Po o le Tusi Paia o le Afioga lea a le Atua?

“O Tusitusiga Paia uma e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu, ina ia matuā agavaa ai le tagata o le Atua, e lava saunia mo galuega lelei uma.”​—2 TIMOTEO 3:16, 17.

O SE faamatalaga mataʻina lenā a le aposetolo o Paulo i le aogā tele o le Tusi Paia! Na faatatau atu upu a Paulo i se vaega o le Tusi Paia na maua i lona vaitaimi, lea e taʻua e tagata i nisi taimi o le Feagaiga Tuai. Ae o le mea moni, e faatatau atu lana faamatalaga i tusi uma e 66 o le Tusi Paia, e aofia ai tusi na tusia e soo faamaoni o Iesu i le uluaʻi senituri T.A.

Pe e tāua iā te oe le Tusi Paia e pei ona tāua iā Paulo? O le ā sou taofi, pe na faagaee moni e le agaga o le Atua tane na tusiaina le Tusi Paia? O le talitonuga lenā o Kerisiano i le uluaʻi senituri. E leʻi femoumouaʻi lenā talitonuga i senituri na sosoo ane ai. O se faaaʻoaʻoga, na manatu Ioane Uikilifi o se faifeʻau Peretania i le senituri lona 14, o le Tusi Paia o “le fua lē masesē lenā o le mea moni.” Na faapea mai le tusi The New Bible Dictionary, e uiga i upu a Paulo o loo taʻua i luga, o le faagaeeina “e le agaga o le Atua, e faamaonia ai le moni o faamatalaga uma o loo i le Tusi Paia.”

Suia Manatu e Faatatau i le Tusi Paia

I taimi lata mai nei, ua tauau ina mou atu le talitonuga o tagata i le taʻitaʻiga a le Tusi Paia. Ua faapea mai le tusi The World’s Religions: “E iai le talitonuga o loo taliaina pea e Kerisiano uma le Tusi Paia e taʻitaʻia ma faatonutonuina a latou gaoioiga ma talitonuga.”  Ae o le mea moni lava, e lē o le mea lenā o loo tupu. Ua manatu le toʻatele o tagata, o le Tusi Paia “o uputuu a tagata lea e lē maufaatuatuaina.” E ui lava e latou te manatu o tusitala o le Tusi Paia o ni tane faatuatua, ae e latou te vāai i na tusitala o ni tane e iai foʻi o latou masei, o ē na tauivi e faamatala upu moni loloto faaleagaga, ae e leʻi lava so latou poto ma so latou malamalamaga, e pei ona tatou maua i aso nei.

O le mea moni, e matuā toʻaitiiti lava tagata i aso nei o loo faatonutonuina e le Tusi Paia o latou mafaufauga, ma gaoioiga. O se faaaʻoaʻoga, ua tatou faalogo ua fai mai tagata ua pasiā ma ua lē o toe aogā tapulaa tau amio a le Tusi Paia. Ua sui vai e tagata tulafono ma mataupu tāua o le Tusi Paia, pe e latou te matuā teena foʻi ona e lē talafeagai ma i latou. O nisi o loo faapea mai o Kerisiano ua latou teena ma le faauamaaa le tala a le Tusi Paia e faatatau i le faitaaga, mulilua, le lē faamaoni, ma le onā.—1 Korinito 6:9, 10.

Aiseā? Na taʻua e se alii poto e suafa iā Sir Charles Marston se tasi o māfuaaga i lana tusi, The Bible Is True i le amataga o le senituri lona 20. Na fai mai o ia, na vave lava ona “talia e [tagata] e aunoa ma se masalosalo le tele o manatu o le ʻautusitala i ona pō nei,” o ē na finau e uiga i le moni o le Tusi Paia. Pe e moni upu a lenā tagata i aso nei? O le ā sou taofi i manatu ma aʻoaʻoga a tagata popoto, o ē e taumafai e soloiesea le talitonuina e tagata o le Tusi Paia? Ia tagaʻi i le mataupu o sosoo mai o loo iloiloina ai lenā fesili.