Ia Aʻoaʻo Lau Fanau

Na Naunau Repeka e Faafiafia Ieova

O REPEKA o se igoa taatele i le tele o atunuu i aso nei. Pe e te iloa se isi e igoa i lenā igoa?— * O Repeka o se tamaʻitaʻi tāua i le Tusi Paia, le tusi e sili ona lauiloa i le lalolagi. O le ā se mea o e iloa e uiga iā te ia?— E tatau ona tatou aʻoaʻo e uiga iā Repeka, auā ua aogā lana faaaʻoaʻoga iā i tatou ina ia auauna ai i le Atua moni o Ieova.

O Repeka, o le fafine lona lua lea o loo taʻua lona igoa i le Tusi Paia, na avea ma tagata tapuaʻi moni o Ieova. Ae e te iloa o ai le fafine muamua na faia faapea?— O ia lea o Sara, le avā a Aperaamo. Ina ua loomatua o ia, na avea ai Sara ma tinā o Isaako—o lana tama e toʻatasi. Seʻi o tatou vaai i le auala na naunau ai Repeka e faafiafia Ieova ma le auala na feiloaʻi ai ma Isaako.

Ua silia ma le 60 tausaga talu ona auina ese atu e le Atua Aperaamo ma Sara mai Karana i le nuu o Kanana. Ina ua matutua lava Aperaamo ma Sara, na folafola atu e le Atua, o le a maua sa la tama ma ia faaigoa iā te ia o Isaako. E mautinoa sa pele lava Isaako i ona mātua. Na maliu Sara i le 127 o ona tausaga, a ua matua Isaako, ma sa faanoanoa lava o ia ina ua leai lona tinā. E lē manaʻo Aperaamo e faaipoipo Isaako i se fafine Kanana, auā e lē tapuaʻi na tagata iā Ieova. O lea, na auina atu Elisara e filifili se avā ma Isaako mai i aiga o Aperaamo i Karana, e sili atu i le 500 maila (800 kilomita) le mamao!—Kenese 12:4, 5; 15:2; 17:17, 19; 23:1.

 Na taunuu Elisara ma isi auauna a Aperaamo i Karana ma kamela e sefulu, o loo ave ai meaalofa mo le tamaʻitaʻi faaipoipo. Na mālōlō i latou i le vaieli auā na iloa e Elisara o le aoauli e ō mai ai tagata e asu vai mo i latou ma a latou manu. Ua tatalo Elisara e faapea, o lē o le a ia filifilia e avea ma avā a Isaako, o le a tali mai i lana talosaga mo sina vaiinu i le faapea mai: “Inā inu ia, ma ou te faainu foʻi i au kamela.”

O le mea lenā na tupu! Ua taunuu Repeka, o lē ua “matuā lalelei lava,” i le vaieli. Na ia talia le talosaga a Elisara mo sina vaiinu, ma faapea atu: “Ou te asu mai foʻi ni vai ma faainu i au kamela.” A o ‘fefoʻifoʻiaʻi o ia i le vaieli e asu mai vai,’ ua vaai “ma le ofo” Elisara iā te ia. Seʻi mātau mai, e tusa ma le 250 kalone (1,000 lita) vai sa tatau ona asu mai e Repeka e faainu ai nei kamela e sefulu!

Na avatu e Elisara iā Repeka ni meaalofa matagofie, ma iloa ai o Repeka o le afafine o Petueli, o le tauaiga o Aperaamo. Na valaaulia e Repeka Elisara ma ana uō e ō atu i lona aiga e momoe ai i le pō. Ona muamua lea o ia e taʻu i lona aiga tagata na auina mamao mai e Aperaamo mai i Kanana e asia i latou.

Na vaai Lapana le tuagane o Repeka i meaalofa taugatā na foaʻi atu i lona tuafafine ma ia iloa ai o Elisara o le auauna a Aperaamo, ma na ia valaaulia o ia e alu atu i le fale. Ae na faapea atu Elisara: “Ou te lē ʻai lava seʻiloga ua faailoa atu laʻu mataupu.” Ona ia faailoa atu lea o le māfuaaga o le auina atu o ia e Aperaamo. Na fiafia Petueli ma lana avā faapea ma Lapana ma ioe i le faaipoipoga.

Ina ua uma ona aai, ona momoe ai lea o Elisara ma lana ʻaumalaga i inā i le pō. I le taeao na sosoo ai, ona fai atu lea o Elisara: “Tuu mai aʻu ou te alu i loʻu matai.” Ae na mananaʻo le tinā o Repeka ma lona tuagane e toe nonofo “mo ni aso se sefulu.” Ina ua fesili atu iā Repeka pe e alu, na tali mai o ia e aunoa ma le faatuai, “Ua ou lotomalie ma te ō.” Ona ō loa lea o i laʻua ma Elisara. Ina ua taunuu le malaga, ona avea ai lea o ia ma avā a Isaako.—Kenese 24:1-58, 67.

Pe faamata sa faigofie ona tuua e Repeka lona aiga ma ana uō, ae alu atu i se nofoaga mamao ma lona iloa atonu e lē toe vaai iā i latou?— E leai, e leʻi faigofie. Ae peitaʻi, na faamanuiaina Repeka ona o le naunau e faia le mea e fiafia ai Ieova. Na avea o ia ma sē tasi o ē na tupuga mai ai lo tatou Faaola, o Iesu Keriso. O le a faamanuiaina foʻi i tatou pe afai e tatou te naunau e faia le mea e fiafia i ai Ieova e pei ona faia e Repeka.—Roma 9:7-10.

[Faamatalaga pito i lalo]

FESILI:

▪ O ai Repeka, ma o fea na feiloaʻi ai ma Elisara?

▪ Aiseā na le manaʻo ai Aperaamo e faaipoipo Isaako i se fafine Kanana?

▪ Na faaalia faapefea e Repeka o le a avea o ia o se avā lelei?

▪ O ā ni mea tatou te faia ina ia pei ai o Repeka?