Pe Tatau Ona E Tausia le Sapati?

A O LATA i le 1990, na siʻomia ai Suva, le laumua o Fiti, e ni vaega toʻaitiiti o tagata lotu Metotisi. E 70 nofoaga na poloka e tamāloloa, fafine ma tamaiti ua lāʻei i ofu lotu. Na latou taofia taavale uma ma faigāmalaga a vaalele, i totonu o le atunuu faapea ma isi atunuu. Aiseā na māfua ai? Ina ia toe faamalosia ai le atunuu e tausia le Sapati.

I Isaraelu, o fale fou uma e tele fogāfale na fausia talu mai le 2001, e tatau ona iai se lifi e otometi ona tū i fogāfale uma. Aiseā? Ina ia lē faia e tagata mapolotu Iutaia, o ē tausia le Sapati mai i le afiafi o le Aso Faraile seʻia oo i le afiafi o le Aso Toonaʻi, se “galuega” o le oomi o ki o le lifi.

I Toga, o se malo i le Pasefika i Saute, e matuā faasā galuega uma i le Aso Sa. E lē faatagaina ona tū laueleele se vaalele, pe taunuu se vaa i le uafu. E faalēaogāina so o se konekarate e sainia i lenā aso. Ua poloaʻia e le tulafono faavae a Toga e ao ona “faapaia” e tagata uma le Aso Sa, e tusa lava po o le ā le lotu a le tagata. Aiseā? Ina ia faamautinoa ua tausia e le atunuu atoa le Sapati.

E pei ona faaalia i faaaʻoaʻoga ua taʻua i luga, e talitonu le toʻatele o tagata, o le finagalo o le Atua ia latou tausia le aso Sapati. Ua manatu nisi e matuā tāua tele ona tausia le Sapati, auā e aofia ai lo tatou faaolataga e faavavau. E manatu isi o le  tulafono aupito sili ona tāua mai i le Atua, o le tausia lea o le Sapati. O le ā le Sapati? Po o uunaʻia e le Tusi Paia Kerisiano ia tausia le Sapati i vaiaso taʻitasi?

O le ā le Sapati?

O le upu faa-Peretania mo le “Sapati,” e sau mai i le upu Eperu o lona uiga o le “mālōlō, taofia, faamuta.” E ui lava o loo taʻua i le tala i le Kenese na mālōlō Ieova le Atua, i le aso lona fitu mai i ana galuega o le foafoaga, ae na faatoʻā faatonuina tagata o le Atua i le taimi o Mose, ina ia tausia se aso e mālōlō ai mo le 24 itula, po o le Sapati. (Kenese 2:2) Ina ua tuua e tagata Isaraelu Aikupito i le 1513 T.L.M., na saunia faavavega e Ieova le manai mo i latou i le toafa. Na faatonuina i latou e faatatau i le aoina o le manai: “E ono aso e tou te aoina ai, ae o le aso lona fitu o le sapati lea. O lea aso, e leai ai se mea e maua ai.” (Esoto 16:26) Ona taʻu mai lea iā i tatou e faapea, ‘⁠na tausia e tagata le sapati i le aso lona fitu,’ mai i le goto o le lā i le afiafi o le Aso Faraile seʻia oo i le goto o le lā i le afiafi o le Aso Toonaʻi.—Esoto 16:30.

Ina ua mavae sina taimi talu ona avatu na faatonuga, na tuuina atu e Ieova se tulafono e uiga i le tausia o le Sapati, e aofia ai i Tulafono e Sefulu na tuuina atu iā Mose. (Esoto 19:1) Ua taʻua i se vaega o le tulafono lona fā: “Ia manatua ma tausia le aso sapati ma faapaiaina, ia e galue ma faia au galuega uma i aso e ono. Ae o le aso lona fitu, o le sapati lea iā Ieova lou Atua.” (Esoto 20:8-10) Sa avea la le tausiaina o le Sapati o se vaega tāua o le olaga o tagata Isaraelu.—Teuteronome 5:12.

Pe na Tausia e Iesu se Sapati?

Ioe, sa tausia e Iesu le Sapati. Ua taʻu mai iā i tatou e faatatau iā te ia e faapea: “Ina ua atoa le taimi na atofaina, ona auina mai ai lea e le Atua o lona Alo, o lē na fanau mai i se fafine ma sa nofo i le tulafono.” (Kalatia 4:4) Na fanau Iesu o se Isaraelu, o lea la, sa nofo o ia i lalo o le Tulafono, e aofia ai le tulafono o le Sapati. Na faatoʻā aveesea le feagaiga o le Tulafono ina ua maliu Iesu. (Kolose 2:13, 14) O le iloaina o taimi na tutupu ai nei mea, e fesoasoani iā i tatou e malamalama ai i le silafaga a le Atua i lenei mataupu.—Tagaʻi i le siata i le  itulau e 15.

 Na fetalai Iesu: “Aua neʻi outou manatu ua ou sau e faalēaogā le Tulafono po o le ʻau Perofeta. Ou te leʻi sau e faalēaogā, ae ia faataunuuina.” (Mataio 5:17) Ae o le ā le uiga o le faaupuga “ia faataunuuina”? Seʻi faataʻitaʻi: E faataunuu e se kamuta se konekarate e fausia se fale, e ala i le faamāeʻaina o le fausiaina o le fale, ae lē o le faalēaogāina o le pepa o le konekarate. Peitaʻi, pe a uma le galuega ma ua faamalieina atoatoa le tagata e ona le galuega, ua faataunuu le konekarate ma ua uma le matafaioi a le kamuta i lea galuega. E faapena foʻi Iesu, e na te leʻi solia pe faalēaogāina le Tulafono; ae na ia faataunuuina e ala i le tausia atoatoa. Ina ua faataunuuina, sa lē toe iai se matafaioi a tagata o le Atua e tausia lenā Tulafono po o le “konekarate.”

Pe Manaʻomia Ona Tausia e Kerisiano?

Talu ai na faataunuuina e Keriso le Tulafono, pe e tatau la ona tausia e Kerisiano le Sapati? I le fesoasoani a le agaga paia, ua tali mai le aposetolo o Paulo: “O lea la, ia aua neʻi faamasino se tasi iā te outou i meaʻai ma meainu, po o se tausamiga, po o le faamanatuina o le masina faatoʻā vaaia, po o le tausia o le sapati; auā o mea na, o le ata o mea o loo i le lumanaʻi, a o le mea moni ua i le Keriso lea.”—Kolose 2:16, 17.

O na upu ua taʻu mai ai se suiga tele i mea e manaʻomia e le Atua i ana auauna. Aiseā ua suia ai? Talu ai ua nonofo Kerisiano i lalo o se tulafono fou, “le tulafono a le Keriso.” (Kalatia 6:2) Na muta le feagaiga o le Tulafono na iai muamua lea na avatu iā Isaraelu e ala iā Mose, ina ua faataunuuina i le maliu o Iesu. (Roma 10:4; Efeso 2:15) Pe na muta ai foʻi ma le poloaʻiga i le tausiaina o le Sapati? Ioe. Ina ua uma ona taʻua e Paulo “ua tuusaʻoloto i tatou mai i le Tulafono,” ona ia taʻua lea o se tasi o Tulafono e Sefulu. (Roma 7:6, 7) O Tulafono la e Sefulu lea e aofia ai ma le tulafono o le Sapati—o vaega o le Tulafono ua  faamutaina. O lea la, e lē o toe manaʻomia ona tausia e tagata tapuaʻi o le Atua le Sapati.

E mafai ona faataʻitaʻia le suia mai le faiga tau tapuaʻiga a Isaraelu i le faiga faa-Kerisiano, i le auala lenei: E ono sui e se malo ana tulafono faavae. Pe a faamamaluina tulafono faavae fou, e lē toe manaʻomia ona usiusitaʻi tagata i tulafono faavae tuai. E ui lava atonu o nisi tulafono i tulafono faavae fou e tutusa ma tulafono na iai muamua, ae e mafai ona iai nisi tulafono e ese. E manaʻomia la ona iloilo lelei e se tagata ia tulafono faavae fou, ina ia iloa po o ā tulafono ua faamamaluina i le taimi nei. E lē gata i lea, e fia iloa e se tagatānuu faamaoni, po o fea le taimi e faamamalu ai tulafono faavae fou.

Na faapena foʻi ona saunia e Ieova le Atua le silia i le 600 tulafono, e aofia ai ma tulafono autū e 10 mo le nuu o Isaraelu. E aofia ai i ia tulafono tulaga tau amio, taulaga, le soifua mālōlōina ma le tausiaina o le Sapati. Peitaʻi, na fetalai Iesu o le a faia aʻe i ona soo faauuina se “nuu” fou. (Mataio 21:43) Mai i le 33 T.A., ua iai se “tulafono faavae” fou o lenei nuu, e faavae aʻe i tulafono autū e lua—o le alofa i le Atua ma le alofa i tuaoi. (Mataio 22:36-40) E ui lava o “le Tulafono a le Keriso” e aofia ai tulafono e talitutusa ma tulafono na tuuina atu iā Isaraelu, ae e lē tatau ona faateʻia i tatou ona o nisi o tulafono e matuā ese lava, ma o isi ua lē toe manaʻomia. O se tasi o tulafono ua lē toe manaʻomia ona tausia, o le tulafono i le tausia o le Sapati.

Po ua Suia e le Atua Ana Faatulagaga?

Po o lona uiga ua suia faatulagaga a le Atua, ona ua suia mai i le Tulafono a Mose i le tulafono a Keriso? E leai. E pei lava ona fetuunaʻi e se matua tulafono mo lana fanau, e fua i o latou tausaga ma tulaga, e faapea foʻi ona fetuunaʻi e Ieova tulafono e manaʻomia ona usitaia e ona tagata. Ua faamatala e le aposetolo o Paulo le mataupu i le auala lenei: “A o leʻi oo mai le faatuatua, na puipuia i tatou e le tulafono, na taofiofia faatasi i tatou e le pule a le tulafono, ma tepa taulaʻi atu i le faatuatua o le a faaalia mai. O lenei, ua avea le Tulafono ma o tatou taʻitaʻitama e taʻitaʻia i tatou iā Keriso, ina ia taʻuamiotonuina ai i tatou ona o le faatuatua. A o lenei ua oo mai le faatuatua, ua lē toe pule la le taʻitaʻitama iā i tatou.”—Kalatia 3:23-25.

E faapefea ona faatatau atu lenei faamatalaga a Paulo i le Sapati? Seʻi manatu i le faataʻitaʻiga lenei: A o iai i le aʻoga, atonu e iai se mataupu patino e ao ona aʻoaʻoina e se tamaitiiti aʻoga i se aso e tasi o vaiaso taʻitasi, e pei o le faiga o meataulima. Peitaʻi, pe afai e maua sana galuega totogi, atonu ua manaʻomia ona ia faaaogā i aso uma ae e lē na o se aso e tasi, le tomai na ia aʻoaʻoina. E faapena foʻi, a o iai i le Tulafono, sa manaʻomia e tagata Isaraelu ona tausia se aso e tasi o vaiaso taʻitasi, e mālōlō ma tapuaʻi ai. Ae o Kerisiano, e tatau ona latou tapuaʻi atu i le Atua i aso uma, ae e lē na o se aso e tasi o le vaiaso.

Pe e sesē pe a faatulaga se aso se tasi o vaiaso taʻitasi e mālōlō ma tapuaʻi ai? E leai. Ua tuu mai e le Afioga a le Atua lenā filifiliga i le tagata lava ia, i le faapea mai: “E manatu le tasi tagata e sili atu ona paia le isi aso i lo o isi aso. Ae e manatu le isi tagata e tutusa aso uma. E ao i tagata taʻitoʻatasi ona fai lana lava filifiliga.” (Roma 14:5, God’s Word) E ui atonu e manatu nisi e sili atu ona paia le isi aso i lo isi aso, ae ua faaalia manino i le Tusi Paia, e lē o faatalitalia e le Atua Kerisiano e latou te tausia se Sapati.

[Faamatalaga faaopoopo i le itulau 12]

“E ono aso tou te aoina ai, ae o le aso lona fitu o le sapati lea. O lea aso, e leai ai se mea e maua ai.”—ESOTO 16:26

[Faamatalaga faaopoopo i le itulau 14]

“Ua avea le Tulafono ma o tatou taʻitaʻitama e taʻitaʻia i tatou iā Keriso, ina ia taʻuamiotonuina ai i tatou ona o le faatuatua. A o lenei ua oo mai le faatuatua, ua lē toe pule la le taʻitaʻitama iā i tatou.”—KALATIA 3:24, 25

[Pusa/Siata i le itulau 13]

Le Sapati ma le Laina Faavaomalo e Faaeseese ai Aso

Ua avea le laina faavaomalo e faaeseese ai aso, ma luʻi iā i latou e talitonu e ao ona tausia le Sapati, i le aso e tasi i vaipanoa uma. O le laina faavaomalo, o se laina ua na ona faaāta e amata mai i le pole i mātū o le lalolagi, agaʻi atu i le tele o vaega o le Vasa Pasefika, ma e tele ina ō faatasi ma le laina lona 180. O atunuu e i le itu i sisifo o le laina faavaomalo, e muamua i le aso e tasi i lo o atunuu e i le itu i sasaʻe.

O se faaaʻoaʻoga, pe afai o le Aso Sa i Fiti ma Toga, o le Aso Toonaʻi lenā i Samoa ma Niue. Pe afai la e tausia e se tagata le Sapati i Fiti i le Aso Toonaʻi, o tagata o lana lotu i Samoa, lea e na o le 711 maila (1,145 kilomita) le mamao, o loo galulue auā o le Aso Faraile lenā iā i latou.

E tausia e tagata Lotu Aso Fitu i Toga la latou Sapati i le Aso Sa, ona ua faapea mai, o loo latou tausia le Sapati i le taimi lava e tasi ma o latou tagata lotu i Samoa, lea e sili laʻitiiti atu i le 500 maila (silia i le 850 kilomita) le mamao. Peitaʻi, i le taimi e tasi, e lē o mālōlō tagata Lotu Aso Fitu i Fiti, lea e itiiti ifo i le 500 maila (800 kilomita) le mamao, auā o le Aso Sa lenā iā i latou, ma e latou te tausia le Sapati i le Aso Toonaʻi!

[Ata i le itulau 13]

(Tagaʻi i le lomiga mo le ata atoa)

\

\

\

\ SAMOA

\

— ― ― ― ― ― ― ―

FITI \

Aso Sa \ Aso Toonaʻi

\

\

TOGA \

\

\

\

  [Siata i le itulau 15]

(Tagaʻi i le lomiga mo le ata atoa)

O Mea Moni e Ao Ona Manatua e Uiga i le Sapati:

E ui lava e ono taʻua i se mau o le Tusi Paia le tausia o le Sapati, ae e manaʻomia ona tatou iloa le taimi na taʻua ai ia upu.

4026 T.L.M. A O LUMANAʻI TAIMI O MOSE

FOAFOAINA ATAMU E leʻi tuuina atu le tulafono o le Sapati a o leʻi oo i taimi o Mose ma tagata Isaraelu.—Teuteronome 5:1-3, 12-14.

1513 T.L.M. TULAFONO A LE ATUA IĀ ISARAELU

TUUINA ATU TULAFONO IĀ ISARAELU E leʻi tuuina atu le tulafono o le Sapati i nisi nuu. (Salamo 147:19, 20) Ae sa tuuina atu o se “faailoga” i le va o Ieova a le fanauga a Isaraelu.—Esoto 31:16, 17.

O le Sapati faalevaiaso ua na o se tasi o le tele o sapati na poloaʻia tagata Isaraelu e tausia.—Levitiko 16:29-31; 23:4-8; 25:4, 11; Numera 28:26.

33 T.A. LE TULAFONO A LE KERISO

MUTA LE TULAFONO NA TUUINA ATU IĀ ISARAELU I le 49 T.A., ina ua filifili po o ā mea e faafinagaloina e le Atua mo Kerisiano, e leʻi taʻua lava e le ʻauaposetolo ma toeaina i Ierusalema e faapea, e manaʻomia ona tausia le Sapati.—Galuega 15:28, 29.

Sa popole Paulo i Kerisiano na latou faamamafa le tausiaina o ni aso faapitoa.—Kalatia 4:9-11.

2010 T.A.

[Ata i le itulau 11]

Na taʻua i nusipepa nofoaga e 70 na poloka e tagata Metotisi, ina ia toe faamalosia tagata i Fiti e tausia le Sapati

[Ē Ana le Ata ]

O le faatagaga a le nusipepa o le Fiji Times