Pe Faamanatu e Kerisiano le Tausaga Fou?

IĀ IANUARI ma Fepuari i tausaga uma, e faamanatu ai i Asia se aso e sili ona toʻatele ai tagata e faimalaga i le lalolagi. E faitau selau miliona tagata Asia e toe foʻi e faamanatu le Tausaga Fou ma o latou aiga. *

O le faamanatuga o le Tausaga Fou o se aso faamanatu e sili ona tāua i tagata Asia. Ua faapea mai se tusitala Amerika, e pei ua faamanatu faatasi ai le Tausaga Fou, le Tutoʻatasi, le Aso o le Faafetai ma le Kirisimasi i le aso e tasi.” E amata ona faamanatu pe a faatoʻā vaaia le masina i le kalena faa-Saina, pe i le va o Ianuari 21 ma Fepuari 20 e tusa o kalena a atunuu i Sisifo. E alu ai ni aso pe oo lava i le lua vaiaso o faamanatu.

O le autū o le faamanatuina o le Tausaga fou, o le toe faafouina, ina ia faauma mea tuai ae faafeiloaʻi mea fou. E sauni tagata mo le tausamiga e ala i le faamamā ma teuteu o latou fale, faatau lavalava fou, sauni meaʻai e tutusa igoa ma le faaupuga faa-Saina o le “manuia,” ma le “tamaoaiga,” totogi a latou aitalafu ma faaleleia feeseeseaʻiga. I le Aso o le Tausaga Fou, e fetufaaʻi ai meaalofa ma moomooga mo le lelei, e masani lava ia maua le tamaoaiga ma le olaga lelei, ma afīfī mumū e iai tupe laki, ma ʻai meaʻai faapitoa, faapāpā fanapepa, matamata i siva tarako ma leona felanulanuaʻi, pe e na o le fiafia foʻi e faatasitasi ma uō ma aiga.

E iai le uiga o nei tū masani. Ua taʻua e se tusi e faatatau i Tausamiga a Saina: “O le faanaunauga autū o aiga, uō ma tauaiga, ia maua le laki, ma ia faaalia le faaaloalo i atua ma agaga, ma talosia ia maua se tausaga fou manuia.” O le ā le vaaiga a Kerisiano i lea aso faamanatu ona o le tele o aganuu, ma faiga faalotu o loo aofia ai? Pe tatau ona latou faamanatu tū o lea aso? Pe e tatau ona faamanatu e Kerisiano?

“Ia Manatua le Mea na Puna Mai Ai”

E faapea se alagāupu lauiloa faa-Saina: “A e inu le vai, ia manatua le mea na puna mai ai.” Ua faaata mai ai le faaaloalo o le toʻatele o tagata Asia i o latou mātua ma tuaa. Talu ai o mātua na latou maua ai le ola, ua talafeagai ai i fanau ona faaaloalo iā i latou, ma o se vala tāua lea o le faamanatuina o le Tausaga Fou.

O le pō o le Tausaga Fou, o se taimi tāua lea i le toʻatele o aiga Asia. E faapotopoto ai le toʻatele o aiga mo se ʻaiga faapitoa. O le taimi lea e taumafai ai tagata uma o nei atunuu, ia aua neʻi misia le faatasitasi ma o  latou aiga. I le laulau o le tausamiga, e faatulaga ai nofoa o ē taumamafa, e lē gata mo tagata o le aiga, ae faapea ma ē ua maliliu, o loo faatasi atu o latou agaga. Na taʻua i se lomifefiloi, i lenei taumafataga, “e talanoa moni ai lava tuaa ua maliliu ma tagata o le aiga. Ua taʻua foʻi i se isi tusi e faapea: “E toe faafou ai le faiā a e o ola ma e ua maliliu, ma o le a puipuia e tuaa ua maliliu le aiga a o faagasolo le tausaga. O le ā le vaaiga a Kerisiano i lea tū?

E tāua foʻi i Kerisiano le alofa ma le faaaloalo i mātua. E latou te utagia le faatonuga mai le Atua: “Ia e faalogo i lou tamā, o lē na fanaua oe; aua foʻi e te ʻinoʻino i lou tinā pe a loomatua o ia.” (Faataoto 23:22) E latou te usitaʻia foʻi le poloaʻiga mai le Tusi Paia: “‘Ia e āva i lou tamā ma lou tinā,’ o le poloaʻiga muamua lea ua iai le mea ua folafolaina: ‘Ina ia e manuia ai ma e ola umi ai i le lalolagi.’” (Efeso 6:2, 3) Ioe, e mananaʻo Kerisiano moni ia alolofa ma faaaloalo i o latou mātua!

O loo faatāua foʻi i le Tusi Paia le faatasitasi o aiga e atiaʻe ai. (Iopu 1:4; Luka 15:22-24) Peitaʻi ua poloaʻi mai Ieova: “Aua neʻi iloa ia te oe se tasi . . . po o sē e fesili atu i aitu po o agaga, po o sē saʻili atu i ē ua oti.” (Teuteronome 18:10, 11, The Jerusalem Bible) Aiseā ua faasā ai? Ona ua taʻu mai i le Tusi Paia le tulaga moni o ē ua oti. Ua faapea mai: “O ē ua ola, ua latou iloa e oti i latou; a o ē ua oti, latou te lē iloa se mea.” Talu ai ua lē iloa e ē ua oti se mea, e lē mafai ona latou auai i galuega a ē o ola, e lē mafai foʻi ona fesoasoani mai pe faaleagaina i tatou. (Failauga 9:5, 6, 10) Na faatusa e le Alo o le Atua o Iesu Keriso le oti e pei o loo moe gase, ma o le a toe feala i latou ua oti pe a oo i le taimi o le toetū. Ioane 5:28, 29; 11:11, 14.

E lē gata i lea, ua faaalia e le Tusi Paia o “agaga” o ē ua oti, o agaga leaga moni o loo taumafai e faafoliga mai e pei o ē ua oti. Mo le ā le fuafuaga? Ina ia faasesē tagata ma pulea ai e agaga leaga! (2 Tesalonia 2:9, 10) O poloaʻiga a le Atua ua puipuia ai i tatou mai le faaleagaina. O lea, o le alofa iā Ieova ma le naunau ia saogalemu, e ʻalofia ai ma le atamai e Kerisiano ni tū e aofia ai le tapuaʻi i “agaga” o aiga, pe saʻili atu mo le latou puipuiga.—Isaia 8:19, 20; 1 Korinito 10:20-22.

I le isi itu, e mananaʻo Kerisiano ia faamamalu “le Tamā, o lē ua maua ai e aiga uma i le lagi ma le lalolagi o latou igoa.” (Efeso 3:14, 15) O ai lenei Tamā? O Ieova le Atua o Lē na faia i tatou ma o le Foaʻi ola. (Galuega 17:26) O lea, pe a iloiloina tū o le Tausaga Fou, e lelei ona fesili ifo: O le ā le silafaga a Ieova i nei tū? Pe e fiafia i ai o ia?—1 Ioane 5:3.

Faamamalu Atua o Aiga

I le faamanatuina o le Tausaga Fou, e faia ai le tele o tū masani e faamamalu ai atua o aiga, e iai le atua o le faitotoʻa, le atua o le laueleele po o le agaga e leoleoina, le atua o le tamaoaiga, ma le atua o le umukuka po o le ogaumu. Seʻi iloilo le tū lauiloa o le faamamaluina o le atua o le umukuka. * O le talitonuga e faapea, i ni nai aso a o leʻi oo i le Tausaga Fou, e malaga atu ai lea atua i le lagi, e ave le lipoti o le aiga i le Emeperoa o Iasepi, o le atua autū o atua o Saina. I le faamoemoe e aumaia e le atua o le umukuka se tala fiafia, e faia ai e le aiga se ʻaiga faapitoa e ofo atu ai mea suamalie eseese e auina atu ai o ia. Ina ia vave lana malaga, e ave i lalo e le aiga lona ata, ma nini ona laugutu i mea suamalie, ma ave i fafo e susunu ai. I  le pō o le Tausaga Fou, e tautau ai e le aiga i luga aʻe o le ogaumu se ata fou o le atua o le umukuka, ma valaaulia o ia e toe foʻi mai i le aiga i lenei tausaga fou.

E ui e lē leaga le tele o tū, ae e mananaʻo Kerisiano e mulimuli i taʻiala ua faatonuina mai e le Afioga a le Atua, i mea tau tapuaʻiga. Na fetalai Iesu Keriso e faatatau i nei mea: “E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.” (Mataio 4:10) Ua manino mai e finagalo le Atua e tapuaʻi atu tau lava o ia. Aiseā? Seʻi manatu i lenei mea: O Ieova o lo tatou Tamā i le lagi. O ā ni lagona o se tamā pe afai e lē amanaʻia o ia e lana fanau, ae liliu atu i se isi tamā? Pe e lē tigā ai o ia?

Na silafia e Iesu o lona Tamā i le lagi, o “le Atua moni e toʻatasi,” ma na taʻu manino mai e Ieova i ona tagata tapuaʻi e ‘aua neʻi faia ni atua ese i ona luma.’ (Ioane 17:3; Esoto 20:3) O le mea lea e mananaʻo ai Kerisiano moni e faafiafia Ieova, ae lē o le faatigā po o le faia o se mea e lē fiafia ai o ia, e ala i le auauna atu i isi atua.—1 Korinito 8:4-6.

Faiga Faanuupō ma Faiga Faaagaga

E fesootaʻi foʻi le Tausaga Fou ma le saʻiliʻili i fetu. I le kalena faale-tausaga, e faaigoa ai tausaga taʻitasi i manu e 12 o le kalena faa-Saina, e pei o le tarako, taika, manukī, le lapiti, ma isi manu. E taʻu mai i le manu o le tausaga ia uiga ma amio a i latou e fananau i lea tausaga, po o mea lelei sa faia ai. O le tele o isi tū o le Tausaga Fou, e aofia ai le faamamaluina o le atua o le manuia, ma e fuafua faapitoa lava ia maua ai le “laki.” O le ā le vaaiga a Kerisiano i nei tū?

I lana Afioga le Tusi Paia, e taʻusalaina e Ieova i latou “o ē e tapuaʻi atu i mea o i le lagi, o ē e saʻiliʻili i fetu, o i latou ua faaalia le poto e uiga i masina faatoʻā vaaia e faatatau i mea o le a oo iā [i latou].” Na taʻusalaina foʻi e ia le tapuaʻi atu i le “atua o le Laki” ma le “atua o Iʻuga Tuupōina.” (Isaia 47:13; 65:11, 12, NW) I lo le faatuatua i ni malosiaga e lē vaaia e fesootaʻi ma agaga po o fetu, ua faatonuina tagata tapuaʻi moni: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) Ioe, e saisaitia tagata ona o talitonuga faanuupō, ae faasaʻolotoina i latou e upu moni o le Tusi Paia.—Ioane 8:32.

Faaalia Lou Alofa i le Atua

E lelei le iloa o le amataga o tū ma talitonuga o le faamanatuina o le Tausaga Fou, ae e lē faigofie ona alo ese ai. Pe e te nofo i se nuu e masani ona faamanatu ai tū o le Tausaga Fou, pe e auai foʻi lou aiga i le faamanatuina o lenā tu? Ua e fesagaʻi la ma se filifiliga faigatā.

E moni e manaʻomia le lototele ma le maumauaʻi ina ia faamaoni e ui i omiga. Na fai mai se fafine Kerisiano e nofo i Asia: “Na ou popole lava auā na faamanatu e tagata uma le Tausaga Fou, ae ou te leʻi auai.” O le ā na fesoasoani iā te ia? “Ona o le atiaʻe o le alofa i le Atua na mafai ai ona ou tumau.”—Mataio 10:32-38.

Pe e faapena le malosi o lou alofa iā Ieova? E tele māfuaaga e te alofa ai iā te ia. Auā o lou ola e lē mai i se atua e lē mailoa, ae e mai iā Ieova le Atua, o lē ua taʻua i le Tusi Paia: “O loo ia te oe le puna o le ola; o lou malamalama matou te iloa ai le malamalama.” (Salamo 36:9) E lē o le atua o le manuia po o le atua o le umukuka, a o Ieova e na te saunia mai mea e manaʻomia ina ia e ola fiafia ai. (Galuega 14:17; 17:28) Pe e te alofa atu iā te ia? Ia e mautinoa, afai e te faia faapea, o le a matuā faamanuiaina oe e Ieova.—Mareko 10:29, 30.

[Faaopoopoga i lalo]

 [Pusa/Ata i le itulau 23]

Faamalamalama Atu i Uō ma Aiga

O le mea moni pe a lē toe auai se tasi o le aiga i le faamanatuina o le Tausaga Fou, e faateʻia ai ana uō ma lona aiga. Atonu e feita ma lagona le tigā, ma faapea e lē lotoaiga. Peitaʻi, e tele mea e mafai ona fai ina ia tumau ai le mafutaga fiafia ma le aiga. Seʻi manatu i faamatalaga a Kerisiano e nonofo i atunuu eseese o Asia:

Jiang: “A o leʻi taitai oo i le Tausaga Fou, ou te asiasi i loʻu aiga ma faamatala lelei i ai le pogai ou te lē auai ai i nisi tū masani. Ou te faaeteete ia aua le taʻu faatauvaaina o latou talitonuga, ma tali ma le faaaloalo a latou fesili mai le Tusi Paia. Na maua ai ni talanoaga i mea faaleagaga.”

Li: “A o leʻi oo i le Tausaga Fou, na ou faamatala lelei ma le faaaloalo i loʻu toʻalua, e tatau ona ou faia e tusa ma loʻu loto fuatiaifo, ina ia ou maua ai le fiafia moni. Na ou folafola foʻi i ai ou te lē faamaasiasi iā te ia pe a ma ō i lona aiga i aso mālōlō. O le mea e ofo ai, ona i le aso na tapuaʻi ai lona aiga i tuaa, na ia ave aʻu i se isi mea i le sauniga.”

Xie: “Na ou faamautinoa i loʻu aiga loʻu alofa iā i latou, ma o le faamatala i ai o oʻu talitonuga ua avea ai aʻu ma tagata lelei. Ona ou galue malosi lea e faaalia uiga faa-Kerisiano e iai le agamalu, magafagafa, ma le alofa. Na faasolosolo malie ona latou faaaloalo i laʻu lotu. Na oo ina suʻesuʻe laʻu tane ma avea ma uso.”

Min: “Ou te tautala faaaloalo ma le agamalu i oʻu mātua. I lo loʻu faapea atu ʻia manuia,’ na ou fai iā i laʻua ou te tatalo pea iā Ieova o Lē na faia i tatou mo i laʻua, ina ia faamanuia i laʻua ma ia la maua le filemu ma le fiafia.

Fuong: “Na ou fai i oʻu mātua ou te lē faatali seʻi oo i le Tausaga Fou ona ou asiasi atu lea. Ou te toʻaga lava e asi. Na fiafia ai lava oʻu mātua ma lē toe faitio mai ai iā te aʻu. Na fiafia foʻi loʻu uso laʻitiiti e fia iloa le upu moni o le Tusi Paia.”

[Ē Ana le Ata i le itulau 20]

Panorama Stock/age Fotostock