Le Pogai ua Faigatā ai Ona Iloa le Suafa o le Atua

E IAI se tasi e manaʻo e ia aua neʻi e iloa le suafa o Ieova, ma maua se mafutaga māfana ma Ia. O ai lenei fili leaga? Ua fai mai le Tusi Paia: “Ua faatauasoina manatu o i latou o ē e lē talitonu e le atua o lenei faiga o mea a le lalolagi.” O Satani le Tiapolo, o ia o le atua o lenei lalolagi e lē matataʻu i le Atua. E manaʻo o ia ia aua neʻi susulu atu i lou loto “le poto faamamaluina o le Atua.” E lē manaʻo Satani ia e iloa le suafa o Ieova. E faapefea la ona faatauaso e Satani manatu o tagata?—2 Korinito 4:4-6.

Ua faaaogā e Satani lotu sesē e taofia ai tagata mai i le iloa o le suafa o le Atua. O se faataʻitaʻiga, i aso anamua, na lē amanaʻia e nisi tagata Iutaia Tusitusiga Paia, ae na mulimuli i le tū masani o le lē faaaogāina o le suafa o le Atua. E oo ane i uluaʻi senituri o o tatou aso (T.A.), e foliga mai na faatonuina tagata Iutaia e faitauina atu le Tusi Paia i le lautele, ia aua neʻi taʻua le suafa o le Atua pe a tau i ai, ae ia sui i le upu ʼAdho·naiʹ, o lona uiga, “Alii.” E lē taumatea o lenei faiga na iʻu ai ina lē toe naunau tagata i mea faaleagaga. O lea, e leʻi maua ai e le toʻatele aogā o le iai o se mafutaga māfana ma le Atua. Ae ā Iesu, o le ā sona manatu e faatatau i le suafa o Ieova?

Na Faalauiloa e Iesu ma Ona Soo le Suafa o le Atua

Na faailoa atu e Iesu i lana tatalo i lona Tamā: “Ua ou faailoa atu lou suafa . . . ma saga faailoa atu.” (Ioane 17:26) E mautinoa lava sa tele taimi na taʻua ai e Iesu le suafa o le Atua pe a faitau, sii, ma faamatala vaega o le Tusi Paia Eperu o loo taʻua ai lenā suafa tāua. O lea, na faaaogā soo ai e Iesu le suafa o le Atua, e pei o perofeta uma na muamua iā te ia. Pe afai na iai ni tagata Iutaia e leʻi fia faaaogāina le suafa o le Atua i le taimi o le faiva a Iesu, e mautinoa lava e leʻi mulimuli Iesu i lenā faiga. Na matuā faitioina e Iesu taʻitaʻi lotu i lona faapea atu: “Ua outou faalēaogā ai le afioga a le Atua i a outou tū masani.”—Mataio 15:6.

Na faaauau ona faailoa atu e soo faamaoni o Iesu le suafa o le Atua, ina ua mavae le maliu ma le toetū o Iesu. (Tagaʻi i le pusa  “Pe na Taʻua e Uluaʻi Kerisiano le Suafa o le Atua?”) Ina ua faavaeina le faapotopotoga Kerisiano i le Penetekoso 33 T.A., na sii atu e le aposetolo o Peteru se valoaga a Ioelu i tagata Iutaia ma ē na liliu i le lotu Iutaia i le faapea atu: “E faaolaina foʻi i latou uma o ē e valaau i le suafa o Ieova.” (Galuega 2:21; Ioelu 2:32) Na  fesoasoani uluaʻi Kerisiano i tagata mai le tele o nuu ia iloa le suafa o Ieova. O lea, i le fonotaga a aposetolo ma toeaina na faia i Ierusalema, na faapea atu ai le soo o Iakopo: ‘⁠Ua silasila le Atua i nuu ese, ina ia filifilia mai ai ni tagata mo lona suafa.’—Galuega 15:14.

Peitaʻi, e leʻi fiu ai taumafaiga a le fili o le Atua e aveesea Lona suafa. Ina ua maliliu le ʻauaposetolo, na taumafai loa Satani e uunaʻia tagata ia liliuese mai i le upu moni. (Mataio 13:38, 39; 2 Peteru 2:1) O se faataʻitaʻiga, na fanau Justin Martyr, o se tusitala na faapea mai o se Kerisiano, i le vaitaimi na maliu ai Ioane le aposetolo mulimuli. Na taʻua pea e Justin i ana tusitusiga, o Lē na saunia mea uma “o se Atua e leai sona suafa.”

Ina ua faia e Kerisiano ua fulitua i le upu moni kopi o Tusitusiga Paia Eleni, na latou aveesea le suafa o Ieova mai i tusitusiga ae sui  i le upu Eleni Kyʹri·os, o le “Alii.” O le mea foʻi lenā na tupu i Tusitusiga Eperu. Na lē toe faitauina leotele e tusiupu Iutaia e tetee i le upu moni le suafa o le Atua, ae e silia i le 130 taimi ua suia ai i le ʼAdho·naiʹ pe a tau i ai i a latou Tusi Paia. Na aveesea foʻi le suafa o le Atua mai i le faaliliuga lauiloa o le Tusi Paia i le faa-Latina, lea na faauma ona faia e Ierome i le 405 T.A. ma mulimuli ane taʻua o le Vulgate.

Taumafaiga i Aso Nei e Aveesea le Suafa o le Atua

Ua iloa e tagata popoto i aso nei, e tusa ma le 7,000 taimi o loo taʻua ai le suafa o Ieova i le Tusi Paia. O lea, o faaliliuga lauiloa o le Jerusalem Bible a le Katoliko, La Biblia Latinoamérica i le faa-Sepania, ma le Reina-Valera, o se isi faaliliuga lauiloa faa-Sepania, o loo faaaogā ai le suafa o le Atua. Ua faaaogā e nisi faaliliuga le “Yahweh” (Ieova) e faaliliu ai le suafa o le Atua.

E faanoanoa ona ua uunaʻia e le tele o lotu e faatupeina faaliliuga, le ʻaufaaliliu e aveese le suafa o le Atua mai i a latou faaliliuga o le Tusi Paia. O se faataʻitaʻiga, i se tusi na tusi atu i peresitene o fonotaga a epikopo Katoliko, iā Iuni 29, 2008, na fai atu ai le Vatikana: “I tausaga talu ai nei, na sosolo mālie mai ai le faaleoina o le suafa moni o le Atua o Isaraelu.” Na maʻoti le faatonuga na avatu i le tusi: “Ia aua neʻi toe faaaogāina pe toe taʻua . . . le suafa o le Atua.” Ma, “pe a faaliliuina le Tusi Paia i gagana faaonapōnei, . . . ia faaliliu le tetakalamatone (po o konesane Eperu e fā o le suafa o le Atua) i le upu Adonai/Kyrios: ‘⁠Alii.’ ” E manino mai o le fuafuaga o lenei faatonuga mai i le Vatikana, ia aua lava neʻi toe taʻua le suafa o le Atua.

Ua faapena foʻi ona faaalia e lotu Porotesano le lē migao i le suafa o Ieova. Na tusi se sui o le lotu Porotesano e faatatau i le faaliliuga New International Version lea na faatupeina e le lotu, ma lomia i le 1978 i le faa-Peretania e faapea: “O Ieova o le suafa moni o le Atua, ma na tatau ona matou faaaogāina. Peitaʻi, e lua ma le kuata miliona tālā na alu i le faiga o lenei faaliliuga, ma o le a matuā maʻimau uma na tupe pe a faaliliu le Salamo 23 e faapea, ‘⁠O Ieova o loʻu leoleo mamoe o ia.’ ”

Ua faafaigatā foʻi ona iloa e tagata i nuu i Amerika Latina le suafa o le Atua ona o lotu. Na tusi Steven Voth, o se faufautua mo le Sosaiete Tuufaatasi o le Tusi Paia: “O se finauga ua tulaʻi mai pea i lotu Porotesano i Amerika Latina, o le faaaogāina lea o le suafa o Ieova  . . . E lelei ona mātau, na faapea mai se lotu penetekoso ua matuā faatoʻateleina . . . e mananaʻo i se Tusi Paia e taʻua o le Reina-Valera, o le lomiga o le 1960, ae ia aveese le suafa o Ieova. E mananaʻo e tuu i ai le upu Alii.” Na taʻua e Voth, sa teena lea manaʻoga e le Sosaiete, ae na mulimuli ane toe talia ma lolomi ai le Tusi Paia lauiloa lea, ae ua “aveese le suafa o Ieova.”

Ua faigatā i tagata e faitauina le Tusi Paia ona iloa moni le Atua, ona ua aveesea lona suafa mai i lana Afioga tusia ae sui i le “Alii.” Ma ua tupu ai le fenuminumiaʻi. O se faataʻitaʻiga, e faigatā i se tasi ona iloa po o faatatau le faaupuga “Alii” iā Ieova po o lona Alo o Iesu. O lea, i le mau o loo sii mai ai e le aposetolo o Peteru upu a Tavita e faapea: “Na fetalai mai Ieova i loʻu Alii [o Iesu o lē ua toe faatūina mai]: ‘⁠Ia e nofo i loʻu itu taumatau,’ ” ua faaliliuina e isi Tusi Paia e faapea: “Na fetalai mai le Alii i loʻu Alii.” (Galuega 2:34, NIV) E lē gata i lea, na taʻua foʻi e David Clines i lana tala na tusia, e faaulutalaina “Yahweh and the God of Christian Theology” e faapea: “O le aveesea foʻi o le suafa o Ieova mai i mafaufau o Kerisiano, ua uaʻi atu ai iā Keriso.” O lea, e lē o iloa e le toʻatele o tagata lotu, o le Atua moni na tatalo i ai Iesu, o lona suafa o Ieova.

Ua taumafai malosi Satani e faatauaso mafaufau o tagata e uiga i le Atua. E ui i lea, e mafai lava ona e iloa lelei Ieova.

E Mafai Ona E Iloa le Suafa o Ieova

O le mea moni, ua matuā taumafai Satani e aveese le suafa o le Atua, ma ua ia faaaogā ma le poto lotu sesē e faia ai faapea. Peitaʻi, e leai se malosi i le lagi po o le lalolagi e mafai ona taofia le Alii Silisili Ese o Ieova, mai i le faailoaina atu o lona suafa i ē e fia iloa le upu moni e uiga iā te ia, ma lona finagalo mo tagata faatuatua.

E fiafia Molimau a Ieova e fesoasoani atu iā te oe e aʻoaʻo le auala e mafuta vavalalata atu ai i le Atua, e ala i le suʻesuʻeina o le Tusi Paia. Ua latou mulimuli i le faaaʻoaʻoga a Iesu o lē na faapea atu i le Atua: “Ua ou faailoa atu lou suafa iā i latou.” (Ioane 17:26) A o iloiloina mau o loo faailoa mai ai matafaioi eseese a Ieova ina ia faamanuiaina ai tagata, o le a e iloa ai le tele o vala matagofie o ona uiga.

Na ‘⁠avea le Atua ma uō māfana’ a le augātamā faatuatua o Iopu, ma e mafai foʻi ona e faia faapena. (Iopu 29:4) E mafai ona e iloa le suafa o Ieova e ala i le poto mai i Lana Afioga. O lea poto e te mautinoa ai o le a gaoioi Ieova e tusa ma le uiga o lona suafa na ia fetalai ai—‘⁠E Avea Aʻu ma lē ou te loto i ai.’ (Esoto 3:14) E mautinoa la, o le a ia faataunuu ana folafolaga uma i tagata.

[Pusa i le itulau 6]

 Pe na Taʻua e Uluaʻi Kerisiano le Suafa o le Atua?

I aso o aposetolo o Iesu i le uluaʻi senituri T.A., na faavae ai faapotopotoga Kerisiano i le tele o atunuu. Sa faapotopoto e lē aunoa sui o ia faapotopotoga e suʻesuʻe Tusitusiga Paia. Pe na iai le suafa o Ieova i Tusitusiga Paia a na uluaʻi Kerisiano?

Talu ai na avea le gagana Eleni ma gagana taatele, na faaaogā ai e le tele o faapotopotoga le Tusi Paia Eleni o le Septuagint, o se faaliliuga o le Tusi Paia Eperu na faamāeʻaina i le senituri lona lua T.L.M. Ua fai mai nisi tagata atamamai, mai i le uluaʻi taimi na faaliliuina ai le Septuagint, sa suia ai pea le suafa o le Atua i le faalagiga Kyʹri·os, o le “Alii” i le faa-Eleni. Ae ua faaalia i mea moni e lē saʻo lenā tala.

O fasi manusikulipi o loo faaalia i inei, o ni vaega o le Tusi Paia Eleni o le Septuagint mai i le uluaʻi senituri T.L.M. Ua faaalia manino mai ai le suafa o Ieova i le Tusi Paia Eleni i mataʻitusi Eperu e fā יהוה (YHWH), po o le Tetakalamatone. Na tusi le Polofesa o George Howard: “E tolu a matou kopi eseese o le Tusi Paia Eleni o le Septuagint na iai a o leʻi oo i le faa-Kerisiano, ma e leai se taimi na suia ai mataʻitusi Eperu e fā o le suafa o Ieova i le kyrios (Alii), ma e leʻi faaliliuina foʻi. E mafai ona tatou fai atu ma le mautinoa, a o leʻi oo i le vaitaimi o le Feagaiga Fou, i lea taimi foʻi ma ina ua mavae lea taimi, o se faiga faa-Iutaia le tusia o le suafa o le Atua . . . i le Tusi Paia Eleni.”—Biblical Archaeology Review.

Pe na faaaogā e aposetolo ma soo o Iesu le suafa o le Atua i a latou tusitusiga paia? Ua taʻua e le polofesa o Howard: “Ina ua faaaogā ma sii mai e le ekalesia o le Feagaiga Fou, le Septuagint lea e taʻua ai le suafa o le Atua i mataʻitusi Eperu e fā, e mautinoa na faaaofia ai e tusitala o le Feagaiga Fou le Tetakalamatone i a latou tusitusiga.”

O lea la, e mafai ona tatou faapea atu ma le mautinoa, sa iai le suafa o le Atua i faaliliuga o le Tusi Paia Eperu ma le Tusi Paia Eleni, na faitauina e uluaʻi Kerisiano.

[Ē Ana le Ata]

Ata uma: Société Royale de Papyrologie du Caire

[Ata i le itulau 4, 5]

O se vaega o le tusi a Isaia i le tusi tāʻai o le Sami Mate, o loo faailoga ai le suafa o le Atua

 [Ē Ana le Ata ]

Shrine of the Book, Photo © The Israel Museum, Jerusalem

[Ata i le itulau 7]

Ua aveesea e le tele o lotu le suafa o le Atua ona o le mulimuli i tū masani faa-Iutaia po o le fia fai tupe

[Ata i le itulau 8]

Na faataatia e Iesu le faaaʻoaʻoga i le faailoa atu o le suafa o le Atua