Ia Aʻoaʻo Lau Fanau

O Ē na Tusia Tala e Uiga iā Iesu

PE E te fiafia e faitau faatasi i tala e uiga iā Iesu?— * Ua faateʻia nisi tagata i le iloa e lē o iai i le Tusi Paia ni tala na tusia e Iesu. Peitaʻi, e tele mea ua taʻu mai iā i tatou e tusitala e toʻavalu o le Tusi Paia, e uiga iā te ia. O nei tagata uma na soifua faatasi ma Iesu, ma ua latou taʻu mai ana aʻoaʻoga. Pe mafai ona e taʻu mai igoa o lenā toʻavalu?— O Mataio, Mareko, Luka ma Ioane. O le isi toʻafā o Peteru, Iakopo, Iuta ma Paulo. O le ā sou iloa e uiga i nei tusitala?—

Seʻi o tatou talanoa muamua i tusitala e toʻatolu sa aofia ai i aposetolo e toʻa 12 o Iesu. Pe e te iloa o latou igoa?— O Peteru, Ioane ma Mataio. E lua tusi na tusia e Peteru mo uso Kerisiano. Na ia taʻu atu mea na ia iloa na faia ma fetalai ai Iesu. Suʻe lau Tusi Paia i le 2 Peteru 1:16-18, ma faitau i le tala a Peteru e faatatau i le faalogo atu o fetalai mai Ieova le Atua mai i le lagi iā Iesu.—Mataio 17:5.

E lima tusi o le Tusi Paia na tusia e Ioane. Sa nofo o ia i autafa o Iesu, a o fai le ʻaiga mulimuli na aai faatasi ai le ʻausoo ma lo latou Matai. Sa faatasi foʻi Ioane ma Iesu ina ua maliu o Ia. (Ioane 13:23-26; 19:26) Na tusia e Ioane se tasi o Evagelia e fā o loo i le Tusi Paia, e uiga i le soifuaga o Iesu. Na ia tusia foʻi le Faaaliga na avatu e Iesu iā te ia, ma tusi e tolu o le Tusi Paia ia e faaigoa i lona igoa. (Faaaliga 1:1) Sa avea Mataio le tusitala lona tolu o le Tusi Paia ma aposetolo o Iesu. O ia o se aolafoga.

Sa iloa e isi tusitala e lua o le Tusi Paia Iesu i se auala faapitoa. O i laʻua o ni ʻafa uso laiti o Iesu, o le fanau foʻi a Iosefa ma Maria. (Mataio 13:55) I le taimi muamua e leʻi avea i laʻua ma soo o Iesu. Sa la manatu foʻi ua valea Iesu ona o lona maelega e talaʻi. (Mareko 3:21) O ai lenei ʻauso?— O le tasi o Iakopo. Na ia tusia le tusi o Iakopo. O le isi o Iuta. Na ia tusia le tusi o Iuta.—Iuta 1.

O le isi toʻalua na tusia tala e uiga i le olaga o Iesu, o Mareko ma Luka. Sa iai i Ierusalema se fale telē o Maria, le tinā o Mareko, lea sa faapotopoto ai uluaʻi Kerisiano e aofia ai ma Peteru. (Galuega 12:11, 12) I tausaga muamua atu, i le pō o le Paseka mulimuli a Iesu ma ona aposetolo, atonu na mulimuli Mareko iā i latou ina ua ō atu i Ketesemane. Ina ua puʻea Iesu, na puʻe e fitafita Mareko, peitaʻi na sola o ia ae tuu lona ofu.—Mareko 14:51, 52.

O Luka o se fomaʻi atamai, e foliga mai na avea ma soo ina ua maliu Iesu. Sa matuā suʻesuʻe o ia i le olaga o Iesu, ma tusia se tala manino ma le saʻo aʻiaʻi e uiga i Lona olaga. Na mulimuli ane malaga faatasi Luka ma Paulo, ma na ia tusia foʻi le tusi o Galuega.—Luka 1:1-3; Galuega 1:1.

 O Paulo o le tusitala lona valu na tusia tala e uiga iā Iesu. Sa aʻoaʻoina o ia e le lōia taʻutaʻua o Kamalielu. O Paulo na igoa muamua iā Saulo, sa tausia aʻe ma aʻoaʻoina e le ʻau Faresaio, ma na ʻinoʻino i soo o Iesu ma auai i le fasiotia o i latou. (Galuega 7:58–8:3; 22:1-5; 26:4, 5) Pe e te iloa na faapefea ona iloa ai e Paulo le upu moni e uiga iā Iesu?—

Na faafuaseʻi ona tauaso Paulo ona o se malamalama pupula mai i le lagi, a o alu atu i Tamaseko e puʻe soo o Iesu. Na faalogo atu o ia i se leo o fesili mai: “Saulo, Saulo e, aiseā ua e faasauā mai ai iā te aʻu?” O Iesu lea sa fetalai mai iā te ia! Na ia faatonu Paulo e alu atu i Tamaseko. Ona faatonu lea e Iesu o lona soo o Anania e talanoa atu iā Paulo, ma na avea ai Paulo ma soo o Iesu. (Galuega 9:1-18) E 14 tusi o le Tusi Paia na tusia e Paulo, e amata mai i le tusi o Roma e oo i le Eperu.

Po ua amata ona e faitauina tusi o le Tusi Paia e faatatau iā Iesu, pe faitau mai foʻi e se tasi iā te oe?— O se tasi o mea sili e te faia i lou olaga, o le amata atu i le taimi nei a o e laʻitiiti, ona iloa tala o loo i le Tusi Paia e uiga iā Iesu.

[Faaopoopoga i lalo]

FESILI:

▪ O ai aposetolo o Iesu na avea ma tusitala o le Tusi Paia?

▪ O ai tusitala e toʻalua o le Tusi Paia o ʻafa uso o Iesu?

▪ Aiseā atonu na iloa ai e Mareko Iesu, ae aiseā atonu e leʻi iloa ai o Ia e Luka?

▪ Na faapefea ona avea Paulo ma soo o Iesu?

[Ata i le itulau 25]

Iuta

Mareko

Peteru

Mataio

Paulo

Iakopo

Luka

Ioane