Pe e Ō Tagata Lelei Uma i le Lagi?

I LE afiafi a o leʻi fasiotia Iesu ma ua māea le taumafataga mulimuli ma ona aposetolo, na folafola atu e Iesu o le a tauia i latou i se nofoaga i le lagi. Na ia fetalai atu: “E tele mea e nonofo ai i le maota o loʻu Tamā. Ana leai, semanū ua ou taʻu atu iā te outou, auā ou te alu e sauni se nofoaga mo outou.” (Ioane 14:2) Aiseā o le a saunia ai e Iesu se nofoaga mo i latou i le lagi? O ā mea o le a latou faia i inā?

Sa mafaufau Iesu i se tofiga faapitoa mo ona soo. I lenā lava afiafi, na ia fetalai atu ai: “Ua outou tumau iā te aʻu i taimi o oʻu puapuaga; ma ua ou osia ai se feagaiga ma outou, e pei lava ona osia e loʻu Tamā se feagaiga ma aʻu mo se malo.” (Luka 22:28, 29) Na folafola e le Atua iā Iesu o le a avea o ia ma Tupu, e na te saunia se faigāmalo lelei o loo matuā manaʻomia e le fanau a tagata. O le a faasaoina e Iesu tagata mai mafatiaga, ma tuʻimomomoina i latou o ē e ave faagaoi a latou mea. E ui o le a iai tagatānuu o le pulega a Iesu “i tuluʻiga o le lalolagi,” ae o lona nofoālii o le a iai i le lagi.—Salamo 72:4, 8; Tanielu 7:13, 14.

O le a lē pule toʻatasi Iesu. Na ia faamautinoa atu i ona aposetolo lo latou tofiga i le lagi. Na muaʻi filifilia i latou e “pule mai . . . o ni tupu i le lalolagi.”—Faaaliga 5:10.

E toʻafia e ō i le lagi? E pei lava o malo uma, e toʻaitiiti i latou e pulea le Malo faalelagi o le Atua, pe a faatusatusa atu i le toʻatele o tagata o le a ola i lalo o lea pulega. Na fetalai atu Iesu iā i latou o le a pule faatasi ma ia: “Aua le fefefe le lafu mamoe itiiti e, auā ua finagalo malie lo outou Tamā e tuuina atu le malo iā te outou.” (Luka 12:32) E 144,000 le aofaʻi o le “lafu mamoe itiiti.” (Faaaliga 14:1) E laʻitiiti lenā numera, pe a faatusatusa atu i le faitau miliona o le a maua le ola e faavavau i le lalolagi, o ni tagatānuu faamaoni o le Malo.—Faaaliga 21:4.

O lea la, e lē ō tagata lelei uma i le lagi. Na faapea mai le aposetolo o Peteru e faatatau i le tupu lelei o Tavita: “E leʻi alu aʻe Tavita i le lagi.” (Galuega 2:34) O se tagata lelei foʻi Ioane le Papatiso. Ae na taʻua e Iesu, o le a lē faaeaina o ia e fai ma tupu i le lagi. Na fetalai Iesu: “E leʻi tū mai i ē na fananau mai i fafine sē e sili iā Ioane le Papatiso; a o lē e faatauvaa i le malo o le lagi e sili o ia iā te ia.”—Mataio 11:11.

Po o le a E Maua le Taui o Tagata Lelei?

O le ā e ao ona faia e se tagata ina ia maua le taui o le ola e faavavau i le lalolagi? Na fetalai Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) Mātau mai, o le alofa o le Atua i le lalolagi ua ia faaavanoa atu ai le ola e faavavau i tagata uma, ae na o i latou e “faatuatua” e maua lea taui.

E tatau ona faavae le faatuatua i le iloa lelei o le Atua. (Ioane 17:3) E faaalia o oe o se tagata lelei, i lou aʻoaʻo atili o le finagalo o Ieova mo tagata. Ia gaoioi e tusa ma mea ua e aʻoaʻoina. Ma ia e iloa ua i ou luma le avanoa e ola ai e faavavau.

 [Pusa i le itulau 7]

O le ā o Fai Mai ai le Tusi Paia?

Fesili:

O le ā e tupu i tagata lelei pe a maliliu?

Tali:

“O ē ua oti, latou te lē iloa se mea.”—FAILAUGA 9:5.

Fesili:

O le ā le faamoemoe o tagata lelei mo le lumanaʻi?

Tali:

‘⁠E oo mai le itula e faalogo ai i latou uma o loo i tuugamau i le leo o Iesu ma latou ō mai ai.’—IOANE 5:28, 29.

Fesili:

O fea o le a ola ai le toʻatele o tagata lelei?

Tali:

“E fai lava le lalolagi mo ē e amiotonu, e nonofo ai pea i latou e oo i le faavavau.”—SALAMO 37:29.