Ua Fesili Mai le ʻAufaitau . . .

Pe Tatau Ona E Talitonu i le Tolutasi Ina ia Avea ai ma Kerisiano?

▪ O se tusi mo aʻoga maualuga na lomia i le 2007, World Religions in Denmark (Lotu a le Lalolagi i Tenemaka), na faamatalaina ai Molimau a Ieova o ni Kerisiano toʻaitiiti o loo mulimulituʻi i le Tusi Paia. O Molimau a Ieova, o le lotu Kerisiano e lona tolu le toʻatele i Tenemaka.

Peitaʻi, na matuā faitioina e se epikopō o le Lotu Tenemaka le faaiʻuga a le tusitala, e faaaofia ai Molimau a Ieova i le tusi. Aiseā? Ua faapea mai le epikopō: “Ou te leʻi feiloaʻi lava i se faifeʻau e manatu o [Molimau a Ieova] o ni Kerisiano. E latou te lē talitonu i le Tolutasi, o lea le autū o le lotu Kerisiano.”

Peitaʻi, na faailoa mai e le tusitala o le tusi o Annika Hvithamar, pe a fesili i tagata i le māfuaaga ua manatu ai o i latou o ni Kerisiano, e seāseā tali mai, ona e talitonu o le Atua o le Tolutasi. E lē gata i lea, ua taʻua i se vaega o le tusi ua faamatuaina “Po o Oe o se Kerisiano?” (“Are You a Christian?”) e faapea: “O le aʻoaʻoga o le Tolutasi o se faafitauli e sili ona lavelave o le talitonuga faa-Kerisiano.” Ua faaopoopo mai: “E matuā faigatā lava ona faamatala lenei talitonuga i Kerisiano e leʻi aʻoaʻoina i talitonuga o le lotu, le māfuaaga ua avea ai le Atua o Kerisiano o se Atua e toʻatasi, ae lē o ni atua se toʻatolu.”

E manino ma faigofie le aʻoaʻoga a le Tusi Paia e uiga i le Atua ma Iesu. E lē faigatā ona malamalama i ai. E lē o maua i le Afioga a le Atua le upu “Tolutasi” po o lea foʻi aʻoaʻoga. Ua taʻua manino i le Tusi Paia o Iesu Keriso, o ia o le Alo ulumatua o le Atua. (Kolose 1:15) O loo faasino atu foʻi iā Iesu o ia o le “puluvaga i le va o le Atua ma tagata.” (1 Timoteo 2:5) Ua faapea mai le Tusi Paia e uiga i le Tama: “O oe e ou le suafa o Ieova, e na o oe lava o Lē e Silisili Ese i le lalolagi uma.”—Salamo 83:18.

E talitonu Molimau a Ieova, e tāua le faatuatua iā Iesu. (Ioane 3:16) O le māfuaaga lea ua latou faatāua ai le poloaʻiga a Iesu: “Ua tusia, ‘E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.’” (Mataio 4:10) E mautinoa la, o lē e taumafai e usiusitaʻi i poloaʻiga a Iesu, e taʻua o ia o se Kerisiano.

[Faamatalaga faaopoopo i le itulau 22]

“O le aʻoaʻoga o le Tolutasi o se faafitauli e sili ona lavelave o le talitonuga faa-Kerisiano”