O se Tusi Mai i Aferika i Saute

“Aiseā e Fia Tū ai Fua se Isi i Inei?”

UA LAPATAʻI mai se faailoilo i autafa o le auala vaiti o le nuu: “FAAETEETE I LENEI VAIPANOA—TELE LE GAOI MA FAIGA FAATALITANE.” Ua faatū la matou taavale i autafa o le auala pefua i talaane o isi taavale o loo faatalitali i lalo o se faailoilo telē, o loo faasino i se faletalimālō manaia ma se fale pelē tupe e lē mamao atu. Ua alamū ane taavale mananaia ma matou mātauina ai foliga o tagata o loo tilotilo mai, e pei e fia iloa: ‘⁠Aiseā e fia tū ai fua se isi i inei?’

Ina ua tū la matou taavale, ona matou ō atu lea i se vaega o tagata ofu lelei o loo tutū i le paolo o le faailoilo telē. O loo iai i la matou vaega tagata mai le tele o gagana ma lanu eseese, o se mea e seāseā vaaia i Aferika i Saute. Ua matou malaga mai i lenei vaipanoa e tusa ma le 60 maila (100 km) i mātū i sisifo o Johannesburg, ina ia talaʻi atu le tala lelei i ē e mau i nei nuu.

Ua talanoa puupuu i se mau o le Tusi Paia ma faia fuafuaga mo le talaʻiga. Ua uma le tatalo ona matou taliu lea i a matou taavale. Ua iloa mamao atu fale ma faleoo tū tū solo o le nuu. O loo i autafa o fale faaputuga maualuluga o palapala mai i nofoaga e eli ai le minerale tāua, o le platinum. E matitiva tagata, ae e tele le ʻoa o loo i lalo o lo latou laueleele.

O loo matou faatasi ma loʻu toʻalua ma mālō e toʻalua mai i Siamani, ma ua amata lo matou taeao i le asiasi atu i aiga. E tusa ma le tasi vaetolu o tagata i inei e lē faigaluega, ma e faatauvaa lava o latou fale. O tino ma taualuga o fale e fai i apa, e faatiʻetiʻe i laupapa e lē mau lelei. Ona tutuʻi faamau lea i fao lapopoʻa e taofi i momono o fagu pia, ia lē ati ai fao i apa.

A o ō atu i fale o aiga, e matou te faatalofa atu, ma e masani ona faafeiloaʻi i matou e le tinā o le aiga. E fiafia tagata e matou te talanoa e faalogologo i le feʻau, ma e pei i matou o ni mālō aloaʻia. O totonu o fale e vevela tele ona o le malosi o le lā. E masani ona tutuli tamaiti e aumai ni nofoa e tuu i lalo o se laau, ona fai mai lea e matou te ō e talanoa i le paolo.

Ua ō mai le aiga ma saofafaʻi i nofoa tuai ma pusa. E valaau foʻi i le fanau iti o loo taaalo i a latou meataalo na faia lava e i latou, ia ō mai e faalogologo. E matou te talanoa i mau o le Tusi Paia, ma avatu lomiga faale-Tusi Paia i fanau ua aʻoʻoga e latou te faitauina mai. E toetoe lava o tagata uma e fiafia e  talia a matou tusi, ma e valaaulia i matou e le toʻatele e toe asiasi atu.

A o leʻi toe foʻi e asi tagata na matou asia muamua, e matou te mālōlō i le aoauli e ʻai sina sanuisi ma inu se vai mālūlū. Ona matou asia muamua lea o Simi, e sau mai i Malawi ma e faigaluega i se nofoaga e eli ai minerale. Ua fai sina umi o matou asiasi iā Simi. E masani ona fiafia o ia e matou te feiloaʻi, ma e manaia a matou talanoaga i le Tusi Paia. E nonofo ma se fafine Aferika o le ituaiga o Setswana, ma e toʻalua la la fanau aulelei. E matou te leʻi maua o ia i le asiasiga ua tuanaʻi, ma e matou te fia iloa po o ā mai.

Ina ua matou taunuu i le fale o Simi, ua vave ona matou iloa atu e iai se mea ua faalētonu. Ua vaoa lona togālaau sa masani ona teu lelei, ua pepē lona toʻaga saga, ma ua lē toe iai ni ana moa. Ua loka le faitotoʻa i se filifili lapoʻa. Ua sau se tuaoi ma fesili mai po o iai se mea o matou mananaʻo ai. Ua matou fesili i ai po o fea Simi. Ae ua ia taʻu mai se tala e faateʻia ai: Ua maliu Simi, ma ua toe foʻi le fafine ma le fanau i lona aiga.

E ui e lē o se faaaloalo le fesili atu i le mea na tupu, ae ua matou fesili atu pea. Ua fai mai o ia: “Na maʻi o ia ma oti ai. Ua tele le mau faamaʻi i nei aso. Ua feoti ai le toʻatele o tagata.” E na te leʻi taʻua le maʻi patino ona e seāseā ona taʻua ia mataupu, ae o le faatupulaʻia o tuugamau fou i fanuatanu ua faamaonia ai upu a le fafine. Na matou talanoa ma ia i le faamoemoe o le toetū, ona matou ō atu lea e fai le isi asiga e ui ina matou lagona le faanoanoa.

Ua matou ō atu i fale mulimuli o le isi nuu, o loo iai se faaputuga maualuga o palapala mai i le mea e eli ai minerale. Ua matou afe i le auala e alu i le fale mulimuli. I luga o se maa i le togālaau, o loo tusia ai upu nei i se vali e lanu malosi, “E faamaʻimau taimi le lē faia o se faaiʻuga; ma e leaga foʻi le faimeatuu.” Ua autilo mai Tavita, * o lē na tusia ia upu, mai i tua o le afi o lana taavale tuai e taʻu o le Volkswagen Beetle. Ua tau autilo mai ona ua sesega ona mata i le lā ua folifoli goto, ona ata fiafia lea ina ua iloa mai i matou ma ua ilaila mai le auro o ona nifo. Ua solo ona lima ma laa mai e faafeiloaʻi i matou.

Ua fai mai o ia, “Malo! Ua leva tatou te leʻi toe feiloaʻi, a ea?” Ua matou fiafia e toe feiloaʻi ma Tavita. Ua faamalie mai e lē tele se taimi e matou te talanoa ai, ona ua faigaluega o ia ma ua toeitiiti ona alu lea i le galuega i le mea e eli ai minerale. E ʻataʻata lava Tavita i taimi uma a o fai la matou talanoaga manaia. Ua fai mai ma le fiafia o ia, “O le aso muamua lava na tatou feiloaʻi ai na sui ai loʻu olaga! O le mea moni lava, ana leai outou, ou te lē iloa po o faapeʻī loʻu olaga.”

Ua matou tuua Tavita ma loto ua tumu i le fiafia. A o faasolo ina goto le lā, ua matou sauni e toe foʻi i o matou aiga. Ua matou toe tepa i tua i le oganuu, ma ua faigatā ona iloa atu ona o le pefu, ma ua matou taumānatu po o le a faapefea ona oo le tala lelei i nei tagata uma. Ua matou matuā lagona le moni o fetalaiga a Iesu: “E moni, e tele le saito e seleseleina, a ua toʻaitiiti le ʻaufaigaluega.”—Luka 10:2.

[Faaopoopoga i lalo]

[Ē Ana le Ata i le itulau 17]

E tusa ma le faatagaga mai le Falemeli o Aferika i Saute