O Mea na Aʻoaʻo e Iesu e Uiga i le Malo o le Atua

‘Na malaga atu o ia mai i lea aai i lea aai, ma mai i lea nuu i lea nuu, ua talaʻi atu le tala lelei o le malo o le Atua.’—LUKA 8:1.

E TATOU te fiafia e talanoa e uiga i mea e tāua iā i tatou, ma mea e pele i o tatou loto. E pei ona fetalai Iesu, “o le tele o mea i le loto e tautala mai ai le gutu.” (Mataio 12:34) Pe a tatou manatu i mea na fetalai i ai Iesu i le taimi o lana faiva, ua iloa ai sa pele i le loto o Iesu le Malo o le Atua.

O le ā le Malo o le Atua? O se malo, o se pulega lea e pule ai se tupu. O le Malo la o le Atua, o se pulega ua faavaeina e le Atua. Sa tele ina talanoa Iesu e uiga i le Malo o le Atua, ma sa avea ma matua o lana feʻau. E sili atu i le faa-110 ona taʻua lenā Malo i tusi e fā o Evagelia. Ae e lē na o upu na aʻoaʻo atu ai Iesu. O ana gaoioiga na aʻoaʻo atu ai le tele o mea e uiga i le Malo o le Atua, ma mea o le a faia e lea Malo.

O ai le Tupu? E leʻi palotaina e tagata le Tupu o le Malo o le Atua. Ae o le Atua lava ia na filifilia lenei Tupu. Na faaalia e Iesu i ana aʻoaʻoga, o ia lea na filifilia e le Atua e avea ma Tupu.

Na silafia e Iesu na valoia e le Tusi Paia e faapea, o le a pule le Mesia folafolaina i se Malo e tumau e faavavau. (2 Samuelu 7:12-14; Tanielu 7:13, 14; Mataio 26:63, 64) Ia manatua, na taʻutino atu e Iesu o ia lava o le Mesia na valoia. O lea la, na faailoa atu e Iesu o ia o le Tupu na tofia e le Atua. (Ioane 4:25, 26) Ua talafeagai ai la ona faaaogā e Iesu i nisi o taimi le faaupuga o “loʻu malo.”—Ioane 18:36.

Na aʻoaʻo foʻi e Iesu o le a iai isi e pule faatasi ma ia i le Malo. (Luka 22:28-30) Na ia taʻua i latou nei e pule faatasi ma ia o le “lafu mamoe itiiti,” auā e faatapulaa lo latou faitau aofaʻi. Na fetalai atu o ia iā i latou: “Ua finagalo malie lo outou Tamā e tuuina atu le malo iā te outou.” (Luka 12:32) Ua faaalia i le tusi mulimuli o le Tusi Paia, e 144,000 le aofaʻi o ē o le a maua le faaeaga e pule faatasi ma Keriso.—Faaaliga 5:9, 10; 14:1.

O fea o iai le Malo? Na faapea atu Iesu i le tupu o Roma, o Ponotio Pilato: “O loʻu malo e lē mai le lalolagi lenei.” (Ioane 18:36) O le a lē pule le Malo o le Atua lea e taʻitaʻia e Keriso, e ala i ni sui faaletagata. Sa taʻua soo e Iesu le Malo o le Atua o “le malo o le lagi.” * (Mataio 4:17; 5:3, 10, 19, 20) O lea la, o le Malo o le Atua o se pulega i le lagi.

Sa faatalitalia e Iesu e toe foʻi atu i le lagi pe a mavae le taimi na iai o ia i le lalolagi. Na  fetalai o ia, i inā, o le a ia “sauni se nofoaga,” ma maua ai le avanoa mo ē e pule faatasi ma ia, e aufaatasi ai ma ia.—Ioane 14:2, 3.

O le ā e faataunuuina e le Malo? Na aʻoaʻo e Iesu lana ʻaufaalogologo ia tatalo i le Atua: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) Ua faia le finagalo o le Atua i le lagi. O le Malo o le auala lea e faataunuuina ai le finagalo o le Atua mo le lalolagi. Ina ia faataunuu lenā mea, o le a faia e le Malo ni suiga tetele i lenei lalolagi.

O ā mea o le a faia e le Malo i le lalolagi? Na aʻoaʻo e Iesu o le a soloiesea e le Atua mea leaga, e ala i le aveesea o ē e faia mea leaga. (Mataio 25:31-34, 46) O lona uiga o le a faaiʻuina ituaiga uma o faiga piʻopiʻo ma le amioleaga. Na aʻoaʻo e Iesu o le a tumu le lalolagi i tagata “agamalu,” amiotonu, alolofa, “lotomamā,” ma filemu.—Mataio 5:5-9.

Po o le a ola na tagata faamaoni i se lalolagi ua faapolusioneina? E leai! Na folafola mai e Iesu o le faia e le Malo o le Atua suiga ofoofogia i le lalolagi. Na faapea atu se tagata na faatautau i tafatafa o Iesu: “Iesu e, ia e manatua mai aʻu pe a e oo i lou malo.” Na tali mai Iesu: “E moni ou te fai atu iā te oe i le asō, O le a ta faatasi ma oe i le Parataiso.” (Luka 23:42, 43) Ioe, o le a suia e le Malo o le Atua lenei lalolagi atoa e avea ma parataiso, e pei o le parataiso sa iai i le faatoʻaga i Etena.

O ā isi mea o le a faia e le Malo mo le fanau a tagata? E sili atu mea na faia e Iesu i lo o le na ona folafola atu o mea o le a faia e le Malo o le Atua. Sa ia faataʻitaʻia foʻi mea o le a faia e le Malo. Na faia e Iesu le tele o faamālōlōga faavavega, ma faaalia ai i se fua itiiti mea tetele o le a ia faia i le lumanaʻi, a o  pule lona Malo. Ua faapea mai le Tusi Paia e uiga iā Iesu: “Ona ia femalagaaʻi lea i Kalilaia uma, ua aʻoaʻo atu i o latou sunako ma talaʻi atu le tala lelei o le malo, ma faamālōlō i faamaʻi eseese uma ma maʻi tigā eseese uma o tagata.”—Mataio 4:23.

Na faamālōlō e Iesu ituaiga o maʻi eseese uma. Na ia “faapupulaina mata o se tasi na fanau mai ua tauaso.” (Ioane 9:1-7, 32, 33) I le na o se paʻi lemū atu, na faamālōlō ai e Iesu se tamāloa na maua i le maʻi leaga o le lepela. (Mareko 1:40-42) Ina ua aumai iā te ia “se tamāloa tutuli ma e tau lē mafai ona tautala,” na faataʻitaʻia e Iesu e mafai ona ia faamālōlō tagata ina ia mafai ona “faalogo ē na tutuli, ma tautatala ē e leʻi mafai ona tautatala.”—Mareko 7:31-37.

Na iai i le Tupu tofia a le Atua le mana e manumalo ai, e oo lava i le oti. E tolu ni tala o loo i le Tusi Paia, o loo taʻua ai le toe faatūina e Iesu o ni tagata na feoti. Na toe faatūina e ia le tama e toʻatasi a se fafine ua oti lana tane, se teineitiiti e 12 ona tausaga, ma lana uō pele o Lasalo.—Luka 7:11-15; 8:41-55; Ioane 11:38-44.

I le faamatalaina o le lumanaʻi matagofie lea o le a olioli ai tagatānuu o le Malo o le Atua, na valoia e Iesu e ala i le aposetolo o Ioane e faapea: “Faauta! Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.” (Faaaliga 1:1; 21:3, 4) Seʻi tau ina manatu i se lalolagi e aunoa ma ni loimata o le faanoanoa, leai se tigā, ma e leai foʻi se oti! Ona faataunuuina atoatoa ai lea o le tatalo ia faia le finagalo o le Atua i le lalolagi, e pei ona faia i le lagi.

O afea e oo mai ai le Malo o le Atua? Na aʻoaʻo e Iesu o le a amata faatasi lana pulega o se Tupu, ma le vaitaimi faapitoa lea na ia taʻua o lona “faatasi mai.” Na faamatala auʻiliʻili mai e Iesu se valoaga e iloa ai le taimi o le a ia faatasi mai ai o se tupu. O le a faailogaina lenei vaitaimi i faalavelave e tutupu i le lalolagi aoao, e aofia ai taua, oge, mafuiʻe, faamaʻi, ma le faateleina o le solitulafono. (Mataio 24:3, 7-12; Luka 21:10, 11) Talu mai le 1914, le tausaga lea na pa ai le Taua Muamua a le Lalolagi, ua tutupu nei mea ma le tele o isi vala na valoia e Iesu. O lea la, ua pule nei Iesu o se Tupu. Ua lē pine ona oo mai lea o le Malo, ma faia ai le finagalo o le Atua i le lalolagi. *

O le ā le uiga o le oo mai o le Malo o le Atua iā te oe lava ia? E faalagolago lava i le auala ua e filifili e tali atu ai i le feʻau a Iesu.

[Faamatalaga pito i lalo]