ou te ola ai.

LE AUALA NA SUIA AI E LE TUSI PAIA LOʻU OLAGA:I se tasi aso, na sau ai se Molimau a Ieova i lo ma fale ma tuu mai iā te aʻu le tusi Life—How Did It Get Here? By Evolution or by Creation? Ou te leʻi iloiloina muamua lava lenei fesili. Ae peitaʻi, ina ua uma ona faitau le tusi, sa ou ioe e aʻoaʻo atili e faatatau i le Tusi Paia. O taimi uma lava ou te taumānatu ai po o le ā e tupu i le tagata pe a oti. O tali manino na ou maua mai i le Tusi Paia e faatatau i lenei fesili atoa ai ma isi mataupu, na ou lagona ai o lea faatoʻā ou malamalama.

Sa ou iloa e manaʻomia ona faatatau mea ua ou aʻoaʻoina mai i le Tusi Paia. O lea la, sa lesitala faaletulafono loa le ma faaipoipoga, lē toe ulaula tapaa, ʻoti loʻu ulu lea sa uumi ma vali enaena, ma teu faalelei oʻu foliga. Sa ou lē toe taalo foʻi i taaloga faitupe.

 Sa lē faigofie ona faia nei suiga. O se faataʻitaʻiga, sa lē mafai ona ou tuua le tapaa i soʻu lava malosi. Ae e ala i le tatalo faatauanau ma le faalagolago atu iā Ieova le Atua, na mafai ai ona ou tuua. E lē gata i lea, o laʻu galuega muamua na maua ina ua ou lē toe taalo pachinko, sa o se luʻi tele iā te aʻu. O le aofaʻi o loʻu totogi o le ʻafa lenā o tupe na ou maua mai i taaloga faitupe, ma sa faigatā ma tigāina le galuega. O se tasi o mau o le Tusi Paia sa fesoasoani iā te aʻu i lenā taimi faigatā, o le Filipi 4:6, 7. Ua faapea mai: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai le Atua, lea e silisili i mea uma lava e manatu i ai, e ala iā Keriso Iesu.” I le tele o taimi, sa faamaonia ai le moni o lenei folafolaga iā te aʻu.

LE AUALA NA AOGĀ AI IĀ TE AʻU:Ina ua faatoʻā amata ona ou suʻesuʻeina le Tusi Paia ma Molimau a Ieova, sa lē fiafia laʻu avā. Ae ina ua ia vaaia suiga tetele i aʻu amioga, sa auai mai i laʻu suʻesuʻega faale-Tusi Paia ma amata ona ma auai faatasi i sauniga a Molimau a Ieova. I le taimi nei ua avea i maʻua uma ma Molimau a Ieova. O se faaeaga le mafai ona ma auauna faatasi i le Atua!

A o oʻu leʻi suʻesuʻeina le Tusi Paia, sa ou manatu o loo oʻu fiafia. Ae ua ou iloa nei le mea e taʻu o le fiafia moni. O le ola e tusa ai ma tapulaa a le Tusi Paia o se mea e matuā faigatā lava, ae ua ou mautinoa o le auala sili lenā e ola ai.

FAAMATALAGA O LONA OLAGA

IGOA: ELIZABETH JANE SCHOFIELD

TAUSAGA: 35

ATUNUU: PERETANIA

TALAAGA: TULIMATAʻI FAAIʻUGA O VAIASO

O LOʻU OLAGA SA IAI:Sa ou ola aʻe i Hardgate, o se tamaʻi taulaga e lē mamao ese ma Glasgow, i Sikotilani. Ina ua fitu oʻu tausaga, sa amata ona aʻoaʻo aʻu e loʻu tinā, o lē ua avea ma Molimau a Ieova, e faatatau i le Tusi Paia. Ae e oo ane i le 17 o oʻu tausaga, ua ou fiafia e faifai mea faatasi ma aʻu uō i le aʻoga—alu i fale kalapu, faalogologo i musika malomaloā, ma inu ʻava malosi. Sa matuā mamao ma loʻu mafaufau se mea faaleagaga. Na pau le mea na ou tulimataʻia o faaiʻuga o vaiaso. Ae peitaʻi, na suia na tulaga uma ina ua 21 oʻu tausaga.

Sa ou alu e asiasi i oʻu tauaiga i Aialani i Mātū. A o iai i inā, sa ou vaaitino ai le Orange  Walk, o se savali a tagata Porotesano. Sa faateʻia aʻu i le matuā feitagaʻi ma le faailoga tagata na ou vaaia i le va o tagata Porotesano ma tagata Katoliko i lenā mea. O le mea moni, sa fesoasoani lenā mea iā te aʻu e toe mafaufau ai i le tulaga o mea. Sa ou manatua mea na aʻoaʻo mai e loʻu tinā iā te aʻu mai i le Tusi Paia, ma na ou iloaina e lē taitai talia e le Atua i latou e teena ana tapulaa alofa. Ma na vave ona ou iloa, o loo oʻu pisi lava e tuliloa mea ou te manaʻo i ai, ae teena le mea o loo finagalo le Atua ou te faia i loʻu olaga. Na ou filifili ai pe a ou toe foʻi i loʻu aiga i Sikotilani, o le a ou matuā suʻesuʻe po o le ā o aʻoaʻo e le Tusi Paia.

LE AUALA NA SUIA AI E LE TUSI PAIA LOʻU OLAGA:I le uluaʻi taimi na ou toe alu ai i se sauniga a Molimau a Ieova i loʻu nuu, sa matuā faigatā ma lagona le popole. Peitaʻi, na talia ma le māfana aʻu e tagata uma. A o oʻu taumafai e faatatau mea ua ou aʻoaʻoina mai i le Tusi Paia, sa naunau faapitoa mai se sui agalelei o le faapotopotoga iā te aʻu. Sa ia matuā fesoasoani mai iā te aʻu ia lagona le toe avea ma vaega o le faapotopotoga. O aʻu uō sa iai muamua sa faaauau pea ona latou valaaulia aʻu e ō i fale kalapu, ae na ou taʻu atu iā i latou ua ou taumafai malosi e ola e tusa ai ma tapulaa a le Tusi Paia. E leʻi umi, ae matou lē toe fesootaʻi.

I le taimi ua teʻa, sa ou manatu i le Tusi Paia ua na o se tusi tulafono. Ae ua suia nei loʻu manatu. Ua amata ona ou vaai i tagata o loo taʻua i le Tusi Paia, o ni tagata moni lava e iai faalogona ma vaivaiga, e pei foʻi o aʻu. Na latou faia foʻi mea sesē, ae na faamagalo i latou e Ieova ina ua latou salamō moni. Sa ou lagona le mautinoa e faapea, e ui lava na ou liliu ese ma le Atua a o oʻu laʻitiiti, ae o le a ia faamagalo aʻu ma faagalo aʻu mea sesē ua tuanaʻi pe afai ou te taumafai malosi e faafiafia o ia.

Sa matuā faagaeetia foʻi aʻu i uiga o loʻu tinā. E ui lava na ou tuulafoaʻia le Atua, ae sa tumau pea o ia. O lana faaaʻoaʻoga i le tumau ma le faamaoni, na ou iloa ai e matuā tāua tele taumafaiga e auauna iā Ieova. A o oʻu laʻitiiti ma talaʻi mai i lea fale i lea fale faatasi ma loʻu tinā, ou e leʻi fiafia i ai ma na lē mafai ona faaāta i le mafaufau le faaalu o itula e talaʻi ai i tagata. Ae ua ou filifili nei e faataʻitaʻi le folafolaga a Iesu o loo i le Mataio 6:31-33. Na ia fetalai e faapea: “Ia aua lava neʻi outou popole ma faapea ane, ‘O le ā se mea tatou te aai ai?’ ‘O le ā se mea tatou te inu ai?’ ‘O le ā foʻi se mea tatou te oofu ai?’ . . . Ua silafia e lo outou Tamā o i le lagi, o mea uma ia o loo outou manaʻomia. O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.” E leʻi leva ona uma ona ou papatiso o se Molimau a Ieova, ae ou faamavae ma laʻu galuega faataimi atoa, maua se galuega faavaitaimi, ma avea ma tagata talaʻi faataimi atoa.

LE AUALA NA AOGĀ AI IĀ TE AʻU:A o oʻu laʻitiiti ma tulimataʻi faaiʻuga o vaiaso, ou te leʻi lagona se faamalieina. Sa gaogao loʻu olaga. Ae o lenei ua ou aafia atoatoa i le auauna iā Ieova, ma ua ou lagona moni ai le lotomalie. Ua iai se fuafuaga o loʻu olaga. Ua ou faaipoipo i le taimi nei, ma o loo ma femalagaaʻi ma laʻu tane i faapotopotoga eseese o Molimau a Ieova i vaiaso taʻitasi, ma faalaeiau i latou. Ua ou vaai i lenei galuega o se faaeaga silisili o loʻu olaga. Ou te matuā lotofaafetai iā Ieova mo le tuuina mai iā te aʻu o se isi avanoa!

[Faamatalaga faaopoopo i le itulau 27]

“Mai lava i le uluaʻi talanoaga, na ou iloa ai ua ou maua se mea faapitoa. Ae i lenā taimi, ou te leʻi iloa e manaʻomia ona suia le auala ou te ola ai”

[Faamatalaga faaopoopo i le itulau 29]

“Sa lē mafai ona ou tuua le tapaa i soʻu lava malosi. Ae e ala i le tatalo faatauanau ma le faalagolago atu iā Ieova le Atua, na mafai ai ona ou tuua”

[Faamatalaga faaopoopo i le itulau 30]

“I le taimi ua teʻa, sa ou manatu i le Tusi Paia ua na o se tusi tulafono. Ae ua suia nei loʻu manatu. Ua amata ona ou vaai i tagata o loo taʻua i le Tusi Paia, o ni tagata moni lava e iai faalogona ma vaivaiga, e pei foʻi o aʻu”