Ua Lata Mai le “Aso ua Tuupōina”
Ua Lata Mai le “Aso ua Tuupōina”
I LE pei o le perofeta o Sapakuka, na moomoo soo o Iesu e vāai atu ua faaiʻuina mafatiaga. O le iloaina o le mea o le a faia e le Malo o le Atua ina ia faasaʻo ai mea i le lalolagi, na latou fesili atu ai iā Iesu: “Pe e oo afea ia mea, ma o le ā foʻi le faailoga o lou faatasi mai [i le mana o le Malo], ma le iʻuga o [le] faiga o mea a le lalolagi?” (Mataio 24:3) Na tali atu Iesu e faapea, e na o Ieova le Atua e na te silafia le taimi tonu o le a pulea atoatoa ai e lona Malo le lalolagi. (Mataio 24:36; Mareko 13:32) Peitaʻi, na valoia e Iesu ma isi ni mea patino o le a tutupu i le lalolagi, e iloa ai ua lata mai le taimi.—Tagaʻi i le pusa i le itu taumatau.
Pe e te lē ioe ua taatele nei mea i aso nei? Na valoia foʻi e Iesu o le a faataunuuina se galuega talaʻi i le lalolagi atoa. Na ia fetalai: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.”—Mataio 24:14.
O le tulaga tonu lenā o loo tupu i aso nei. O loo faia e Molimau a Ieova lenā galuega. I atunuu e tusa ma le 236, e silia i le fitu miliona Molimau a Ieova o loo latou taʻuina atu i tagata mea o le a faia e le Malo, ma fesoasoani atu iā i latou ina ia ola e tusa ai ma tapulaa amiotonu a le Atua, o lē e finagalo ia faaiʻuina mafatiaga ma tigā. Ia faaauau ona aʻoaʻo e faatatau i le Malo o le Atua, ma o le a e maua ai le faamoemoe e ola e faavavau i se lalolagi e aunoa ma mafatiaga.
[Pusa i le itulau 8]
O Mau o Loo Faasino Atu i Aso e Gata Ai
• Taua e lē mafaatusalia
• Mafuiʻe tetele
• Oge
• Faamaʻi
• Faatuputeleina le amioleaga
• Maalili le alofa
• Faaleagaina le laueleele
• Mananaʻo tele i tupe
• Faalogogatā i mātua
• Alofa le tagata iā te ia lava
• E leai se lotoaiga
• E mumusu tagata i maliega
• Ua leai se amio pulea i so o se tagata
• Faateleina le lē fiafia i mea lelei
• Ua pupū i mea faafiafia nai lo le Atua
• E toʻatele i latou ua faafoliga mai o ni Kerisiano
• E toʻatele perofeta pepelo
• Le sauāina o Kerisiano moni
• E lē ano tagata i lapataʻiga mai le Tusi Paia
[Ata i le itulau 8]
O loo aʻoaʻoina e Molimau a Ieova isi e faatatau i le Malo o le Atua, i le lalolagi aoao