“Ou te Valaau Seʻia Afea?”

Na tagi Jayne ma faapea mai, “Ou te manaʻo ia teʻa le tigā!” Sa maua o ia i le kanesa, ma ua sosolo i lona tino atoa. Sa moomoo lona aiga ma ana uō ia mafai ona latou aveesea lona maʻi ma ona tigā! Sa latou tatalo i le Atua mo se fesoasoani. Po o le a ia faafofoga mai? Pe na ia manatu mai?

O LOO silafia e le Atua le tulaga o loo iai tagata. Ua faapea mai lana Afioga, le Tusi Paia: “O loo ōi faatasi pea ma tigā faatasi foafoaga uma.” (Roma 8:22) O loo silafia e le Atua, e faitau selau miliona tagata o ē e pei o Jayne, o loo feagai i aso uma ma tigā i le tino, faalogona, po o le mafaufau. O loo silafia e le Atua le 800 miliona o tagata o loo momoe fia aai i pō uma, le faitau miliona o i latou o loo mafatia i sauāga i aiga, ma le tele o mātua o loo popole i le lumanaʻi ma le manuia o a latou fanau. Pe na e taumānatu po o le a gaoioi le Atua e foʻia nei faafitauli? O le mea moni, ona e tatou te mananaʻo e fesoasoani i ē pele iā i tatou, pe e lē finagalo ea la le Atua e fesoasoani mai i tagata, o ana foafoaga na faia?

Pe afai o e fesili i na fesili, e lē na o oe o fesili ai. I le silia i le 2,600 tausaga ua mavae, na iai i le tane faatuatua o Sapakuka le lagona foʻi o loo iai i tagata i aso nei, ma na ia fesili atu i le Atua e faapea: “Ieova e, ou te valaau seʻia afea, a e te lē faafofoga mai; ou te alaga atu iā te oe ona o le sauāga, a e te lē faaola mai? Se ā ea le mea ua e faaali mai ai iā te aʻu le amio leaga, ma e silasila i le puapuaga? e i oʻu luma le faatafunaina ma le sauā, e i ai foʻi le fefinauaʻiga ma le faatupuina o le misa.” (Sapakuka 1:2, 3) Sa molimau le perofeta Eperu o Sapakuka, i gaoioiga e faateʻia ai o faiga sauā lē mafaufau i ona aso. I aso nei, ua aumaia i tala fou i aso uma na faiga, lea e faanoanoa ai tagata e manatu mamafa i isi.

Pe na taʻufaatauvaaina e le Atua popolega o Sapakuka? E leai. Sa ia faafofoga i fesili na fai atu ma le faamaoni e Sapakuka, ona ia faamāfanafana lea ma faalaeiau le tane lotomafatia. Sa faamalosia e Ieova le Atua le faatuatua o Sapakuka, ma folafola atu o le a ia faaiʻuina mafatiaga. E mafai foʻi ona faamāfanafanaina oe i le feʻau a le Atua e uiga i le faamoemoe, e pei ona faia iā Jayne ma lona aiga. O le a taliina i le mataupu o sosoo mai fesili nei: E faapefea ona tatou mautinoa o loo manatu moni mai le Atua iā i tatou? O ā mea o le a faia e le Atua e faaiʻuina ai mafatiaga, ma o afea?