O Auala e Fiafia ai le Aiga

Aʻoaʻo Fanau ia Iloa o Latou Tiutefai

Siaosi: * “O le mea lava lea e tupu i afiafi uma. E faataatitia solo e loʻu atalii o Mikaele, e fā tausaga, ana meataalo i le fale. Na ou taumafai e faatonu o ia e ao ana meataalo a o leʻi moe. Ae faalii Mikaele ma ee. O nisi taimi na ou fiu ai ma ee atu iā te ia, ae ua atili ai le faafitauli. Na ou manaʻo e moe filemu o ia. Ona ou lē toe fai lea i ai, ae ou aoina ana meataalo.”

Emelē: “Na amata le faafitauli ina ua 13 tausaga o laʻu tama teine o Sieni, na faigatā ona ia malamalama i le faatonuga a lona faiaʻoga i se poloketi a le aʻoga. Na atoa le itula o tagi Sieni ina ua foʻi mai i le aʻoga. Na ou fai i ai e talosaga atu mo se fesoasoani i le aʻoga, ae fai mai Sieni e ese le lē alofa o le faiaʻoga, ma e fefe e talanoa iā te ia. Na pau le mea na ou mafaufau i ai, o le alu i le aʻoga e talanoa saʻo i le faiaʻoga. Na ou manatu, e leai se feʻau a se tagata e fai ai faapea si aʻu tama!”

PE E faapena ou lagona e pei o Siaosi ma Emelē? E pei o na mātua, e faigatā i le toʻatele o mātua ona vaai atu o tauivi se tamaitiiti ma se faafitauli, pe lē fiafia. O le natura lava o mātua, o le taumafai lea e puipuia a latou fanau. Ae peitaʻi, o tulaga e pei ona faamatalaina i luga, na maua ai e na mātua se avanoa e aʻoaʻo ai a la fanau ia iloa o la tiutefai. O le mea moni, e eseese ni lesona e aʻoaʻoina e se tamaitiiti e 4 tausaga ma le 13 tausaga.

O lea la, e lē mafai ona e puipuia lau tama i taimi uma mai i faafitauli o le olaga. E iai le taimi o le a tuua ai e le tamaitiiti lona tamā ma lona tinā ae “tauave . . . lana avega,” o ona tiutefai. (Kalatia 6:5; Kenese 2:24) Ina ia lē ola faalagolago fanau i mātua, e tatau i mātua ona taulaʻi i le sini o le aʻoaʻoina o i latou ina ia avea ma tagata matutua e lē manatu  faapito, e agaalofa, ma ia iloa faatino o latou tiutefai. E lē o se tiute tauave faigofie mo mātua!

O le mea e lelei ai, e maua e mātua se faaaʻoaʻoga lelei mai iā Iesu ma le auala na ia feagai ai ma ona soo. O Iesu, e lē o se matua. Ae o lona sini i le filifilia ma le toleniina o ona soo, o le faamalosia lea o i latou e fai le galuega, e oo lava i le taimi na lē toe faatasi ai ma i latou. (Mataio 28:19, 20) O le mea na faataunuuina e Iesu, e talitutusa ma le sini o loo faamoemoe mātua ina ia ausia, o le tausi aʻe o se fanau e iloa o latou tiutefai. Seʻi mafaufau i vala e tolu o le faaaʻoaʻoga na faataatia e Iesu mo mātua.

Ia “Faia le Faaaʻoaʻoga” mo Lau Tama

A o lata i lona maliu, na fetalai atu Iesu i ona soo: “Ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.” (Ioane 13:15) E tatau foʻi i mātua ona faamatala ma faaaʻoaʻo atu le uiga o le iloa ona faatino tiutefai.

Ia fesili ifo iā te oe: ‘Po o oʻu talatalanoa fiafia e faatatau i le faatinoina o oʻu tiutefai? Po o oʻu faamatala atu lagona faamalieina i le galue malosi mo isi? Po o le mea ea ou te faitio ma ou faatusatusaina aʻu i isi e faigofie o latou olaga?’

O le mea moni, e leai se tasi e lelei atoatoa. E tatou te lagona uma le tele o a tatou avega tauave i nisi taimi. Peitaʻi, e aupito i malosi lava lau faaaʻoaʻoga i le fesoasoani i lau fanau e iloa le tāua o le faatino o latou tiutefai.

IA FAATAʻITAʻI MEA NEI: Afai e mafai, ia alu ma ave lau tama i le galuega mai i lea taimi i lea taimi, ma faaali i ai lau galuega e fai e lagolago ai le tulaga tautupe a le aiga. Ia ō faatasi ma lau tama e fai se galuega mo se tasi o loo manaʻomia le fesoasoani. Pe a uma, ona talatalanoa faatasi lea i le fiafiaga e maua ona o le faataunuuina o lenā tiutefai.—Galuega 20:35.

Ia Talafeagai Mea e Faatalitalia

Na silafia e Iesu, e umi se taimi ona faatoʻā mafai lea e ona soo ona faatinoina matafaioi ma tiutefai o loo ia faatalitalia i latou e fai. Na ia faapea atu iā i latou: “E tele mea ou te fia taʻu atu iā te outou, ae e lē mafai ona outou malamalama i na mea uma i le taimi nei.” (Ioane 16:12) E leʻi talosaga vave atu Iesu i ona soo e latou te faia mea na o i latou. Nai lo o lea, e tele se taimi na ia aʻoaʻoina ai i latou i le tele o mea. Na ia faatoʻā auina atu ona soo na o i latou, ina ua ia silafia ua lava saunia i latou.

E lē talafeagai foʻi i mātua le talosaga atu i le fanau ina ia faatino ni tiutefai e faia e tagata matutua, a o leʻi mafai ona latou faia. E ui i lea, a o tuputupu aʻe le fanau, e ao ona mafaufau mātua po o ā ni feʻau e talafeagai ma i latou. O se faataʻitaʻiga, e tatau ona aʻoaʻoina e mātua le fanau ina ia iloa tū mamā, ia teu o latou potu, ia vave taunuu i mea, ma ia iloa faasoasoa lelei tupe. A amata loa ona aʻoga le tamaitiiti, e ao i mātua ona faatonuina o ia ina ia manatu mamafa i ana meaaʻoga, o se tiutefai tāua lea.

E tele isi mea e fai e mātua e ese mai i le tuuina atu o tiutefai i le fanau. E tāua foʻi ona latou fesoasoani i le fanau ina ia taulau manuia. Na iloa e Siaosi lea na taʻua muamua, o se tasi o māfuaaga na ala ai ona lē fiafia Mikaele i le aoina o ana meataalo, ona na faigatā tele mo ia. Na fai mai Siaosi: “Nai lo o le ee iā Mikaele e ao ana meataalo, na ou aʻoaʻoina o ia i se auala e fai ai.”

O le ā le mea maʻoti na ia faia? Na faapea mai Siaosi: “Muamua lava, na ou faatulaga se taimi patino e ao ai meataalo i pō taʻitasi. Ona ma ō faatasi lea ma Mikaele, e auauaʻi ona ao mai meataalo i le potu. Na fai faatauvā e vaai po o ai e vave lana ao. E leʻi umi, ae amata ona avea ma ana masani a o leʻi moe. Na ou fai iā Mikaele afai e vave lana gaoioi, ou te faitauina se tala faaopoopo mo ia. Ae afai e tuai, o le a faapuupuu le tala.”

 IA FAATAʻITAʻI MEA NEI: Ia tilotilo po o le ā le mea e mafai ona fai e lau tama, ina ia sologa lelei ai feʻau a le tou aiga. Ia fesili ifo iā te oe, ‘Po o iai ea ni mea o loo oʻu faia pea mo laʻu fanau, e mafai lava ona latou faia?’ Afai o iai, ia galulue ma lau fanau seʻia oo ina e mautinoa ua mafai ona latou faia lenā feʻau. Ia faamanino atu i ai, e iai āuga lelei pe leaga, e faalagolago i le auala e fai ai e le fanau a latou feʻau. Ona faamatilatila lea i ai o āuga, po o le latou mauaina o se taui.

Faia ni Faatonuga Patino

I le pei o faiaʻoga lelei uma, na silafia e Iesu o le auala sili e aʻoaʻoina ai se mea, o le faatino o lenā mea. O se faataʻitaʻiga, ina ua silafia e Iesu ua lava saunia ona soo, ona “aauina atu [lea o] i latou taʻitoʻalua e muamua atu iā te ia, i aai uma ma nofoaga o le a ia maliu atu i ai.” (Luka 10:1) Peitaʻi, e leʻi tuua e Iesu i latou e fai mea i la latou lava auala. A o leʻi auina atu i latou e ō, na ia tuuina atu ni faatonuga patino. (Luka 10:2-12) Ina ua toe foʻi mai ona soo ma faamatala mai le taulau manuia o le latou talaʻiga, na faamālō ma faalaeiau i latou e Iesu. (Luka 10:17-24) Na ia faailoa atu lona faatuatuaina o o latou tomai, ma lona finagalo malie.

O le ā lau mea e fai pe a faigatā ni tiutefai e gafa ma lau fanau? Pe e te taumafai e leoleoina lau fanau mai i mea e matataʻu ai, ma puipuia i latou mai i mea e faanoanoa ma lē taulau ai? Atonu e te gaoioi loa e fesoasoani i lau tama, pe e te faatinoina foʻi lenā tiutefai.

Ae seʻi mafaufau ifo: O so o se taimi e te faanatinati ai e “fesoasoani” i lau tama, o le ā se manatu o loo e faailoa atu? Po o e faailoa atu ea lou maufaatuatuaina o i latou, ma e te talitonu e mafai ona latou faia? Po o le mea ea o loo e faailoa atu o loo laiti pea, ma o loo faalagolago atu iā te oe mo mea uma lava?

O se faataʻitaʻiga, na faapefea ona feagai Emelē ma le faafitauli a lana tama, lea na taʻua muamua? Nai lo le aiā, na tuu atu iā Sieni e talanoa saʻo i lona faiaʻoga. Na tusia faatasi e Emelē ma Sieni se lisi o ni fesili e alu ma Sieni i le aʻoga. Ona la talatalanoa lea po o le ā tonu le taimi e talanoa ai i le faiaʻoga. Na la faataʻitaʻia foʻi le talanoaga e ono fai e Sieni ma le faiaʻoga. Na faapea mai Emelē: “Na maua e Sieni le lototele e talanoa atu ai i lona faiaʻoga, ma na faamālō i ai lona faiaʻoga. Na mitamita Sieni i lenei mea, faapea foʻi ma aʻu.”

IA FAATAʻITAʻI MEA NEI: Ia tusi i lalo se luʻitau o loo fetaiaʻi ma lau tama. Ona tusi lea i autafa o le luʻitau le mea e te faia e fesoasoani ai i lau tama ina ia manumalo, e ala i le tuu atu pea iā te ia e feagai ma le luʻitau. Ia faataʻitaʻi ma lau tama ni gaoioiga e manaʻomia ina ia manumalo ai. Ia faailoa atu lou faatuatuaina o tomai o lau tama.

Afai e te puipuia i taimi uma lau fanau mai i luʻitau, ua faafaigatā ai la ona latou taulimaina luʻitau o le olaga. Nai lo o lea, ia faalototele lau fanau e ala i le aʻoaʻoina o i latou e talia tiutefai. O se tasi lenā o meaalofa sili e te tuuina atu iā i latou.

[Faaopoopoga i lalo]

IA FESILI IFO IĀ TE OE . . .

▪ Pe e talafeagai mea o loo oʻu faatalitalia e fai e laʻu fanau?

▪ Po ou te taʻu atu ma faaali atu iā i latou mea e manaʻomia ona faia e taulau ai?

▪ O le ā le taimi mulimuli na ou faalaeiau ma faamālō ai i laʻu tama?