E Mafai e le Tusi Paia Ona Suia Olaga

NA MAFAI faapefea e se matua nofo toʻatasi i Rusia ona tuu lana masani o le pulea e fualaau faasāina, ma faaleleia ai la latou mafutaga ma lana fanau? Na faapefea i se alii sa maumausolo i le auala i Kyoto i Iapani, ona maua le malosi e faaleleia ai vaivaiga na māfua ai lona mativa? Na faapefea ona tuu e se kaupoe mai Ausetalia lana amio o le inu seʻi tau i le ua? Seʻi iloilo tala a nei tagata.

“Ua ou iloa ai o loʻu tiute le tausia o aʻu.”—NELLY BAYMATOVA

TAUSAGA: 45

ATUNUU: RUSIA

TALAAGA: PULEA E FUALAAU FAASĀINA

OLAGA SA IAI:Na ou ola aʻe i Vladikavkaz le laumua o Ossetia i Mātū (ua taʻua nei o Alania). E tū lelei loʻu aiga, peitaʻi, e leʻi maua ai soʻu fiafia e ui i le tele o meafaitino. E 34 ane oʻu tausaga, ua faalua ona ou faaipoipo ma toe tatala. E sefulu tausaga o oʻu faaaogāina fualaau faasāina, ma e faalua ona taofia ai aʻu i le falemaʻi mo togafitiga. E toʻalua laʻu fanau, ae ou te leʻi māfana i ai, ma e leʻi lelei foʻi sa matou mafutaga ma aʻu uō faapea loʻu aiga.

O loʻu tinā e Molimau a Ieova, ma e masani ona ou faalogo o tagi o ia ma tatalo iā Ieova e fesoasoani mai iā te aʻu. Sa ou faapea ifo: ‘Talofa e i si oʻu tinā, e lē malamalama! E faapefea ona fesoasoani mai Ieova iā te aʻu?’ Na ou taumafai e tuu fualaau faasāina, ae ou te leʻi mafaia. Na iai le taimi e atoa lelei aso e lua ou te leʻi tago i ai. Na oo mai ai le manatu, e sili pe a ou alu ese mai i le fale, ma na ou puna ai loa i fafo mai le faamalama. O le mea e leaga ai, ona o le fogāfale lua lea na ou puna ifo ai. Na gau loʻu lima ma loʻu vae, ma lavea ai ma loʻu tua. E silia ma le masina o faataotolia aʻu.

Na tausi aʻu e loʻu tinā ma e leʻi faatigā mai iā te aʻu, ona sa malamalama o ia, ua lē lelei oʻu faalogona ma loʻu mafaufau. Sa tuu e loʻu tinā i autafa o loʻu moega ni mekasini o le Ala Mai! * Na ou faitau uma i ai ma e ese le manaia toe aogā. Na ou filifili ai loa e matou te suʻesuʻe i le Tusi Paia ma Molimau a Ieova.

SUIA E LE TUSI PAIA LOʻU OLAGA:Na ou aʻoaʻoina mai i le Tusi Paia, e tatau ona ou faia oʻu tiute tauave ma ua ou iloa ai o loʻu tiute le tausia o aʻu ma laʻu fanau, ae aua le faalagolago i loʻu tinā. E leʻi faigofie ona ou faamasani e faigaluega, ona ua leva ona ou pule i aʻu mea e fai.

 Na aogā tele foʻi iā te aʻu le fautuaga i mātua i le Teuteronome 6:5-7, ina ia aʻoaʻo a latou fanau e uiga i le Atua. Na ou iloa ai e ao ona ou tali atu i le Atua i le auala e tausia ai laʻu fanau e toʻalua. Na uunaʻia ai aʻu e faifaimea faatasi ma laʻu fanau ma atiaʻe ai le alofa iā i laʻua.

Ou te matuā faafetaia Ieova ona o le avanoa ua tuuina mai e aʻoaʻo ai le upu moni e uiga iā te ia. O lea, sa tuuina atu loa loʻu ola iā te ia ma papatiso ai o se Molimau a Ieova.

AOGĀ IĀ TE AʻU:Na faaleleia lo ma va ma loʻu tinā ona ua mafai ona pulea loʻu ita. Ua lelei foʻi la matou mafutaga ma si aʻu fanau.

Ona ua ou ʻinoʻino i mea e lē fiafia i ai le Atua, ua mou atu ai foʻi ma faafitauli sa iai ona o le olaga sa ou ola ai. Ua ou fiafia lava e fesoasoani i isi ina ia iloa le upu moni e uiga i lo tatou Atua alofa o Ieova.

“Ua ou lagona ua faasaoina loʻu ola.”—MINORU TAKEDA

TAUSAGA: 54

ATUNUU: IAPANI

TALAAGA: MAUMAUSOLO I LE AUALA

OLAGA SA IAI:Na ou ola aʻe i le aai o Yamaguchi ma sa tausia aʻu e loʻu tamā ma lona tinā. Ou te leʻi feiloaʻi lava i loʻu tinā. E maliu le tinā o loʻu tamā, ua 19 oʻu tausaga, ma tuua ai loa na o maʻua ma loʻu tamā. Na ou galue o se kuka ma e faigaluega foʻi loʻu tamā i le saunia o taumafa. E seāseā ma fevaaiaʻi ma loʻu tamā ona e eseese a ma sifi. Sa masani ona ou faigaluega umi, ona matou inu lea ma aʻu uō.

Na oo ina ou lē toe fiafia i laʻu galuega, ma na ma misa ai ma le pule ma atili ai ona ou inu. Ina ua lata i le 30 oʻu tausaga, na ou manatu ai e tuua le aiga ae ou malaga. Ina ua leai saʻu tupe, ona ou faigaluega lea i se nofoaga e fai ai taaloga faitupe. Na fai laʻu teine, ma iʻu ina ma faaipoipo. Peitaʻi, e lua ma le afa tausaga talu ona ma nonofo ae ma toe teteʻa.

Sa ou mafatia ma taaʻina ai e fai le tele o aitalafu mai i tagata nonō tupe. Na ou sola mai iā i latou, ma ou nofo i loʻu tamā i lo matou nuu, ae na leaga lo ma va ona o loʻu talapepelo. Na ou sola ma ana tupe, ma sa ou ola i tupe mai i taaloga faitupe mo sina taimi. Na iʻu ina ou mativa ma nofo ai mo sina taimi i nofoaga e faatali ai nofoaafi. Na ou alu i Hakata, ona sosoo lea ma loʻu alu i Himeji, ma oo ina ou toe foʻi i Kyoto. E lua tausaga o oʻu maumausolo i le auala.

SUIA E LE TUSI PAIA LOʻU OLAGA:I le 1999, na talanoa mai ai ni fafine se toʻalua iā te aʻu a o oʻu iai i le paka e lata i le vaitafe o Kamogawa i Kyoto. Na fesili mai se tasi o i laʻua, “E fia fai sau suʻesuʻega faale-Tusi Paia?” ma na ou talia. Sa fai laʻu suʻesuʻega e ni Kerisiano e matutua faaleagaga mai i le  faapotopotoga a Molimau a Ieova, ma na fesoasoani iā te aʻu e iloa ai le tāua o le faatatauina o taʻiala o le Tusi Paia. Na latou faalaeiau mai e taumafai e saʻili se galuega ma se mea ou te nofo ai. E lua galuega na ou alu i ai mo faatalanoaga o avanoa faigaluega, ae ou te leʻi ano tele i ai. Na ou tatalo mo se fesoasoani ma ou taumafai malosi ai loa e suʻe se galuega, ma e leʻi umi ae maua.

Na aogā foʻi le tatalo ina ua tulaʻi mai se faafitauli matuiā iā te aʻu. Na maua aʻu e le ʻau nonō tupe sa tulituliloaina aʻu e totogi a latou tupe. Na ou matuā mafatia ai lava. Ae i laʻu faitauga Tusi Paia i aso taʻitasi, na ou tau ai i le Isaia 41:10. O loo folafola mai ai e Ieova i ana auauna faamaoni: “Ou te matuā fesoasoani iā te oe.” O le folafolaga lenā faalaeiau mai ma ou lototele ai. Na ou faaaogā lenā fautuaga ma oo ina foʻia ai oʻu faafitauli tau tupe. I le tausaga e 2000, na ou agavaa ai loa e papatiso e avea o se Molimau a Ieova.

AOGĀ IĀ TE AʻU:Na ou gaoioi e toe faalelei lo ma va ma loʻu tamā ona o mea na ou iloa mai le Tusi Paia, ma sa ia faamagalo aʻu i aʻu amioga sa fai. Na fiafia lava o ia ona ua ou ola e tusa ai ma tapulaa a le Tusi Paia. Ua ou lagona ua faasaoina loʻu ola, ona ua ou ola e tusa ai ma taʻiala o le Tusi Paia.

E lē gata i lea, ua ou faigaluega ina ia maua mea e tausi ai aʻu. (Efeso 4:28; 2 Tesalonia 3:12) Ua iai foʻi aʻu uō moni i le faapotopotoga Kerisiano. (Mareko 10:29, 30) Ou te faafetaia ma loʻu lotoatoa Ieova ona o mea ua ia aʻoaʻoina ai aʻu.

“E leʻi faigofie ona ou faia suiga na manaʻomia.”—DAVID HUDSON

TAUSAGA: 72

ATUNUU: AUSETALIA

TALAAGA: SOONA INU

OLAGA SA IAI:O aʻu e lona sefulu tasi o le fanau a oʻu mātua o Uili ma Lusi. Sa matou nonofo i Aurukun o le nuu o tagata Apoliki, e mamao lava i le pito i mātū o Kuiniselani. O Aurukun, e tū i auvai matagofie o le vaitafe o Archer, e lata i le sami. Na aʻoaʻoina i matou e o matou mātua ia iloa tulimanu ma fagogota e tausi ai i matou. I lenā taimi, sa pulea e le malo a matou tupe maua, ma sa faatapulaa foʻi vaipanoa e matou te nonofo ai.

Sa taumafai malosi o matou mātua e totō iā i matou uma uiga lelei, ia faaaloalo i tagata matutua, ma tufa atu nai mea e matou te maua. O lea, na pei ai tagata matutua uma o o matou tinā ma tamā, po o aiga o o matou mātua.

Na maliu loʻu tamā ua fitu oʻu tausaga, ma matou siitia ai loa i Mapoon le nuu o  Apoliki, e tusa ma le 90 maila [150 km] i mātū o Aurukun. Na ou tausia solofanua ma manu i le 12 o oʻu tausaga, ma na ou galue i le tele o pā povi seʻia lata ina atoa loʻu 50 tausaga. O se olaga e faigatā. E mataʻutia loʻu inu pia ma e seāseā misi. Na tigā soo ai loʻu ulu ma tutupu ai ma isi faigatā.

I se tasi taimi na ou inu ai e tau i loʻu ua, ma ou tifa atu ai i fafo o le faletalimālō, ae alamū mai loa se taavale ma soʻa aʻu. E lua tausaga o togafitia aʻu ina ia toe faaleleia laʻu savali, ma ou lē toe faigaluega ai o se tausi povi.

SUIA E LE TUSI PAIA LOʻU OLAGA:A o faia oʻu togafitiga, na aumai e laʻu uō teine Olomatamata ma Ala Mai! ou te faitau ai. Peitaʻi, e leʻi lelei saʻu aʻoga ma e lē lelei laʻu faitau. I se tasi aso mugālā, na asiasi mai ai se toeaina ua 83 tausaga. Na ou fai i ai e susū mai i totonu e taumafa sina ipu vai mālū. Na ia tuu mai lomiga faale-Tusi Paia ma fai mai pe mafai ona toe foʻi mai e faamatala mea o iai. O lea, na faaauau pea la ma suʻesuʻega faale-Tusi Paia, ma ou iloa ai, e tatau ona sui oʻu uiga ma loʻu olaga ina ia faafiafia ai le Atua.

E leʻi faigofie ona ou faia suiga na manaʻomia. Peitaʻi, o mea na aʻoaʻoina ai aʻu e loʻu tinā na ou faaaloalo i si nei tamā matua sa ma suʻesuʻe, faapea le malamalama faaleagaga na ia faailoa mai. Peitaʻi, na ou faatalatū e tuuina atu loʻu ola i le Atua, ona sa ou manatu, e tatau ona ou malamalama i mea uma o loo i le Tusi Paia.

Sa fesoasoani mai se tasi ma te faigaluega faatasi ia saʻo laʻu vaai i le mataupu. O ia o se Molimau a Ieova, ma na ia faasino aʻu i le faalaeiauga o loo i le Kolose 1:9, 10. O loo faapea mai, e manaʻomia ona ‘tupu pea lo tatou poto saʻo i le Atua.’ Sa fesoasoani mai o ia ina ia ou malamalama e lē muta loʻu aʻoaʻoina o mea fou, ma aua ou te faatalatū e faia se tuuina atu ona e lē o lava soʻu malamalama.

Sa sili ona ou fiafia ina ua ou aufaatasi atu i Molimau a Ieova. Na ou vaai ai i tagata o ituaiga eseese o tapuaʻi ma le autasi i le Atua. O lenā autasi na ou manatu ifo ai loa, ua ou maua le lotu moni, ma na ou papatiso ai loa i le 1985 e avea o se Molimau a Ieova.

AOGĀ IĀ TE AʻU:Ua faaleleia laʻu faitau, ma ua tele itula ou te faaaluina i vaiaso taʻitasi e fesoasoani ai i isi ia iloa faitau ma suʻesuʻe le Tusi Paia. E lē gata i lea, o le tamaʻitaʻi lea na aumaia mekasini o le Olomatamata ma le Ala Mai! ou te faitau ai, na suʻesuʻe foʻi ma se molimau ma ua papatiso, ma ua avea nei ma aʻu avā pele. Ua ma fiafia e fesoasoani i isi tagata Apoliki ina ia latou iloa Ieova le Atua.

[Faaopoopoga i lalo]

[Faamatalaga faaopoopo i le itulau 21]

Ua ma fiafia e fesoasoani i isi tagata Apoliki ina ia latou iloa le Atua