O Lē e Faataunuuina Folafolaga
Ia Mafuta Atu i le Atua
O Lē e Faataunuuina Folafolaga
PE E faigatā ona e talitonuina isi? E faanoanoa ona ua tatou ola i se lalolagi ua tauau ina mou atu le faatuatuaina o isi. Pe afai ua e mafatia ona ua ʻolegia oe e se isi sa e faatuatuaina pe ua lē tausi foʻi i lana upu, ua uma foʻi ma lou faatuatuaina o ia. Ae peitaʻi, e iai lē e mafai ona e faatuatuaina i taimi uma. Ua timaʻi mai le Faataoto 3:5: “Ia e faatuatua iā Ieova ma lou lotoatoa.” Aiseā ua avea ai Ieova o lē e sili ona faatuatuaina? I le Iosua 23:14, o loo iai le tali i upu a Iosua, o lē sa tuu atu atoatoa lona faatuatuaga iā Ieova.
O le taimi lea ua sui Iosua iā Mose e taʻitaʻia Isaraelu, ma ua lata i le 110 ona tausaga. Na umi lona soifuaga ma sa ia vaaitino i le tele o galuega mamana sa faia e Ieova mo le fanauga a Isaraelu, e aofia ai le laveaʻiina faavavega mai le Sami Ulaula i le 60 tausaga muamua atu. Ae o lea ua toe mafaufau Iosua i lona olaga ma aami ai Isaraelu uma, “o ona toeaina, o ulu o o latou aiga, o ona faamasino, ma ona alii.” (Iosua 23:2) O ana upu na iloa ai lona poto i le avea ma tagata matua, faapea ona manatunatuga loloto ona o lona faatuatua malosi.
Na faamatala atu e Iosua: “O le a ou alu i le aso nei i le ala o le lalolagi uma.”(O le Tusi Paia Samoa—Lomiga o le 1884) O le faaupuga “le ala o le lalolagi uma” o loo faasino i lona maliu. Ua faapea mai Iosua, “Ua lē o toe umi ni oʻu aso.” I le iloaina o le a oti o ia, e lē taumatea sa tele se taimi na toe mafaufau ai Iosua i lona olaga. O ā upu faamavae na fai atu e Iosua i ona uso tapuaʻi?
Na faapea mai o ia: “E leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou. Ua faataunuuina uma iā te outou. E leʻi iʻuvale se tasi o na upu.” O upu nei a le tagata ua faatuatua atoatoa i le Atua. Pe a toe mafaufau i tua i mea uma na ia vaai i ai, na iloa ai e Iosua e faataunuu pea e Ieova Ana folafolaga uma. * Ua manino mai ai faanaunauga o Iosua mo ona uso tapuaʻi: Ia latou talitonu atoatoa, o le a faataunuu e Ieova ana folafolaga uma mo lo latou lumanaʻi.
Ua faapea mai se tasi tusi faale-Tusi Paia e uiga i le Iosua 23:14: “Aumai uma folafolaga a le Tusi Paia, ona saʻili lea i faamaumauga uma i le lalolagi ma fesili atu i meafaiola uma o loo iai, e faailoa mai se mea se tasi e leʻi faataunuuina e le Atua, pe na galo sana folafolaga.” A na mafai ona faia lenā saʻiliʻiliga, o le a tatou faia ai foʻi le faaiʻuga sa faia e Iosua, e leai lava se folafolaga a Ieova e leʻi faataunuuina.—1 Tupu 8:56; Isaia 55:10, 11.
O loo faamaumauina i le Tusi Paia folafolaga a le Atua ua faataunuuina, e aofia ai ma folafolaga o loo faataunuuina i le taimi nei. O loo iai foʻi folafolaga mataʻina a Ieova mo lo tatou lumanaʻi. * Aiseā e te lē iloilo ai i lenā faamaumauga? O le suʻesuʻe o le Tusi Paia e te talitonu ai, e tatau ona tatou faatuatuaina Lē e faataunuuina folafolaga.
[Faamatalaga pito i lalo]
^ pala. 7 O nisi nei o folafolaga, po o faamautinoaga na vaai i ai Iosua o faataunuuina. Ua foaʻi atu e Ieova se nuu mo i latou. (Faatusatusa le Kenese 12:7 ma le Iosua 11:23.) Na laveaʻi e Ieova Isaraelu mai Aikupito. (Faatusatusa le Esoto 3:8 ma le Esoto 12:29-32.) Na tausia e Ieova lona nuu.—Faatusatusa le Esoto 16:4, 13-15 ma le Teuteronome 8:3, 4.
^ pala. 9 Mo nisi faamatalaga e uiga i folafolaga a le Atua mo lo tatou lumanaʻi, tagaʻi i le mataupu e 3, 7, ma le 8 o le tusi “O ā Aʻoaʻoga Moni a le Tusi Paia?” lomia e Molimau a Ieova.