O le Tusi Paia o le Afioga Moni Lea a le Atua

O LE ā le uiga o le tala a le aposetolo o Paulo ina ua ia faapea mai o le Tusi Paia “e mai i le agaga o le Atua”? (2 Timoteo 3:16) Na tusi Paulo i le gagana Eleni, ma na ia faaaogāina se upu o lona uiga “na mānavaina e le Atua.” O le uiga la o le tala a Paulo, na taʻitaʻia e le Atua e ala i lona agaga paia tusitala o le Tusi Paia, e tusia mea na faafinagaloina e le Atua.

Na faapea mai le aposetolo o Peteru, o nei tusitala o le Tusi Paia “na tautatala . . . i mea na faailoa mai e le  Atua e ala i le taʻitaʻiga a le agaga paia.” (2 Peteru 1:21) O le māfuaaga lea na faamatalaina ai foʻi e le aposetolo o Paulo, tusi o le Tusi Paia o ni “tusitusiga paia . . . lea e mafai ona faapotoina ai oe mo le faaolataga e ala i le faatuatua e tusa ai ma Keriso Iesu.”—2 Timoteo 3:15.

Ua matuā finau le toʻatele o tagata i le manatu lenei o le Tusi Paia e mai i le Atua. Ua matuā faasagatau le ʻaufaitio i le moni o le Tusi Paia, ma e pei ona taʻua e le alii poto o Sir Charles Marston, ua latou “matuā lē amanaʻia tala o le Tusi Paia.” Ua manatu nisi ua na o se “tuufaatasiga o tala faanuupō anamua, ma tala faafagogo.”

Ia Iloilo Faamaoniga

Pe e mafai la ona faatuatuaina le Tusi Paia? E tāua ona e filifili lelei i lenei mataupu. Aiseā? Auā afai e moni o loo fesootaʻi mai le Atua e ala i le Tusi Paia, o se mea valea la le teena o le Tusi Paia, aemaise e aafia ai foʻi ola o tagata. Afai e te manatu o le Tusi Paia o upu a tagata nai lo o le Afioga a le Atua, o lona uiga e leai se aafiaga malosi o le Tusi Paia e faatonutonu ai au gaoioiga, ma ou talitonuga.—1 Tesalonia 2:13.

E faapefea la ona fai lau filifiliga? O le fesili, e faapefea ona e filifili pe e te faatuatuaina tagata tou te feiloaʻi? E tasi se manatu tāua. E faigatā tele ona e faatuatuaina se tasi e te lē masani lelei ai. E faatoʻā iloa lava le faamaoni ma le maufaatuatuaina o tagata, pe a umi se taimi o e faamasani lelei iā i latou. E mafai foʻi ona e faamasani i le Tusi Paia. Aua e te talitonugofie i masalosaloga ma manatu faaituʻau lea e maluelue ai lou mautinoa i le Tusi Paia. Ia faaalu se taimi e iloilo ai faamaoniga e lagolagoina ai le manatu, o le Tusi Paia “e mai i le agaga o le Atua.”

Faasagatau Mai Tagata

Aua neʻi faateʻia oe i le mea moni e faapea, o nisi o ē e fai mai e talisapaia le Tusi Paia, o i  latou na o loo faasagatau i le moni ma le maufaatuatuaina o le Tusi Paia. O le toʻatele o le ʻaufaitofā o le Tusi Paia i aso nei, e ui lava e faapea mai o i latou o Kerisiano, ae e pei ona taʻua i se tusi, “e latou te aʻoaʻoina o le Tusi Paia o se tusi na tusia e tagata.”—New Dictionary of Theology.

Ua fesiligia e le toʻatele o le ʻaufailotu, po o ai moni na tusiaina tusi o le Tusi Paia. O se faaaʻoaʻoga, ua faapea mai nisi, e leʻi tusia e le perofeta o Isaia le tusi o Isaia. Ua latou fai mai, na tusia lenei tusi o le Tusi Paia ina ua leva ona mavae aso o Isaia. Na faapea mai Lowther Clarke i lana tusi Concise Bible Commentary, o le Tusi Paia “e maua mai i manatunatuga o tagata e toʻatele mai i augātupulaga eseese.” Ae ua teena e na faamatalaga le mea moni e faapea, na taʻua soo e Iesu Keriso ma ona soo, o Isaia na tusiaina lea tusi.—Mataio 3:3; 15:7; Luka 4:17; Ioane 12:38-41; Roma 9:27, 29.

E lē gata i lea, ua faapea mai foʻi le ʻaufaitio i le Tusi Paia e pei o J. R. Dummelow, o valoaga o le tusi o Tanielu “o ni mea ua leva ona tutupu, ae na tusia e le tusitala ina ia faafoliga e peiseaʻī o ni valoaga.” Ae o a latou faamatalaga faapena, ua latou teena ai le molimau a Iesu Keriso. Na lapataʻi Iesu e uiga i le mea na ia taʻua o “le mea e inosia e faatafuna aʻi, e pei ona faamatalaina e le perofeta o Tanielu, ua tū i le mea paia.” (Mataio 24:15) Pe e talafeagai ea ona talitonu se Kerisiano e faapea e taufaasesē Iesu Keriso, e na te lagolagoina ni mea ua uma ona tutupu ae e faafoliga atu o ni valoaga? E mautinoa lava e leai.

Pe e Tāua Ea?

Atonu e te fesili, “pe e tāua ea po o ai na tusia tusi o le Tusi Paia?” Ioe, e tāua tele. Pe e te talitonu ea i se pepa o loo tusia ai le mavaega ma le taʻutinoga a sau uō e ui lava e lē o lau uō na tusiaina lenā pepa? Seʻi faapea la ua fai atu ni tagata popoto, e taufaasesē lenā pepa, ona na tusia e ni aumea e tusa ma mea ua latou iloa e uiga i le mavaega a lau uō. Pe e lē faalēaogāina ai ea le pepa? Pe e te mautinoa o loo tusia moni ai le mavaega a lau uō?

E faapena uma lava le Tusi Paia. E lētioa a toʻatele tagata—e oo lava i ē e faapea mai o Kerisiano—e latou te teena faamatalaga a le Tusi Paia i mataupu e pei o le faamaoni, o amioga mamā, ma isi mea faapena. E fai foʻi ma e faalogo i le faaseā a tagata e faapea, “Se, o le Feagaiga Tuai lenā!” e peiseaʻī e faalētāua. O o latou lagona na e ui lava na taʻua e le aposetolo o Paulo o le Feagaiga Tuai o loo aofia pea i “tusitusiga paia” lea “e mai i le agaga o le Atua.”

Atonu e te faapea mai, “ae e lē mafai ona e teena faamaoniga a ē popoto ma le ʻaufaitofā.” E saʻo lelei oe! E tatou te matuā talisapaia saʻiliʻiliga faamaoni a ē popoto, lea ua ala ai ona tatou malamalama i uluaʻi tusitusiga o le Tusi Paia. E moni na iai ni mea sesē laiti na ofi mai i totonu o le Tusi Paia, a o faia le tele o kopi o le Tusi Paia mo le tele o senituri. Ae ia manatua, e matuā eseese le iloaina o mea sesē laiti na ofi mai i le kopiina o le Tusi Paia, ma le teena o  le Tusi Paia atoa ona e faapea o faamatalaga na faia lava e tagata.

Ia Faatuatua Pea i “Tusitusiga Paia”

A o leʻi taʻua e Paulo o le Tusi Paia e mai le Atua, na ia faamatala atu iā Timoteo le māfuaaga e tāua tele ai nei tusitusiga paia. Na ia faapea atu: “O aso e gata ai . . . o tagata amioleaga ma ē taufaasesē, e faateteleina pea lo latou leaga, o loo faasesē atu i nisi ma ua faasesēina foʻi i latou.” (2 Timoteo 3:1, 13) Sa iai i aso o Paulo tagata o ē faafoliga mai e ‘atamamai ma popoto’ o ē na faaaogā “faamatalaga taufaasesē” ina ia faasesē ai tagata ma faavaivai lo latou faatuatua iā Iesu Keriso. (1 Korinito 1:18, 19; Kolose 2:4, 8) Ina ia puipuia Timoteo mai a latou taaʻiga, na timaʻi atu Paulo iā te ia ina ia ‘tausisi pea i mea ua ia aʻoaʻoina talu ona laʻitiiti e ala mai i tusitusiga paia’ ua saunia e le Atua.—2 Timoteo 3:14, 15.

E tāua foʻi ona e faia faapena i nei “aso e gata ai.” Aua neʻi manatu faatauvaa i le mataʻutia o “faamatalaga taufaasesē” ua faia e tagata matuā atamamai. Ae ia puipuia oe lava e pei ona faia e uluaʻi Kerisiano, e ala i le faalagolago atoatoa i mea ua e aʻoaʻoina mai le Tusi Paia, le Afioga a le Atua.

E fiafia Molimau a Ieova e fesoasoani iā te oe ina ia malosi lou faatuatua i le Tusi Paia. O se faaaʻoaʻoga, e latou te faaali atu iā te oe le maufaatuatuaina o taʻiala o le Tusi Paia i taimi uma; le auala e ōgatusa ai le Tusi Paia ma mataupu faasaienisi pe a talanoaina na mataupu; ma le auala e autasi ai ona vaega uma mai le amataga seʻia oo i le faaiʻuga; le auala ua faataunuu ai ma le lē masesē ana valoaga ma le tele o isi lava mea. Pe a e finagalo i ai, e mafai ona e tusi atu i ē ua lomia lenei mekasini, mo faamatalaga ia ua fesoasoani i le faitau miliona o tagata loto faamaoni, e iloa o le Tusi Paia o le Afioga moni lea a le Atua.

[Ata i le itulau 5]

E faapefea ona e iloa pe e te talitonuina tagata e te feiloaʻi i ai pe leai?

[Ata i le itulau 6]

E tatou te lotofaafetai iā i latou na faia suʻesuʻega faamaoni, lea ua maua ai tusitusiga maufaatuatuaina o le Tusi Paia