Tali o Fesili e Fā e Uiga i le Iʻuga

NA VALOIA e Iesu ‘o le a oo mai le iʻuga’ i se aso i le lumanaʻi. Ina ia faamatala lenā aso, na fetalai o ia: “O le a tupu le puapuaga tele, e leai sona tusa talu le amataga o le lalolagi, e oo mai lava i aso nei, ma o le a lē toe tupu foʻi se mea faapea.”—Mataio 24:14, 21.

O fetalaiga a Iesu e uiga i le iʻuga atoa ai ma isi mau o le Tusi Paia e uiga i lenei mataupu, ua lāgā ai ni fesili tāua. E lelei pe a suʻe lau Tusi Paia ma faitau i ai i tali o na fesili.

1 O le ā le Mea o le a Iʻu?

E lē o aʻoaʻo i le Tusi Paia e faapea o le a faaumatia le lalolagi. Na tusi le faisalamo: ‘Ua faavaeina e le Atua le lalolagi i luga o ona faavae malolosi; e lē maluelue e faavavau, faavavau lava.’ (Salamo 104:5) E lē o aʻoaʻo foʻi i le Tusi Paia o le a faaumatia ola uma i se taua mataʻutia i le lalolagi aoao. (Isaia 45:18) Na fetalai Iesu e iai nisi o tagata e faasaoina i le iʻuga. (Mataio 24:21, 22) O le ā la o taʻua i le Tusi Paia o le a faaumatia?

O le a faaumatia malo uma o tagata. Na faagaeeina e le Atua le perofeta o Tanielu e tusi e faapea: “O le a faatūina . . . e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.”—Tanielu 2:44.

O le a faaiʻuina taua ma le polusione. Ina ia faamatala le mea o le a faia e le Atua, ua taʻua i le Salamo 46:9: “Ua ia faaiʻuina taua i tuluʻiga o le lalolagi. Ua ia gauia foʻi le ʻaufana ma vaevaeina le tao; ma ua ia susunuina i le afi o taavale toso.” O loo aʻoaʻo foʻi i le Tusi Paia o le a faafanoina e le Atua “i latou o loo faaleagaina le laueleele.”—Faaaliga 11:18.

O le a faaiʻuina solitulafono ma faiga lē tonu. Ua folafola mai i le Afioga a le Atua: “O ē e amio saʻo e latou te mau i le lalolagi, ma  o ē e lē ponā e faatotoeina i le lalolagi. Ae e faaumatia o ē e amioleaga mai i le lalolagi; e liaʻieseina foʻi o ē e amio faapiʻopiʻo.” *—Faataoto 2:21, 22.

2 O Afea e oo Mai ai le Iʻuga?

Ua faatulaga e Ieova le Atua se “taimi atofaina” e faaiʻuina ai le amioleaga, ma faatūina le pulega a lona Malo. (Mareko 13:33) Ae ua taʻua manino i le Tusi Paia e tatou te lē iloa le aso tonu e oo mai ai le iʻuga. Na fetalai Iesu: “A o lea aso ma lea itula e lē iloa e se tasi, e oo lava i agelu i le lagi po o le Atalii, ua na o le Tamā lava.” (Mataio 24:36) Peitaʻi na valoia e Iesu ma ona soo mea o le a tutupu i le lalolagi a o leʻi aumaia e le Atua le iʻuga. E iloa ua latalata le iʻuga pe afai ua tutupu mea uma o loo taʻua mulimuli mai i le taimi lava e tasi, ma e tutupu i le lalolagi aoao.

Ua matuā faateleina fesuiaʻiga i faigāmalo, le siʻosiʻomaga ma le va fealoaʻi o tagata. Ina ia tali fesili a ona soo e faatatau i le iʻuga, na fetalai Iesu: “O le a siitaua le isi atunuu i le isi atunuu, ma le isi malo i le isi malo, o le a iai mafuiʻe i lea mea ma lea mea, o le a iai foʻi oge. O le amataga ia o le tigā o puapuaga.” (Mareko 13:8) Na tusi Paulo e faapea: “O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua.”—2 Timoteo 3:1-5.

Ua faia se talaʻiga i le tele o gagana i le lalolagi aoao. Na fetalai Iesu: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”—Mataio 24:14.

3 O le a e Sosoo ma le Iʻuga?

E lē o aʻoaʻoina i le Tusi Paia e ō tagata lelei uma i le lagi ma ola ai e faavavau i inā. Ae na aʻoaʻo e Iesu o le a faataunuuina le finagalo o le Atua na iai i le amataga mo le fanau a tagata. Na fetalai Iesu: “E fiafia o ē e agamalu, auā e fai mo latou tofi le lalolagi.” (Mataio 5:5; 6:9, 10) Ua taʻua i le Tusi Paia e iai le faamoemoe o le toetū mo ē e maliliu a o leʻi oo mai le iʻuga. (Iopu 14:14, 15; Ioane 5:28, 29) O le ā e sosoo ma le iʻuga?

O le a pule Iesu mai i le lagi o le Tupu o le Malo o le Atua. Na tusi le perofeta o Tanielu: “Na ou vaaia pea i le faaaliga i le pō, tagaʻi foʻi! ua afio mai i ao o le lagi se tasi e pei o le atalii o le tagata [Iesu ua toe faatūina]; ma ua tuu atu o ia e ulufale atu i Lē e mai anamuā ona aso [Ieova le Atua], ua latou momoli atu o ia i Ona luma. Ua tuuina atu iā te ia [Iesu] le pule, o le mamalu ma le malo, ina ia auauna iā te ia o tagata ma nuu ma gagana uma. O lana pule, o le pulega lea e tumau e lē mavae atu, e lē faaumatia foʻi lona malo.”—Tanielu 7:13, 14; Luka 1:31, 32; Ioane 3:13-16.

O le a maua e tagatānuu o le Malo o le Atua i le lalolagi le soifua mālōlōina lelei, le saogalemu tumau ma le ola e faavavau. Na tusi le perofeta o Isaia: “O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi.” (Isaia 65:21-23) Na tusi le aposetolo o Ioane e faatatau i lenā taimi: “Faauta! Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E  faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:3, 4.

4 O le ā e Tatau Ona E Faia Ina ia Sao ai Mai i le Iʻuga?

Na faaalia e le aposetolo o Peteru, o nisi o loo ola i le taimi o le iʻuga o le a tauemu i le talitonuga e faapea, o le a faalaa mai le Atua i mataupufai a tagata ma faaiʻuina le amioleaga i le lalolagi. (2 Peteru 3:3, 4) Ae ua faalaeiau e Peteru ē o loo soifua i o tatou aso, ia faia mea o loo taʻua mulimuli mai.

Aʻoaʻo mai i mea na tutupu i aso ua mavae. Na tusi Peteru: ‘⁠E leʻi faatali le Atua mai i le faasalaina o le lalolagi tuai, ae na laveaʻiina Noa o lē e talaʻi le amiotonu ma isi e toʻafitu, ina ua ia aumaia le lolo i le lalolagi i tagata faalēmataʻu.’ (2 Peteru 2:5) Na taʻua e Peteru e tusa ai o ē e tauemu: “E tusa foʻi ma o latou manaʻo, ua latou lē amanaʻia ai lenei mea moni e faapea, sa iai le lagi i aso anamua, ma na mautū foʻi le laueleele ma manu aʻe mai i le vai, ma sa i totonu foʻi o le vai, ona o le afioga a le Atua; o mea foʻi ia na oo ai le faaumatiaga i le lalolagi i lenā taimi, ina ua lofia i le vai. O le afioga foʻi lea ua tuu ai le lagi  ma le lalolagi * o loo iai i le taimi nei mo le afi, ma ua taofia seʻia oo i le aso faamasino ma le faaumatiaga o tagata faalēmataʻu.”—2 Peteru 3:5-7.

Ola e tusa ai ma tapulaa tau amio a le Atua. Na tusi Peteru o ē e fia sao i le iʻuga, e latou te faia “amioga paia ma galuega o le faamaoni i le Atua.” (2 Peteru 3:11) Ia mātau, o loo faamatilatila e Peteru “amioga paia” ma “galuega o le faamaoni i le Atua.” O lea la, e tele atu mea e aofia ai i lo o le tau ina faapea mai e faatuatua i le Atua, pe faatopetope ona faia ni gaoioiga tonu i le taimi mulimuli ina ia faasaoina ai e le Atua.

O ā gaoioiga ma galuega patino e talia e le Atua? E lelei pe a faatusatusa mea ua e iloa ma le aʻoaʻoga a le Tusi Paia e uiga i lenei mataupu. E fiafia Molimau a Ieova e fesoasoani atu iā te oe. Ia fai atu iā i latou e faaali atu iā te oe mai i lau Tusi Paia, le māfuaaga o o latou talitonuga. O le faia faapea o le a fesoasoani iā te oe e fesagaʻia ai ma le lototele ma le mautinoa le lumanaʻi, e ui o loo faapopoleina i tatou i mea o loo tutupu i aso nei.

[Faaopoopoga i lalo]

[Faamatalaga faaopoopo i le itulau 7]

E lē o le lalolagi o le a faaumatia, ae o tagata o loo faaleagaina le lalolagi