Po o Taʻu Mai i le Tusi Paia le Tala Atoa e Uiga iā Iesu?

Pe faamata na ola pea Iesu, ae e leʻi maliu i Kolokota e pei ona fai mai ai le Tusi Paia? Pe moni na faaipoipo o ia iā Maria le Makatala ma maua ai sa la fanau? Pe faamata o ia o se tagata fai mea faataulāitu o lē na teena fiafiaga uma o le lalolagi? Pe moni na ia aʻoaʻo ni talitonuga e ese mai i mea ua tatou faitau ai i le Tusi Paia?

E LEʻI leva tele ona salalau atu nei manatu, a ua olaola ona o ata tifaga lauiloa ma tusi faitau. E lē gata i tala fatu, ae e iai foʻi le tele o tusi faitau ma tusitusiga, ua taulaʻi atu ai manatu i tusitusiga faa-apokerifa (o tusitusiga e lē moni) mai i lona lua ma lona tolu o senituri T.A., lea e faapea ua faaalia ai mea moni e uiga iā Iesu, ia e lē o maua i tusi o le Evagelia. Pe moni na tala? Pe mafai ona tatou mautinoa ua taʻu mai i le Tusi Paia le tala moni atoa e uiga iā Iesu?

Ina ia tali na fesili, e lelei ona tatou iloiloina ni mataupu faavae se tolu. Muamua, e tatau ona tatou iloa faamatalaga tāua e uiga i  tagata na tusia tala a Evagelia, ma le taimi na tusia ai; lua, e tatau ona tatou iloa po o ai na filifilia tusi e tatau ona aofia ai i le Tusi Paia, ma na faapefea ona faia; ma lona tolu, e manaʻomia ni faamatalaga e uiga i tusitusiga faa-apokerifa ma le auala e ese ai mai i tusi o le Tusi Paia. *

O Anafea na Tusia ai le Tusi Paia Eleni, ma o Ai na Tusiaina?

E tusa ai ma nisi faamatalaga, na tusia le Evagelia a Mataio i tuā lava pe tusa o le 41 T.A., i lona valu o tausaga talu ona maliu Keriso. E manatu le toʻatele o tagata atamamai na tusia lenā tusi i se taimi mulimuli ane, peitaʻi e ioe le toʻatele o tusi uma o le Tusi Paia Eleni na tusia a o faagasolo le uluaʻi senituri T.A.

Sa soifua pea i lenā taimi i latou na vāaitino i le soifuaga o Iesu, o lona maliu ma le toetū; ma sa mafai ona latou faamaonia faamatalaga a Evagelia. Sa ono faigofie foʻi ona latou faaalialia so o se mea sesē. Sa faapea mai le Polofesa o F. F. Bruce: “O se tasi o auala sa sili ona malosi i le amataga o le talaʻiga a le ʻauaposetolo, o le talanoa atu lea e tusa ai o mea ua iloa e le ʻaufaalogologo; e leʻi na ona latou faapea atu, ‘O molimau i matou i nei mea,’ ae na faapea atu foʻi, ‘E pei foʻi ona outou iloa’ (Galuega 2:22).”

O ai na tusia le Tusi Paia Eleni? Na aofia ai iā i latou nisi o aposetolo e toʻasefululua o Iesu. O i latou nei ma isi tusitala o le Tusi Paia, e pei o Iakopo, Iuta, ma atonu o Mareko, sa iai i le aso o le Penetekoso i le 33 T.A., ina ua faavaeina le faapotopotoga Kerisiano. O tusitala uma, e aofia ai ma Paulo, sa galulue faatasi ma le uluaʻi vaega pule o le uluaʻi faapotopotoga Kerisiano, e aofia ai le ʻauaposetolo ma toeaina i Ierusalema.—Galuega 15:2, 6, 12-14, 22; Kalatia 2:7-10.

Na faatonu e Iesu ona soo ia faaauau le galuega talaʻi ma le aʻoaʻo atu lea na ia amataina. (Mataio 28:19, 20) Na ia faapea atu foʻi: “O lē e faalogo iā te outou, e faalogo foʻi o ia iā te aʻu.” (Luka 10:16) E lē gata i lea, na ia folafola atu iā i latou o le a avatu e le agaga paia o le Atua, po o le mana galue le malosi e manaʻomia ina ia faatino ai lenā galuega. O lea, ina ua maua tusitusiga mai i le ʻauaposetolo po o ē na latou galulue faatasi, o tane o ē na faamaonia na faamanuiaina e le agaga paia o le Atua—sa talia e uluaʻi Kerisiano na tusi, e mai i le Atua.

Sa faamaonia e nisi tusitala o le Tusi Paia le pule ma le fesoasoani a le Atua i o latou uso tusitala. O se faaaʻoaʻoga, na taʻua e le aposetolo o Peteru tusi a Paulo, ma faatutusa ma “isi mau uma o Tusitusiga Paia.” (2 Peteru 3:15, 16) Na iloa e Paulo, na fesoasoani le agaga o le Atua i le ʻauaposetolo ma isi perofeta Kerisiano, i le tusiaina o le Tusi Paia.—Efeso 3:5.

O lea la, ua matuā mautinoa le maufaatuatuaina o tusi a Evagelia, ma e mai i le Atua. E lē o ni tala o le vavau po o ni tala fatu. O ni faamaumauga o le talafaasolopito na faia ma le faaeteete, e faavae i faamaoniga mai i ē na vāaitino i ai, ma na tusia e tagata na taʻitaʻia e le agaga paia o le Atua.

O Ai na Filifilia Tusi o le Tusi Paia?

Ua faapea mai nisi tusitala, o tusi e tatau ona aofia i le Tusi Paia Eleni, na filifilia i senituri mulimuli ane e se lotu na pule malosi i lenā taimi, i le taʻitaʻiga a le Emeperoa o Konesetatino. Ae peitaʻi, ua faaalia i mea moni, e lē saʻo lea manatu.

O se faaaʻoaʻoga, seʻi mātau le faamatalaga a le Polofesa o le Talafaasolopito o le Lotu, o Oskar Skarsaune: “E leʻi filifilia e se komiti o se lotu po o se tagata e toʻatasi, tusitusiga e tatau ona aofia pe e lē aofia ai i le Feagaiga Fou . . . Na faigofie le fuafuaga ma malamalamagofie: O tusitusiga mai i le uluaʻi senituri T.A., lea e manatu i ai na tusia e le  ʻauaposetolo po o ē na latou galulue faatasi, na talitonu i ai o ni tusi e maufaatuatuaina. E leʻi aofia ai isi tusitusiga, tusi, po o ‘⁠tusi e taʻu o evagelia,’ ia na tusia mulimuli ane . . . Na māeʻa lenā filifiliga a o leʻi taitai oo i taimi o Konesetatino, ma a o leʻi taitai ona faavaeina lana lotu malosi. E lē o le lotu malosi, ae o le lotu a le ʻaumaturo na aumaia iā i tatou le Feagaiga Fou.”

Ua faamatala e Ken Berding, o se polofesa lagolago o lē na suʻesuʻeina le Tusi Paia Eleni, le auala na filifilia ai tusi o le Tusi Paia: “E leʻi filifilia e le lotu tusi e tatau ona iai i le Tusi Paia; ae e talafeagai ona faapea atu, na talia e le lotu tusi ia ua leva ona manatu i ai Kerisiano, o le Afioga moni a le Atua.”

Peitaʻi, pe e na o Kerisiano lotomaulalo o le uluaʻi senituri na filifilia tusi e aofia ai i le Tusi Paia? Ua taʻu mai e le Tusi Paia iā i tatou, sa aofia ai se mea e sili atu ona tāua ma malosi.

E tusa ai ma le Tusi Paia, o se tasi o meaalofa faavavega a le agaga na tuuina mai i le amataga o le faapotopotoga Kerisiano, o le ‘⁠iloa o afioga mai i le Atua.’ (1 Korinito 12:4, 10) O lea la, na tuuina atu i nisi o na Kerisiano se tomai e sili atu i lo le mea e masani ai, ina ia iloa ai le eseesega o faamatalaga mai i le Atua ma faamatalaga e lē mai i le Atua. Ua mautinoa la e Kerisiano i aso nei, o tusitusiga uma o loo aofia ai i le Tusi Paia, e mai i le Atua.

E manino mai la, ua leva ona filifilia tusi e tatau ona iai i le Tusi Paia, i le taʻitaʻiga a le agaga paia. E mai i le vaega mulimuli o le senituri lona lua T.A., na faia ai e nisi o tagata tusitala faamatalaga e uiga i le saʻo aʻiaʻi o tusi o loo iai i le Tusi Paia. Ae peitaʻi, e leʻi filifilia e nei tusitala tusi e tatau ona iai i le Tusi Paia; sa na ona latou molimau i tusi ua uma ona talia e le Atua e ala i ona sui, o ē na taʻitaʻia e lona agaga.

Ua saunia foʻi e manusikulipi mai anamua se faamaoniga mataʻina e lagolagoina ai tusi o loo iai i le Tusi Paia, lea ua talia e le toʻatele i aso nei. E sili atu i le 5,000 manusikulipi o le Tusi Paia Eleni o loo iai i le uluaʻi gagana, e aofia ai nisi mai i le senituri lona lua ma lona tolu. O tusitusiga nei, sa manatu i ai i uluaʻi senituri T. A. e mai i le Atua, ma na kopiina ma faasalalauina atu i le lalolagi, ae e lē o tusitusiga faa-apokerifa.

Ae peitaʻi, o le faamaoniga e sili ona tāua o le saʻo aʻiaʻi o le Tusi Paia, o loo iai i le Tusi Paia lava ia. E ōgatusa tusitusiga o loo i le Tusi Paia Eleni, ma “le faaaʻoaʻoga o upu aogā” lea e tatou te maua i le Tusi Paia atoa. (2 Timoteo  1:13) Ua uunaʻia ai le ʻaufaitau ia alolofa, tapuaʻi, ma auauna iā Ieova, ma lapataʻi mai e faasaga i talitonuga faanuupō, faatemoni, ma le tapuaʻi atu i meafaiola. E saʻo lelei e tusa ma le talafaasolopito, ma o loo iai valoaga moni. Ua faalaeiau ai foʻi le ʻaufaitau ina ia alolofa i o latou uso a tagata. Ua iai i tusi o le Tusi Paia Eleni na manatu mataʻina. Pe e faapena tusitusiga faa-apokerifa?

E Faapefea Ona Ese Tusitusiga Faa-Apokerifa?

E matuā ese lava tusitusiga faa-apokerifa mai i tusitusiga o loo iai i le Tusi Paia. Na tusia nei tusi faa-apokerifa pe tusa o le ogatotonu o le senituri lona lua, a ua leva ona iai tusitusiga o loo i le Tusi Paia. Ua faaalia i nei tusi ni faamatalaga e uiga iā Iesu ma le faa-Kerisiano, e lē ōgatusa ma le Tusi Paia.

O se faaaʻoaʻoga, o loo taʻua i le Evagelia faa-apokerifa a Toma le tele o faamatalaga uigaese e faapea na faia e Iesu, e pei o le faapea mai o le a ia faaliliuina Maria e avea o se tane, ina ia mafai ai ona ulu atu i le Malo o le lagi. O loo faamatala i le Evagelia Faatamaitiiti a Toma le tamaitiiti o Iesu, o se tamaitiiti e agaleaga o lē na māfua ai ona oti le isi tamaitiiti. Ua faamamafa i tusi faa-apokerifa ua taʻua o Galuega a Paulo ma Galuega a Peteru, e matuā sā le faia o feusuaʻiga, ma ua faapea mai foʻi ua uunaʻia e aposetolo fafine ia nonofo ese mai i a latou tane. Ua taʻua i le Evagelia a Iuta Iesu o loo ata i ona soo, ona o loo latou tatalo i le Atua a o faia se taumafataga. O na manatu e matuā feteenaʻi lava ma mea o loo tusia i tusi o le Tusi Paia.—Mareko 14:22; 1 Korinito 7:3-5; Kalatia 3:28; Eperu 7:26.

O le tele o tusitusiga faa-apokerifa, o loo atagia mai ai talitonuga a tagata Gnostics, o ē e talitonu e lē o se Atua lelei Lē na foafoaina mea, o Ieova. Ua latou talitonu foʻi e lē moni le toetū, o meafaitino uma e leaga, ma o Satani o le pogai o faaipoipoga ma le fanautama.

Ua faaigoa nisi tusi faa-apokerifa i igoa o tagata o le Tusi Paia, ae e lē saʻo. Pe ona o ni faufauga leaga na lē aofia ai nei tusi i le Tusi Paia? Na faapea mai se tagata poto i le faa-apokerifa, o M. R. James: “E lē faapea e iai se tasi na taofia le faaaofia ai o nei tusi i le Feagaiga Fou: ae ona e matuā lē ōgatusa manatu o nei tusi ma manatu o loo i le Tusi Paia, ua manino mai la, e lē o ni tusi o le Tusi Paia.”

Na Lapataʻi Mai Tusitala o le Tusi Paia o le a Fulitua Tagata i le Upu Moni

I tusitusiga o loo i le Tusi Paia, o loo iai ni lapataʻiga e uiga i le oo mai o le fulitua i le upu moni, lea o le a faaleagaina ai le faapotopotoga Kerisiano. Ma na amata lenei fulitua i le upu moni i le uluaʻi senituri, ae na taofiofia e le ʻauaposetolo le salalau atu. (Galuega 20:30; 2 Tesalonia 2:3, 6, 7; 1 Timoteo 4:1-3; 2 Peteru 2:1; 1 Ioane 2:18, 19; 4:1-3) O na lapataʻiga, ua malamalama ai i le uiga o tusitusiga e feteenaʻi ma aʻoaʻoga a Iesu, ia na aliaʻi mai ina ua maliliu le ʻauaposetolo.

O le mea moni, o na tusitusiga e foliga mai ua tuai, ma e tāua i nisi o tagata popoto ma le ʻautusitala o le talafaasolopito. Ae seʻi manatu: Ae faapefea pe afai e aoaoina e tagata popoto ni tusitusiga e lē moni ua lomia i aso nei, atonu e maua mai i ni mekasini e faia tala taufaaleaga, ma tusi a lotu e ese o latou talitonuga, ma teu i se pusa uʻamea? Pe a mavae le tele o tausaga, po o le a avea na tusitusiga ma mea e moni ma maufaatuatuaina? Pe a mavae le 1,700 tausaga, po o le a avea tala pepelo ma faamatalaga valea o loo i na tusitusiga ma mea moni, ona ua matuā tuai na tusitusiga?

E matuā leai lava! E faapena foʻi faamatalaga e faapea na faaipoipo Iesu iā Maria le Makatala, ma isi faamatalaga faavalevalea mai i tusi faa-apokerifa. Aiseā e faatuatua ai i na faamatalaga e lē moni, aemaise o lea ua iai faamatalaga moni? O mea uma e finagalo le Atua ia tatou iloa e uiga i lona Alo, o loo iai i le Tusi Paia—o se faamaumauga e mafai ona tatou faatuatuaina.

[Faamatalaga pito i lalo]

[Siata/Ata i le itulau 26]

(Tagaʻi i le lomiga mo le ata atoa)

SOIFUAGA O IESU LE TUSIAINA O LE VAEGA LE TUSIAINA O TUSI

FAA-ELENI O LE TUSI PAIA FAA-APOKERIFA

2 T.L.M. 33 T.A. 41 98 130 300

[Ē Ana le Ata]

Kenneth Garrett/National Geographic Image Collection

[Ata i le itulau 28]

Na faia e le aposetolo o Paulo ni vavega, e aofia ai le toe faatūina o se tasi, ma matuā faamaonia ai na lagolagoina o ia ma ana tusitusiga e le agaga o le Atua