Ia Mafuta Atu i le Atua

“E te Faamaoni”

2 SAMUELU 22:26

E LEAI se mea e sili ona tigā i lo o le fai e se tasi e tatou te faatuatuaina, o se mea e tatou te lē fiafia ai. Ua taatele lenā faiga i lenei lalolagi lē faamaoni. (2 Timoteo 3:1-5) Pe e iai se tasi e tatou te faatuatuaina e faamaoni pea iā i tatou? Seʻi o tatou iloilo le faamatalaga a Tavita le tupu o Isaraelu anamua.

A o ola Tavita, sa feagai ma se faiga e sili ona lē faamaoni. O le lotovale o Saulo, le uluaʻi tupu o Isaraelu, na agaleaga ai iā Tavita ma sola ai o ia ma maumau solo. Sa lē faamaoni foʻi lana avā o Mekala, ma ‘ʻinoʻino lona loto iā te ia.’ (2 Samuelu 6:16) Sa faalata Tavita e lana faufautua maufaatuatuaina o Aitofele, ma auai i se fouvalega faasaga iā te ia. O ai le taʻitaʻi o lenei fouvalega? O Apisaloma le atalii o Tavita! Pe na lotovaivai ai Tavita ma manatu e leai se isi e faamaoni pea iā te ia, ona o na faiga lē faamaoni?

E tatou te maua le tali i upu a Tavita o loo i le 2 Samuelu 22:26. I se pese faafatusolo, ua taʻua ai e Tavita o sē e mausalī lona faatuatua, e uiga iā Ieova le Atua: “E te faamaoni i le tagata faamaoni.” Na mautinoa e Tavita, po o le ā lava le mea e fai e tagata e faatigā ai iā te ia, e faamaoni pea Ieova iā te ia.

Seʻi o tatou iloiloina totoʻa upu a Tavita. O le upu Eperu ua faaliliuina i le “faamaoni,” e mafai foʻi ona faaliliuina i le “alofa faamaoni.” E faavae le faamaoni moni i le alofa. E pipii atu ma le agaalofa Ieova i ē e faamaoni iā te ia. *

Ia mātau foʻi, o le faamaoni e lē na o se faalogona, ae o se mea e fai. E faamaoni Ieova, e pei ona iloa e Tavita i mea na oo iā te ia. I taimi sa sili ona faigatā o le olaga o Tavita, na gaoioi Ieova mo ia, i le puipuia ma le taʻitaʻia o le tupu faamaoni. Na iloa ma le lotofaafetai e Tavita, e na o Ieova e laveaʻiina o ia “mai i lima o ona fili uma.”—2 Samuelu 22:1.

O le ā le uiga o upu a Tavita mo i tatou? E lē faavaivai pe fesuisuiaʻi Ieova. (Iakopo 1:17) E faamaoni pea o ia i ana tapulaa ma faataunuu ana folafolaga. I se tasi o ana salamo, na tusi Tavita e faapea: ‘E lē tuua e Ieova ē e faamaoni iā te ia.’—Salamo 37:28.

E tāua iā Ieova lo tatou faamaoni. E tāua foʻi iā Ieova lo tatou usiusitaʻi faamaoni iā te ia, ma faalaeiau i tatou e faaaʻoaʻo iā te ia i le faamaoni i lo tatou va feagai ma isi. (Efeso 4:24; 5:1) Pe afai e tatou te faaalia le faamaoni i nei auala, e mautinoa o le a ia lē tuulafoaʻia i tatou. Po o le ā lava le faatigā mai o isi, e tatou te iloa e faamaoni Ieova i le fesoasoani mai iā i tatou, e manumalo i faigatā uma e oo mai. Po ua uunaʻia oe e mafuta vavalalata atu iā Ieova, “o lo tatou Atua faamaoni”?—Faaaliga 16:5.

[Faaopoopoga i lalo]