Olaga ma Siʻomaga o Kerisiano i le Uluaʻi Senituri

Mea na Latou Nonofo Ai

“Ou te leʻi taofia le . . . aʻoaʻo atu iā te outou i luma o le lautele, ma mai lea fale i lea fale.”—GALUEGA 20:20.

PE A ulu atu i le ala tatala telē, ona e oo atu loa lea i se aai o le uluaʻi senituri. O lea aai, e i luga o se aʻega e pei o le tele o isi aai. I le tuasivi o le aʻega, e iloa atu ai le vaega i luga o le aai. E iai le anoanoaʻi o fale papaʻe matagofie, e fai togālaau e siʻo i pa e feʻilafi i le lā. O le vaipanoa lea o tagata maumea. I lalo ifo o le aʻega, o loo iai fale e eseese le lapopoʻa ma fausaga. O nei fale o loo i autafa o auala tele, e fau i maa ma e tele fogāfale, o fale ia o tagata e feoloolo le tamaoaiga, o ē faatauʻoa ma ē e tele fanua. I le agaʻi ifo i le vanu, o i inā e iai tagata matitiva. O o latou tamaʻi fale e pogisa ma e faatafafā e pei o ni pusa. E faaputuputu i auala vaiti pe faataamilo i lotoa.

A o e savali i auala tumutumu, e te lagonaina leo o tagata ma sosogi i le manogi o kuka. O loo sasala mai kuka a fafine. Ua e faalogoina foʻi leo o manu ma tamaiti o loo taaalo. O loo pisi foʻi tamāloloa i galuega i o latou fale faigaluega e paʻō ma namu leaga.

Na avea fale o aiga Kerisiano, ma autū o o latou olaga. Na faia ai mea i aso faisoo, ma aʻoaʻoina ai faaleagaga faapea le tapuaʻiga.

O Tamaʻi Fale I le pei o fale i aso nei, e fua le telē ma le ituaiga o fale e nonofo ai le aiga i le tulaga tau tupe. O fale e aupito i laiti (1) e na o le tasi lava si tamaʻi potu pogisa e nonofo ai le aiga atoa. O le tele o tamaʻi fale, sa fausia puipui i piliki palapala sa faamamago i le la. A o isi fale, sa faia  puipui i maa. O nei fale, sa masani ona fausia i luga o tulaga fale e fai i maa.

Sa faalamolemole puipui i totonu ma ufi fola i mea e ufi aʻi, ma sa manaʻomia ona faaleleia pea. Sa iai i le taualuga po o le puipui o le umukuka se tamaʻi pū e faaalu ai le asu i fafo. E lē tele ni meafale ae na o mea sa manaʻomia.

O le taualuga o le fale e faia i le ʻele ae faatiʻetiʻe i luga o lālā laau, o faaputuga ū, ma ʻaso o loo faalalava i luga o lagolago. Ona faalamolemole lea o le ʻele i luga o le taualuga ia aua neʻi tutulu. E masani ona faaaogā se apefaʻi i fafo e ō ai i luga o le fale.

E ui ina pūmoomoo, ae sa mananaia fale o aiga Kerisiano, ma e oo lava i se aiga matitiva, sa tamaoaiga faaleagaga ma fiafia.

O Ē e Feoloolo le Tamaoaiga O fale maa lapopoʻa fogāfale lua (2) o tagata e feoloolo le tamaoaiga, sa iai se potu mo mālō. (Mareko 14:13-16; Galuega 1:13, 14) Sa faia sauniga i lenei potu tele pito i luga, ma e masani ona avanoa i taimi o tausamiga. (Galuega 2:1-4) O nei fale ma fale e lapopoʻa atu (3) o tagata faatauʻoa ma ē e tele fanua, sa fai i piliki e faia i le namu, ae faamau i le palu e fai i le namu, oneone, ma le vai. Sa faalamolemole le fola maa ma puipui i totonu, a o le puipui i tua sa vali paepae.

Sa iai se faasitepu e ui atu ai i potu i luga ma le taualuga. O fale uma e mafolafola le taualuga sa siʻo i se pa ia aua ai neʻi paʻū se isi pe tupu ai se isi faalavelave. (Teuteronome 22:8) A vevela le aso, e iai se faapaologa i luga e mapu i ai, e suʻesuʻe, mafaufau loloto ai, tatalo, pe mālōlō foʻi.—Galuega 10:9.

O nei fale mautū sa masani ona nonofo ai aiga toʻatele, ona e tetelē potu, e lava le avanoa e nonofo ai, e fai potu moe ma se umukuka telē ma le mea e aai ai.

Fale o Tagata Maumea O fale o fausaga faa-Roma (4) e eseese lava le tetelē ma le fausaga. O potu tetelē e faataamilo i le potu ʻai telē, ma o i inā e fai ai galuega a aiga. O nisi fale e fogāfale lua pe fogāfale tolu (5) ma e iai togālaau e siʻo i pa.

Atonu sa tele ni meafale mananaia i fale e sili ona taugatā, ma o nisi meafale sa teuteu  i nifo elefane ma le auro. Sa iai paipa ma fale taʻele i fale. Sa fola i laau po o maamora felanulanuaʻi, ma o puipui sa fai i laupapa arasi. E iai foʻi afi e siʻo i uʻamea e tuu ai koale ola e faamāfanafana ai. Na fai faavaa laau i faamalama e puipui ai, faapea ma pupuni e faaesea ai mai i isi tagata. Na vaneina vaega o puipui māfiafia e fai ai mea e saofafaʻi ai i faamalama.—Galuega 20:9, 10.

Po o le ā lava le telē ma foliga o ō latou fale, ae sa agalelei ma limafoaʻi Kerisiano iā latou mea. E leʻi faigatā i se ovasia femalagaaʻi ona maua se aiga māfana ma talimālō e nofo ai, seʻia oo ina māeʻa lana faiva i lenā aai po o lenā taulaga.—Mataio 10:11; Galuega 16:14, 15.

“Le Fale o Simona ma Aneterea” Na talileleia Iesu “i le fale o Simona ma Aneterea.” (Mareko 1:29-31) O le fale o nei tagata faifaiva atonu o se vaega o ni fale putuputu sa iai faatasi i se lotoā (6) o fausaga faigofie.

O na fale, e faasasaga o latou faitotoʻa ma faamalama i le lotoā, o i inā e faia ai gaoioiga i aso faisoo, e kuka ma tao ai meaʻai, e olo ai saito, e faapotopoto ai ma aai faatasi.

O fale fogāfale tasi i Kapanaumi, sa faia i maa mai mauga mū. O le faasitepu i fafo e ui atu i le taualuga mafolafola e faia i le ʻele po o maa atofale, e ufiufi ai ū ma ʻaso ua faataatitia i luga o lagolago. (Mareko 2:1-5) O le fola e fai i mea fai fola, ma ufi i fala.

O atufalega faapena sa laina i autafa o auala ma auala vaiti, i autafa o le matafaga o le sami o Kalilaia. O Kapanaumi o se nofoaga e talafeagai lelei mo tagata faifaiva, o ē sa faalagolago le tausiga o o latou aiga i mea mai le sami.

“Mai lea Fale i lea Fale” I se aotelega, sa eseese fale o Kerisiano i le uluaʻi senituri, o fale e taʻitasi potu e faia i piliki palapala ma fale tetele e taugatā.

E tele isi mea na faaaogā ai fale o aiga. Sa avea foʻi o se nofoaga e aʻoaʻoina ai faaleagaga. Sa tapuaʻi faatasi ai le aiga. E latou te potopoto faatasi i fale o aiga e suʻesuʻe ai le Tusi Paia, ma maua ai le aufaatasiga māfana ma uso talitonu. Na latou faaaogā lelei mea na latou aʻoaʻoina a o faia le latou galuega e sili ona tāua, o le talaʻi ma aʻoaʻo atu “mai lea fale i lea fale” i le malo atoa o Roma.—Galuega 20:20.