Aiseā e Faia ai e Tagata Mea Leaga?

E IOE le toʻatele o tagata i le manatu, o tatou uma e agasala ma faia mea sesē e tatou te toe salamō ai. Ae, po o le pogai ea lenā o le tele o mea leaga matuiā, pe e lē matuiā foʻi, o loo tatou vāai ma faalogo ai i tala fou?

E ui o i tatou uma o tagata agasala, ae e iai tapulaa tau amio e tatou te ioe e lē tatau ona solia, ma e mafai ona ʻalofia ai e tagata le faia o amioga leaga. E ioe le toʻatele e iai le eseesega o le pepelo e lē fuafuaina ma le taufaaleaga, e eseese foʻi le fasioti tagata paʻivalea ma le taupulepule e fasioti se tagata. Peitaʻi, o loo faia pea e tagata e foliga mai e lelei, ni gaoioiga e faateʻia ai. Aiseā ua faia ai e tagata mea leaga?

 Ua faamanino mai i le Tusi Paia lenei mataupu. Ua faailoa mai ai ma le saʻo māfuaaga autū ua faia ai e tagata mea ua latou iloa e leaga. Seʻi iloilo manatu o loo taʻua ai.

▪ “O sauāga e mafai ona amio ai e pei o se vale le tagata atamai.”—FAILAUGA 7:7.

Ua taʻua i le Tusi Paia, i nisi taimi e omia ai tagata ona o tulaga faigatā, ma faia ai mea e lē masani ona latou faia. Ua oo foʻi ina soli ai e nisi le tulafono ona o le taumafai e foʻia se mafatiaga po o se faiga lē tonu. Ua taʻua i le tusi Urban Terrorism e faatatau i faiga faatupu faalavelave, “I le tele o tulaga, o le uunaʻiga autū o se faiga faatupu faalavelave, e māfua ona ua lē fiafia tagata, talu ai e foliga mai ua lē mafai ona suia tulaga faigatā faapolotiki, le va fealoaʻi, ma faiga tau tamaoaiga.”

▪ “O le manaʻo tele i tupe o le pogai lea o mea leaga eseese uma.”—1 TIMOTEO 6:10.

Ua faapea mai nisi, e oo lava i tagata amiolelei e latou te solia tulafono o amioga tatau pe a telē se tupe e ofo atu i ai. O nisi e foliga mai e amiolelei ma alolofa pe a sologa lelei mea, ae a oo loa i tupe, ua sui o latou uiga ua lē lelei ma lē fiafia mai. Seʻi tagaʻi foʻi i le tele o solitulafono e māfua ona o le matapeʻapeʻa, e pei o le taufaamataʻu, ave faamalosi o tagata, ma le fasioti tagata.

▪ “Talu ai e lē vave ona faaoo le faasalaga i le galuega leaga, o le mea lea ua matuā maumauaʻi ai loto o le fanau a tagata e faia mea leaga.”—FAILAUGA 8:11.

Ua faailoa mai i lenā mau le manatu o tagata e faapea, e lē maua a latou solitulafono pe a lē faamalosia le tulafono. E faapena foʻi tagata e soona faasaoasaoa a latou taavale, kopi pe a fai suʻega a aʻoga, ʻai tupe a tagata, ma fai isi mea e sili ona leaga. Pe a lē faamalosia le tulafono, ma e lē fefefe tagata neʻi maua, ua uunaʻia ai i latou e masani ona usitaʻi i le tulafono e soli le tulafono. Ua taʻua i le mekasini o le Arguments and Facts, “Ona ua lē faasalaina tagata solitulafono, ua avea ma mea ua uunaʻia ai isi e faia solitulafono e sili ona leaga.”

▪ “Ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala.”—IAKOPO 1:14, 15.

E iai taimi e oo ai i tagata uma mafaufauga sesē. Ua lofitūina i tatou i aso uma i manatu ma faaosoosoga e faia mea sesē. Na taʻu atu i Kerisiano anamua: “O faaosoosoga e oo iā te outou, e oo foʻi i tagata uma.” (1 Korinito 10:13) Peitaʻi, o lona taunuuga, e faalagolago lea i le filifiliga a le tagata, pe vave faateʻa ese mafaufauga leaga, pe mafaufau pea i ai. Na faagaeeina Iakopo e lapataʻi mai, afai e “tō le tuʻinanau,” ona sosoo ai lea ma le faia o le mea leaga.

 ▪ “O lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.” —FAATAOTO 13:20.

O a tatou aumea e matuā aafia ai i tatou, a lē o le lelei, o le leaga. O le tele o taimi, ona o omiga mai uō ma aumea leaga, ua faia ai e tagata mea leaga e leʻi mananaʻo e fai. I le Tusi Paia, e lē o faasino le faaupuga “tagata vālea” i ē e leai se poto, a o ē e lē utagia fautuaga atamai a le Afioga a le Atua. Pe matua pe laʻitiiti, afai e tatou te lē filifili lelei uō ma aumea e ala i faatulagaga a le Tusi Paia, o le a tatou “leaga ai lava.”

Ua faamatala manino mai i nei mau ma le tele o isi mau o le Tusi Paia, le pogai ua faia ai e tagata e foliga mai e lē leaga, mea leaga e faateʻia ai. E lelei ona malamalama i uunaʻiga ua faia ai e tagata mea e sili ona leaga, ae faamata e mafai ona toe suia? Ioe, auā e lē gata ina faamatala mai i le Tusi Paia le pogai ua fai ai e tagata amioga leaga, a ua folafola mai ai foʻi e lē toe iai. O ā na folafolaga? Pe moni o le a faamutaina mea leaga uma i le lalolagi? E maua tali i le mataupu lea e sosoo mai.