Aafiaga o le Feʻau a Iesu Keriso

“O le molimau e sili ona tumau e uiga i le tagata poto mai i Kapanaumi, o le aafia pea o loto ma mafaufau o tagata i aso nei i lona soifuaga.” *—LE TUSITALA O GREGG EASTERBROOK.

E IAI aafiaga o upu. O upu ua filifilia ma le poto, e mafai ona uunaʻia ai loto, tupu ai le faamoemoe, ma suia ai olaga. E leai lava se tagata e sili ona tele aafiaga o ana upu, nai lo o Iesu Keriso. Na tusi mulimuli ane se tagata na faalogo a o fofoga atu e Iesu le Lauga taʻutaʻua i luga o le Mauga, e faapea: “Ua māeʻa fetalaiga a Iesu, ona matuā ofo ai lea o le motu o tagata i lana aʻoaʻo atu.”—Mataio 7:28.

E oo mai i aso nei, ua masani tagata i le lalolagi aoao i le tele o fetalaiga a Iesu. Seʻi manatu i ni faaaʻoaʻoga o faaupuga e ʻānoa.

“E lē mafai ona e pologa i le Atua atoa ma ʻOa.”—Mataio 6:24.

“O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

“Ia totogi atu mea a Kaisara iā Kaisara, a o mea a le Atua ia avatu i le Atua.”—Mataio 22:21.

“E sili le fiafia e maua i le foaʻi atu i lo o le talia mai.”—Galuega 20:35.

Ae e sili atu mea na faia e Iesu i lo o le na ona fai atu o ni faaupuga iloga. Na iai aafiaga o le feʻau na ia talaʻia, auā na faailoa mai ai le upu moni e uiga i le Atua, aʻoaʻo ai tagata i le auala e iloa ai mea e sili ona tāua i le olaga, ma faasino atu i le Malo o le Atua, o le vaifofō lea o mafatiaga uma. A o tatou suʻesuʻeina lenei feʻau i itulau o mulimuli mai, o le a tatou iloa ai le māfuaaga ua faaauau ai ona aafia le faitau miliona o “loto ma mafaufau” o tagata i le soifuaga o Iesu.

[Faamatalaga pito i lalo]