Le Iʻuga o Mea Leaga!

UA TUUINA mai e le Atua lana Afioga faagaeeina iā i tatou, ma ua faamatala mai ai le pogai ua faia ai e tagata mea leaga. Ua ia tuuina mai foʻi iā i tatou le saʻolotoga e filifili ai, atoa ma le tomai e pulea ai e le tagata o ia lava, ma filifili ai e aua le faia mea leaga. (Teuteronome 30:15, 16, 19) O le mea lea ua tatou iloa ai faanaunauga leaga o iā i tatou, ma taumafai loa e faasaʻo. O lo tatou taumamao mai i le faia o mea leaga, e tatou te fiafia ai, ma e fiafia ai foʻi o tatou aiga ma uō.—Salamo 1:1.

E ui i lea, e tusa lava pe tatou te taumafai malosi e aua le faia mea leaga, ae o loo pagatia pea le lalolagi ona o mea leaga ua faia e isi. Ua lapataʻi mai le Tusi Paia: “Ia  iloa lenei mea, o aso e gata ai e oo mai ai aso e sili ona faigatā.” Ua taʻu mai ai le māfuaaga ua “faigatā“ ai aso: “E avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua, o ē e foliga mai e faamaoni i le Atua, ae e latou te lē o ola e tusa ai ma lea mana; ia ʻaloese mai iā i latou na.”—2 Timoteo 3:1-5.

Atonu o loo e mātauina le valoaga i le mau e uiga i “aso e gata ai.” O le ā le uiga o lenā faaupuga? E pei ona tatou iloa, o le faaupuga “o aso e gata ai,” e taʻu mai ai e iai se mea o le a gata. O le ā lenā mea? Mātau le mea ua folafola mai i le Afioga a le Atua.

O le a aveesea ē amioleaga.

“Ua toeitiiti lava ona lē toe iai lea o le tagata amioleaga; e te mafaufau foʻi i le mea sa iai o ia, a ua leai lava. A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—SALAMO 37:10, 11.

“E leoleoina e Ieova i latou uma o ē e alolofa iā te ia, ae e na te faaumatia i latou uma o ē e amioleaga.”—SALAMO 145:20.

E lē toe iai se pule sauā.

“E laveaʻi e ia le tagata mativa o loo tagi mai mo se fesoasoani, atoa foʻi ma lē ua mafatia ma lē ua leai sona fesoasoani. E laveaʻiina e ia i latou mai i le pule sauā ma faiga sauā.”—SALAMO 72:12, 14.

“Ia saʻoloto ai le foafoaga mai i le faapologaina i mea leaga, ma maua ai le saʻolotoga mamalu o le fanau a le Atua.”—ROMA 8:21.

E faamalieina manaʻoga faaletino o tagata.

“E taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”—MIKA 4:4.

“O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi. Auā e pei o le umi o aso o le laau o aso o loʻu nuu; ma o le a matuā fiafia uma oʻu tagata ua filifilia i galuega a o latou lima.” —ISAIA 65:21, 22.

O le a iai le faamasinogatonu.

“O le mea moni, pe e lē faia ea e le Atua le faamasinogatonu mo ē ua ia filifilia, o loo alalaga atu iā te ia i le ao ma le pō . . . ? Ou te fai atu iā te outou, e vave ona ia faia le faamasinogatonu mo i latou.”—LUKA 18:7, 8.

“E fiafia Ieova i le faamasinogatonu, e na te lē tuua foʻi o ē e faamaoni iā te ia. E leoleoina i latou i aso uma lava.”—SALAMO 37:28.

E suia le manatu faapito i le amiotonu.

“O le a aʻoaʻoina le amiotonu e ē o loo nonofo i le laueleele ua fua mai.”—ISAIA 26:9.

“E tatou te faatalitali i le lagi fou ma le lalolagi fou, e tusa ma lana folafolaga, e mau ai le amiotonu.”—2 PETERU 3:13.

 Ua Suia Tagata —E Oo Foʻi i le Taimi Nei

E mautinoa lava lo tatou fiafia uma i na folafolaga. Ae e faapefea ona tatou mautinoa o le a taunuu? O le mea moni, o lea ua iā i tatou faamaoniga, e taunuu folafolaga a le Atua. O ā faamaoniga? E faitau miliona tagata i le lalolagi aoao i aso nei ua mafai ona latou tuu ese uiga manatu faapito, amioga lē mamā ma le sauā, ae ua aʻoaʻoina le faamaoni, filemu, ma le agalelei. I aso nei, ua sili atu ma le fitu miliona Molimau a Ieova i le lalolagi aoao ua faatoʻilaloina feeseeseaʻiga e māfua ona o ituaiga, lanu, nuu, polotiki, ma le tamaoaiga, ua tupu ai le feitagaʻi, sauā, ma le toto masaa i le faagasologa o tausaga. * O nei suiga ua avea ma faavae mautū e talitonu ai, o le a faataunuuina folafolaga a le Atua i se tulaga e matuā sili atu.

Ua mafai faapefea ona faia nei suiga? E maua le tali i se isi folafolaga mai i le Tusi Paia na taʻu mai e le perofeta o Isaia. Na tusi o ia:

“O le a mālōlō faatasi le luko ma le tamaʻi mamoe poʻa, o le a taooto faatasi le tamaʻi ʻoti ma le nameri, e faatasi foʻi le tamaʻi povi ma le leona taanoa ma le manu peti; ma o le a taʻitaʻiina i latou e le tamaitiiti. . . . E ʻai foʻi e le leona vao mamago e pei o le povi poʻa. O le a taalo foʻi le tama e leʻi teʻa ma le susu i le lua o le asipi; e tuu atu e le tama ua teʻa ma le susu lona lima i le lua o le gata uogo. E latou te lē faia se mea e lamatia ai pe faaleagaina se mea i loʻu mauga paia uma; auā o le a tumu le lalolagi i le poto e uiga iā Ieova e pei ona ufitia o le ilititai i le suāsami.”—Isaia 11:6-9.

 Pe e na o le taimi e filemu ai manu ma tagata e faatatau i ai lenei valoaga? E leai, e iai se isi mea e sili atu. Mātau, o loo taʻua i le vaega mulimuli o le mau le māfuaaga o nei suiga mataʻina: “O le a tumu le lalolagi i le poto e uiga iā Ieova.” Pe e mafai e le poto i le Atua ona suia uiga o manu? E leai. Ae e mafai ona suia ai uiga o tagata! Ua valoia e lenei valoaga, o ē sa uiga faamanu, o le a latou atiaʻe uiga faa-Kerisiano, i le iloa lea ma faatatauina mea ua aʻoaʻoina i le Tusi Paia.

O se faaaʻoaʻoga o Pedro. * Ina ua auai i se faalapotopotoga o tagata faatupu faalavelave, sa talitonu o ia o le auala lea e maua ai le faamasinogatonu. Ina ua uma ona toleniga, na faatonuina o ia e pomu le fale o leoleo. A o faia ana sauniuniga, na puʻeina o ia ma loka. E 18 masina na faafalepuipui ai Pedro, ma sa faaauau ai i inā ana faiga fouvale. O le taimi lea na amata ai ona suʻesuʻe lona toʻalua ma Molimau a Ieova i le Tusi Paia. Ina ua magalo mai Pedro, na auai foʻi i le suʻesuʻega, ma o mea na ia aʻoaʻoina e uiga iā Ieova le Atua na uunaʻia ai o ia e sui ona uiga ma lana vaaiga i le olaga. Ua fai mai o ia: “Ou te faafetai iā Ieova ona ou te leʻi fasiotia se isi i na tausaga na ou faatupu faalavelave ai. O lea ua ou faaaogāina nei le Tusi Paia, le pelu a le agaga, e  avatu ai i tagata le feʻau o le filemu ma le faamasinogatonu, o le tala lelei lea o le Malo o le Atua.” Na asiasi atu foʻi Pedro i le fale o leoleo lea na tuu e na te pomuina, e faailoa atu i ai le feʻau o le filemu, ma e lē toe iai ni faiga sauā i le lalolagi.

Ua suia tagata ona o le mana o le Afioga a le Atua, ma ua atili ai ona tatou talitonu i le folafolaga a le Atua, o le a faaiʻuina mea leaga uma. Ioe, e lē toe faia e tagata ni mea leaga e oo i le faavavau, ae o le a avea ma tagata lelei. Ua toeitiiti ona aveesea lea e Ieova o Satani le Tiapolo, le pogai o mea leaga uma i le lalolagi. Ua faapea mai le Tusi Paia: “O le lalolagi atoa o loo nofo toʻilalo i le pule a lē o loo leaga.” (1 Ioane 5:19) Ae ua toeitiiti ona lē toe iai lea o ia. O le a aveesea foʻi i latou e faauamaaa ma mumusu e tuu o latou ala leaga. Maʻeu le manaia o le ola ai i se lalolagi faapena!

O le ā e tatau ona faia e se tasi ina ia maua ai lea lumanaʻi? Ia manatua foʻi, o le “poto e uiga iā Ieova” ua mafai ai ona sui tagata i aso nei, ma o le a suia ai le lalolagi i le lumanaʻi. E ala i le maua o le poto saʻo o le Tusi Paia ma faatatauina e pei ona faia e Pedro, e mafai foʻi ona e aloalo atu e ola i se lalolagi “e mau ai le amiotonu.” (2 Peteru 3:13) O lea, e matou te faalaeiau ai oe e puʻepuʻe maua le avanoa e ave ai i fale le poto i le Atua ma Iesu Keriso, auā o lou ola lea e faavavau.—Ioane 17:3.

[Faaopoopoga i lalo]

[Faamatalaga faaopoopo i le itulau 9]

E mafai foʻi ona e aloalo atu e ola i se lalolagi “e mau ai le amiotonu.”—2 PETERU 3:13