Talitonuga 3: E Ō Tagata Lelei Uma i le Lagi

O fea e tupuga mai ai lea aʻoaʻoga?

Ina ua mavae atu aposetolo o Iesu, e oo ane i le amataga o le senituri lona lua T.A., ua lauiloa Faatamā o le Lotu. Ua faamatalaina e le New Catholic Encyclopedia (2003), Tusi 6, itulau 687, a latou aʻoaʻoga: “O le aʻoaʻoga autū sa iai e faapea, o le taimi lava e māeʻa ai le sauniga o le faamamāina o le tagata ua oti, ona alu lea o lona agaga i le lagi.”

O le ā le tala a le Tusi Paia?

“E fiafia o ē agamalu, auā e fai mo latou tofi le lalolagi.”—Mataio 5:5.

Na folafola e Iesu i ona soo o le a ia “sauni se nofoaga” mo i latou i le lagi, ae e lē faapea e otometi le ō o tagata lelei i le lagi. (Ioane 3:13; 14:2, 3) O le mea moni, na tatalo o ia ina ia faia le finagalo o le Atua “i le lalolagi, e pei ona faia i le lagi.” (Mataio 6:9, 10) O lea, e lua faamoemoe mo ē e amiotonu. E iai le vaega toʻaitiiti e pule faatasi ma Keriso i le lagi, ae o le toʻatele o le a ola e faavavau i le lalolagi.—Faaaliga 5:10.

A o faagasologa taimi, na sui le manatu o le lotu e tusa o lana matafaioi i le lalolagi. O le ā le iʻuga? E tusa ai ma le New Encyclopædia Britannica: “Na suitulaga le lotu i le Malo o le Atua.” Na faamalosia e le lotu lona tulaga e ala i le auai i faiga faapolotiki, ma lē amanaʻia ai fetalaiga manino a Iesu e faapea, o ona soo “e lē ni tagata o le lalolagi.” (Ioane 15:19; 17:14-16; 18:36) I le pulega a Konesetatino le Emeperoa Roma, na lē tausisi ai le lotu i nisi o ona talitonuga, e aofia ai le tulaga o le Atua.

Faatusatusa mau nei: Salamo 37:10, 11, 29; Ioane 17:3; 2 Timoteo 2:11, 12

LE AʻOAʻOGA MONI:

O le a ola e faavavau le toʻatele o tagata lelei i le lalolagi, ae lē o le lagi

[Ē Ana le Ata i le itulau 6]

Art Resource, NY