Olaga ma Siʻomaga o Kerisiano i le Uluaʻi Senituri

O Ē “Faia Galuega i le Fale”

“A o agaʻi atu i latou, ona afe atu lea o ia i se tasi nuu. O i inā ua talimālō ai iā te ia se fafine e igoa iā Mareta i lona fale. E iai foʻi le uso o lenei fafine e igoa iā Maria, o lē sa nofo i lalo i tafatafa o vae o le Alii ma faalogologo atu pea i ana fetalaiga. A o Mareta, ua mua ona pupū o ia i le tele o mea e fai. O lea ua sau ai ma faapea mai: ‘Le Alii e, e te lē manatu mai ea, auā ua tuu mai e loʻu uso na o aʻu e faia nei mea uma? Seʻi e fai ane iā te ia e sau e fesoasoani mai iā te aʻu.’ A ua tali atu le Alii iā te ia: ‘Mareta, Mareta e, ua e popole ma atuatuvale i le tele o mea. Ae e itiiti lava ni mea e manaʻomia, pe e na o le tasi foʻi. A ua filifilia e Maria le mea lelei, ma e lē aveesea mai iā te ia.’”—LUKA 10:38-42.

O MARETA o se tamaʻitaʻi e toʻaga e galue. E lē taumate na viiviia o ia e isi. E tusa ai ma aganuu faa-Iutaia o le uluaʻi senituri, e iloa le tāua o se fafine i lona toʻaga e fai feʻau, ma lona tomai e tausi lelei le aiga.

O fafine Kerisiano i na ona pō, na uunaʻia foʻi i latou e “faia galuega i le fale.” (Tito 2:5) Ae sa iai foʻi sa latou tiute tauave faaopoopo, o le aʻoaʻoina o isi i o latou talitonuga faa-Kerisiano. (Mataio 28:19, 20; Galuega 2:18) O ā nisi o nei “mea e fai” sa tatau ona tausia e se fafine Iutaia na ola i na  ona pō? Ma o ā lesona tatou te aʻoaʻoina mai i upu a Iesu e faatatau iā Maria?

Tausia o le “Tele o Mea e Fai” Sa amata le aso o se fafine Iutaia i le taeao pō a o leʻi oso le lā. (Faataoto 31:15) Pe a uma ona saunia se polesi, o se meaʻai faigofie mo le aiga, e ono alu o ia e momoli lana fanau tama i le aʻoga i le sunako. E nonofo lana fanau teine i le fale ina ia aʻoaʻo e iloa fai feʻau, ia e manaʻomia pe a fai ni o latou aiga.

E masani ona galulue faatasi le tinā ma lana fanau teine i le faia o feʻau masani i le fale—e utu suāuu o molī (1), salu le fale (2), ma tatau le susu o le ʻoti a le aiga (3). Ona sosoo lea ma le faia o falaoa mo le aso. E faamamā muamua e teine le saito ina ia aveese mea leaga (4), ona olo loa lea o saito i se maa olo saito ina ia maua ai se falaoamata (5). E ave e le tinā le falaoamata ma tuu i ai se vai ma se mea faafefete. E na te lomiina le paluga (6) ona tuu lea seʻi fefete ae faaauau ona ia faia isi feʻau. O le taimi lea, e taumafai teine e faatoʻa le suāsusu fou o le ʻoti, e fai ai sisi (7).

Mulimuli ane i le taeao, ona ō lea o le tinā ma lana fanau teine i le maketi. A o faia le faatau, ua lagona e le tinā le manogi eseese o mea faamanogi meaʻai, na te faalogoina foʻi le fetagisi o manu, ma le pisapisaō o tagata faatau ma le ʻau faipisinisi i le tau o mea (8). Atonu o loo tau saʻili ni fualaau faisua ma ni iʻa faalā mo le taumafataga i le afiafi. Afai o ia o se Kerisiano, e ono talanoa atu foʻi o ia i ona talitonuga i isi i le maketi.—Galuega 17:17.

E faaaogā e se tinā e mafaufau faaleagaga avanoa e maua e pei o le savali atu, ma toe foʻi mai le maketi e fesoasoani ai i lana fanau, e iloa ma talisapaia mataupu tāua mai le Tusi Paia. (Teuteronome 6:6, 7) E talanoa foʻi o ia i lana fanau teine i taʻiala e mafai ona fesoasoani iā i latou, ina ia faautauta ai pe a ō e faatau.—Faataoto 31:14, 18.

O se isi galuega masani a fafine i aso taʻitasi, o le ō atu i le vaieli (9). E latou te utu mai ni vai mo le aiga, ma atonu e latou te talatalanoa foʻi ma isi fafine utu vai. Pe a foʻi mai i le aiga, ona amata lea ona tao falaoa e le tinā ma lana fanau teine. E muamua ona latou olo faamafolafola le paluga, ma fai ni falaoa e mafolafola pei o ni panikeke, ona tao loa lea i se ogaumu ua uma ona faavevela (10) lea e masani ona tū i fafo. Ua sasala mai le manogi o le falaoa a o latou talatalanoa faatasi, ma matamata atu i le taoina o falaoa.

Ona ō atu lea i le ālia lata ane e fai le tagamea (11). E tatā muamua e fafine ofu i se fasimoli e fai mai i lefulefu o nisi o laau. Pe a uma ona vaimamā ma tatau lavalava, ona fola solo lea i luga o vaovao ma maa ina ia faamamago ai.

 Pe a uma ona aumai le tagamea i le fale, e ono ō atu le tinā ma lana fanau teine i luga o le taualuga mafolafola o le fale ina ia fonofono (12) ni lavalava masaesae a o leʻi toe faafoʻi i le mea e teu ai lavalava. Mulimuli ane, atonu e aʻoaʻoina teine i le auala e fai ai le tolosē ma le lalagaina o mea (13). E lē umi a ua oo foʻi i le taimi e sauni ai le taumafataga mo le afiafi (14). Talu ai o le talimālō o se tū masani i le olaga o ia tagata, ua nofosauni la le aiga e taumamafa faatasi ma so o se mālō i sea taumafataga faigofie o falaoa, fualaau faisua, sisi, iʻa faalā, ma se vai mālūlū.

I le iʻuga o le aso a o sauni atu tamaiti e momoe, atonu e nini se tulivae o se tamaitiiti ua lavea i se suāuu e faamālū ai. A o tetetete le mumū a le molī, e ono faamatala e mātua se tala mai le Tusi Paia ma faia se tatalo ma le la fanau. A o taaligoligoa le pō, ua iai māfuaaga lelei e taʻu atu ai e le tane i si ana avā upu taʻutaʻua nei: “O se avā lelei o ai sē na te maua? E sili lona tau i maa tāua.”—Faataoto 31:10.

Filifilia o “le Mea Lelei” E mautinoa lava, o se fafine e faautauta na ola i le uluaʻi senituri, sa “tele . . . mea e fai” i aso taʻitasi. (Luka 10:40) E faapena foʻi ona pisi tele fafine i aso nei, aemaise lava tinā. Ua faafaigofie le faia o nisi o feʻau ona o masini faaonapōnei. Ae ua faamalosia le toʻatele o fafine ona o tulaga lē maʻalofia e lē gata e tatau ona fai feʻau i le aiga, ae e tatau foʻi ona faigaluega i galuega totogi.

E ui i luʻi ua fesagaʻia e nei fafine Kerisiano, ae o loo mulimuli le toʻatele o i latou i le faaaʻoaʻoga a Maria, lea na taʻua i le amataga o le mataupu. E latou te faatāuaina mea faaleagaga. (Mataio 5:3) E latou te tausi lelei o latou aiga, e pei ona faalaeiau i latou e le Tusi Paia e fai. (Faataoto 31:11-31) Ae e latou te mulimuli foʻi i le taʻiala na taʻu atu e Iesu iā Mareta. E mautinoa na ia ave i fale lenei fautuaga lelei ona o ia o se fafine e mafaufau faaleagaga. E lē avea tiutefai a fafine Kerisiano i le aiga, ma mea e faalavelavea ai lo latou aʻoaʻoina o mea e uiga i le Atua (15) pe talanoa atu i isi e uiga i o latou talitonuga. (Mataio 24:14; Eperu 10:24, 25) O lea la, ua latou filifili “le mea lelei.” (Luka 10:42) O le iʻuga, ua matuā faatāuaina i latou e le Atua, Keriso, faapea ma o latou aiga.—Faataoto 18:22.