“O Ieova e Vaai i le Loto”
Ia Mafuta Atu i le Atua
“O Ieova e Vaai i le Loto”
E MAFAI ona faasesēina i tatou i foliga vaaia. E lē mafai ona tatou iloa mea uma o i le loto o le tagata e ala i ona foliga vaaia. E masani ona faamasino tagata i mea o loo vaavaai atu i ai. Ae e tatou te faafetai ona e lē o gata mai le silasila a Ieova i foliga o tagata. O loo taʻua ma le manino na upu i le 1 Samuelu 16:1-12.
Seʻi faaata i lou mafaufau le vaaiga lenei. Ua lata ona faauuina e Ieova lē o le a avea ma tupu o le nuu o Isaraelu. Na fetalai atu le Atua i le perofeta o Samuelu: “Ou te auina atu oe iā Iese le Peteleema, auā ua ou filifilia mai i ona atalii se tupu mo aʻu.” (Fuaiupu 1) E lē o taʻu maia e Ieova se igoa, pau o lea, ua ia filifilia se atalii o Iese. A o agaʻi atu Samuelu i Peteleema, atonu o loo ia fia iloa, ‘E faapefea ona ou iloa po ai le atalii o Iese lea ua filifilia e Ieova?’
Ina ua taunuu Samuelu i Peteleema, ona fai lea ia Iese ma ona atalii e ō ane i le tausamiga o le taulaga. Ina ua ulufale mai Eliapo le atalii ulumatua, na ofo Samuelu i le aulelei o Eliapo. Ua manatu Samuelu ua onomea ona avea o ia ma tupu ma faapea ifo: “E moni lava o loo i luma o Ieova o lē e faauuina e ia.”—Fuaiupu 6.
Ae peitaʻi e ese le silasila a Ieova i mea. Ua fetalai mai o ia iā Samuelu: “Aua e te vaai i ona foliga, po o le maualuga o lona tino, auā ua ou teena o ia.” (Fuaiupu 7) E leʻi taaʻina Ieova i le maualuga ma le aulelei o Eliapo. E ati le silasila a Ieova i le loto o le tagata, o i inā e iloa ai lona aulelei moni.
Na taʻu atu e Ieova i a Samuelu: “Auā e lē vaai le Atua e pei o le vaai a tagata, auā o le tagata e vaai i le tino; a o Ieova e vaai i le loto.” (Fuaiupu 7) Ioe, o le loto, le tagata lilo i totonu, le puna o manatunatuga, ma uiga ma faalogona, o vala ia e tāua iā Ieova. Ua teena e lē ‘na te suʻesuʻeina loto’ Eliapo, ma atalii e toʻaono o Iese o ē na ō ane i luma o Samuelu.—Faataoto 17:3.
E toe tasi le atalii o Iese e leʻi oo mai, o Tavita le uii, o lē ‘o loo leoleoina mamoe.’ (Fuaiupu 11) Ona aami atu lea o Tavita nai le fanua ma ua sau i luma o Samuelu. Ona taʻu atu lea e Ieova iā Samuelu: “Inā tulaʻi ia ma faauu iā te ia, auā o ia lava lenā!” (Fuaiupu 12) O le mea moni o Tavita “o se tauleʻaleʻa e enaena le paʻu, e mata manaia toe aulelei.” Ae na matuā fiafia le finagalo o le Atua iā te ia ona o mea o i lona loto.—1 Samuelu 13:14.
I lenei lalolagi ua soona faamamafa ai le aulelei, o se faamāfanafanaga le iloa e lē taaʻina Ieova le Atua i foliga vaaia. E lē afāina iā te ia pe e te maualuga pe e te aulelei i le vaaiga a isi. Ae o le mea e sili ona tāua iā Ieova o le tagata i totonu, o lou loto. Pe e lē uunaʻia ai ea oe e lenā mea ia atiaʻe uiga lelei lea e te aulelei ai i le silafaga a le Atua?