Laasaga e Fitu e Aogā i le Faitauina o le Tusi Paia

“O le Tusi Paia e lē gata o se tusi e sili lona alumia, ae o loo avea pea ma tusi e sili ona alumia i tausaga uma.”—TIME MAGAZINE.

“Ou te faitau i le Tusi Paia i nisi taimi, ae na o le fiu le mea e maua mai ai.”—KEITH, O SE ALII EGELANI E LAUILOA I MUSIKA.

O LE mea e ofo ai ona e toʻatele ē e iai a latou Tusi Paia, ae e itiiti se aogā e maua i le faitau i ai. Peitaʻi, e iai isi e faatāuaina mea o faitau ai i le Tusi Paia. O se faataʻitaʻiga, na faamatala e se fafine e igoa iā Nancy: “Ina ua ou faitau i le Tusi Paia ma manatunatu i ai i taeao uma, ou te lagona loʻu lava saunia i so o se mea e tupu mai i le aso. Ua telē se sao o lenei masaniga e faaleleia ai loʻu mafatia pe a tulaʻi mai i lo o se isi togafitiga na ou maua i le 35 tausaga ua teʻa.”

E tusa pe e te leʻi faitauina le Tusi Paia, ae pe lē faalaeiauina ai oe ona ua maua ai e isi aogā? Afai o e faitau i le Tusi Paia, pe e te manaʻo ia aogā atili iā te oe? Ia faataʻitaʻi laasaga e fitu ua faamatalaina i lenei mataupu.

Laasaga 1—Ia saʻo le uunaʻiga e faitau ai

▪ Atonu e te faitauina le Tusi Paia ona o se tusi e manaia, po o se mea e tatau ona fai, pe atonu foʻi e maua ai ni taʻiala i nei taimi faigatā. Ae, e sili atu aogā e maua pe afai o lou sini, o lou fia iloa lea o le upu moni e uiga i le Atua. E tele foʻi faamanuiaga e maua pe afai o le uunaʻiga e faitau ai, o lou fia iloa lea o le auala e aogā ai le feʻau o le Tusi Paia i lou olaga.

Ua faatusaina le Tusi Paia i se faaata, e faamatilatila mai ai le tāua o le faitau ona o se uunaʻiga saʻo: “Afai e na o le faalogologo o se tasi i le upu ae e lē usiusitaʻi i ai, ua pei lava o  ia o se tagata ua vaavaai i le faata i ona lava foliga. Ua vaavaai o ia iā te ia lava, ona alu ese lea o ia ma ua galo loa ona foliga. A o lē e vaavaai totoʻa i le tulafono lelei atoatoa o le saʻolotoga, ma tausisi i ai, ona o lona faalogologo ma le lē faagalogalo, o le a fiafia ai o ia ona o lona faia o lea galuega.”—Iakopo 1:23-25.

O le tagata o i lenei faataʻitaʻiga, sa vaavaai i le faata i ona foliga, ae e aunoa ma se suiga na faia i ai. Atonu sa na ona tepa tasi lava i ai, ae e leʻi mafaufau e faia ni suiga. E faapena foʻi ona itiiti se aogā e tatou te maua pe a faatagā faitau i le Tusi Paia, pe e lē faatatauina mea e faitauina. Peitaʻi, e maua le fiafia moni pe afai e tatou te matuā iloiloina le Tusi Paia ina ia avea ma ē e “faia,” i le taaʻina o o tatou manatu ma gaoioiga i manatu o le Atua.

Laasaga 2—Filifili se faaliliuga maufaatuatuaina

▪ Atonu e tele ni faaliliuga o le Tusi Paia e te filifili ai i lau gagana. E maua aogā i so o se faaliliuga, a o isi faaliliuga e faigatā ona malamalama i ai ona o loo faaaogā ai le gagana maotua. (Galuega 4:13) O nisi faaliliuga ua suia ai le saʻo aʻiaʻi o le feʻau o le Tusi Paia ona ua taaʻina i tū masani. O se faataʻitaʻiga, sa tatou mātauina i mataupu amata o lenei mekasini le suia e nisi faaliliuga o le suafa o Ieova i faalagiga e pei o le “Atua,” po o le “Alii.” O lea, pe a filifili se faaliliuga e faaaogā, vaai se faaliliuga e saʻo ma faigofie ona malamalama i ai, ma faalaeiauina ai pea oe e faitau.

E faitau miliona le ʻaufaitau i le lalolagi ua iloa e faapena le Tusi Paia—O le Faaliliuga a le Lalolagi Fou. * Seʻi manatu i se tamāloa matua i Bulgaria. Sa avatu iā te ia se kopi o le Faaliliuga a le Lalolagi Fou, ina ua auai i se sauniga a Molimau a Ieova. O lana tala, “Ua tele tausaga o oʻu faitauina le Tusi Paia, ae ou te leʻi faitau lava i se faaliliuga e sili ona faigofie ona malamalama i ai ma pāʻia ai loʻu loto.”

Laasaga 3—Tatalo

▪ O le a e malamalama atili i le Tusi Paia pe a e talosaga atu i Lē e ona, e pei o le faisalamo o lē na faapea mai: “Ia e faapupulaina oʻu mata ina ia ou vaai atu ai i mea ofoofogia o lau tulafono.” (Salamo 119:18) Ia tatalo i le Atua i taimi uma e faitau ai le Tusi Paia mo lana fesoasoani ina ia e malamalama i lana Afioga. Ia e faafetai i le Atua mo le Tusi Paia, lea ua tatou iloa ai o Ia.—Salamo 119:62.

Pe e faafofoga le Atua i tatalo faapena? Seʻi manatu foʻi i le mea na tupu i se ʻauso teine talavou i Uruguay. Sa matuā iso i laʻua i le faamatalaga a le Tusi Paia o loo i le Tanielu 2:44, ma tatalo loa i le Atua e auina atu se isi e faamatala iā i laʻua. A o tatala pea le la Tusi Paia, ae afe mai loa ni Molimau a Ieova se toʻalua i lo la fale, ma faitau tonu atu lava le fuaiupu sa tatalo ai nei teine, ma faamatala atu o le a suitulaga le Malo o le Atua i faigāmalo faaletagata. * Sa talitonu lenei ʻauso ua tali mai le Atua i le la tatalo.

Laasaga 4—Faitau i aso uma

▪ Na tusi se tagata lomitusi e faapea ina ua māeʻa le osofaʻiga a tagata faatupu faalavelave i le Iunaite Setete iā Setema 11, 2001, “e ese le alumia o le Tusi Paia.” E faatoʻā liliu lava le toʻatele i le Afioga a le Atua i taimi o puapuaga. Ua faalaeiauina i tatou e le Tusi Paia ia faitau i ai i aso uma, e faapea: “Aua neʻi teʻa ese lenei tusi o le tulafono mai i lou gutu, ae ia e faitau lē leoa i ai i le ao ma le pō, ina ia e faia e tusa ma mea uma ua tusia ai;  ona manuia ai lea o ou ala, ma e gaoioi ai ma le poto.”—Iosua 1:8.

O le tāua o le faitauina e lē aunoa o le Tusi Paia, e faataʻitaʻi i se tamāloa ua maʻi fatu ma filifili loa e tausami i meaʻai paleni. Pe faamata e aogā lenei suiga iā te ia pe afai e na o taimi e tigā ai lona fatafata e tausami ai i meaʻai paleni? E leai. E tatau ona tausi pea i meaʻai paleni, ia maua ai pea e ia aogā. E faapena foʻi ona ‘⁠manuia ou ala,’ pe a e faitau i le Tusi Paia i aso uma.

Laasaga 5—Faaaogā auala eseese

▪ E lelei le faitau o le Tusi Paia mai le Kenese e oo i le Faaaliga, ae e aogā foʻi le faataʻitaʻi o isi auala. O nai fautuaga nei.

Faitau i se tagata o le Tusi Paia. Faitau mataupu uma po o tusi o loo talanoaina ai se tagata tapuaʻi o le Atua, e pei o:

• Iosefa: Kenese 37-50.

• Ruta: Ruta 1-3.

• Iesu: Mataio 1-28; Mareko 1-16; Luka 1-24; Ioane 1-21. *

Taulaʻi i se mataupu. Faitau mau e fesootaʻi i ai. O se faataʻitaʻiga, fai ni saʻiliʻiliga i le mataupu e faatatau i le tatalo, ona faitau lea o fautuaga a le Tusi Paia i le tatalo, faapea ma nisi o tatalo o loo iai i le Tusi Paia. *

Faitau leotele. E tele aogā e maua pe a e faitauina leotele le Tusi Paia. (Faaaliga 1:3) E lelei foʻi ona faitauina leotele e le tou aiga, faitau auauaʻi palakalafa pe tofi foʻi nisi o le aiga e faitau le vaega a le tagata o loo taʻua i le Tusi Paia. E fiafia nisi e faalogologo i lipine ua puʻeina o le Tusi Paia. Na fai mai se tasi fafine: “Sa faigatā lava ona ou faitauina le Tusi Paia, ona ou faalogologo lea i lipine ua puʻeina o le Tusi Paia. Ua sili atu nei ona ou fiafia i le Tusi Paia i lo o se tusi manaia.”

Laasaga 6—Manatunatu loloto

▪ O le pisi ma mea e faalavelave mai o lenei olaga, ua faigatā ai ona manatunatu loloto. E pei ona faamalū ā tatou meaʻai ina ia maua ai aogā, e faapena foʻi aogā o le manatunatu loloto i mea ua faitauina i le Tusi Paia. E faia faapea i le toe mafaufau i mea na tatou faitauina ma fesili ifo: ‘⁠O le ā ua ou aʻoaʻoina ai e uiga iā Ieova le Atua? E faapefea ona faatatauina iā te aʻu? E faapefea ona ou faaaogā e fesoasoani ai i isi?

O na manatunatuga e pāʻia ai o tatou loto i le feʻau o le Tusi Paia, ma faateleina ai lo tatou olioli e faitau le Afioga a le Atua. Ua faapea mai le Salamo 119:97 “Maʻeu lava loʻu naunau i lau tulafono! Ou te mafaufau i ai i le aso atoa.” O le manatunatu loloto, na mafaufau ai le faisalamo i le aso atoa i le Afioga a le Atua. Na aogā lea iā te ia e atiaʻe ai le fiafia tele i mea ua ia aʻoaʻoina.

Laasaga 7—Saʻili se fesoasoani

▪ E lē faatalitalia i tatou e le Atua e malamalama atoatoa i lana Afioga i a tatou lava taumafaiga. Ua taʻua i le Tusi Paia, e iai ‘⁠nisi mea e faigatā ona malamalama i ai.’ (2 Peteru 3:16) O loo faamatala i le tusi o Galuega se tagata tāua Aitiope na lē malamalama i se vaega o le Tusi Paia na ia faitauina. Na auina atu e le Atua lana auauna e fesoasoani iā te ia, ma o le iʻuga na “alu o ia ma le olioli tele.”—Galuega 8:26-39.

E aogā foʻi iā te oe ona e tāpā se fesoasoani ia malamalama i mea o e faitauina i le Tusi Paia. Faafesootaʻi Molimau a Ieova i lou vaipanoa, po o le tusi atu i le tuatusi o loo i le itulau e 4 o lenei mekasini mo se suʻesuʻega faale-Tusi Paia i le aiga e aunoa ma se totogi.

[Faaopoopoga i lalo]