Ua Fesili Mai le ʻAufaitau . . .

O Fea na Maua Mai ai le Avā a Kaino?

▪ “Pe afai e toʻalua le fanau tama a Atamu ma Eva, o Kaino ma Apelu, o fea la na maua mai ai le avā a Kaino?” E ui lava e masani ona fesiligia e le ʻaufaitio o le Tusi Paia lenei fesili tofotofo, ae ua lava faamatalaga o loo i le Tusi Paia e maua ai se tali e faamalieina ai.

O faamatalaga nei o loo taʻua i le Kenese mataupu e 3 ma le 4: (1) O Eva o le “tinā o tagata ola uma.” (2) E tele tausaga na va ai le fanau mai o Kaino, ma le taimi na ofo atu ai lana taulaga lea na lē talia e le Atua. (3) Ina ua tuliesea o ia e avea “ma sē e maumausolo ma fesolasolataʻi,” na popole Kaino ina neʻi fasiotia o ia e ‘⁠so o se tasi e na te mauaina o ia.’ (4) Na faia e le Atua se faailoga e puipuia ai Kaino, e faaalia ai e ono taumafai nisi o lona aiga po o ni tauaiga e fasiotia o ia. (5) “Mulimuli ane,” na feusuaʻi Kaino ma lana avā i “le laueleele o Nota.”—Kenese 3:20; 4:3, 12, 14-17.

Pe a fua i nei faamatalaga, e tatou te iloa ai o le avā a Kaino o sē na tupuga mai iā Eva, ae e lē o iloa le aso na fanau ai. Ua taʻua i le Kenese 5:4 a o faagasolo tausaga e 930 o Atamu, na “fanaua . . . e ia o atalii ma afafine.” E moni e lē o taʻua patino mai i le Tusi Paia o le avā a Kaino o se tama teine a Eva. Ae ona na faatoʻā taʻua le avā a Kaino ina ua uma ona tuliesea Kaino, atonu la o lana avā o se tasi o tama teine a le fanau a Atamu ma Eva, auā na telē lea taimi e maua ai ni a latou fanau. O lea, ua faamatalaina le avā a Kaino i le tusi The Amplified Old Testament, “o se tasi o le fanau a Atamu.”

Na manatu le faitofā o le Tusi Paia i le senituri lona 19, o Adam Clarke, na faia e le Atua se faailoga ona o le fefe o Kaino, talu ai ua iai nisi o tupulaga ua tupuga mai iā Atamu, ma ua lava ma totoe “e faia aʻe ai ni nuu.”

Ua manatu le toʻatele o tagata e lē talafeagai le faaipoipo o Kaino i lona tuafafine, po o se teine na mulimuli ane tupuga mai iā Atamu e ala i le faaipoipoga a sona atalii po o sona afafine. E masani ona māfua lenei manatu ona o tapu faaleaganuu, po o le popole ina neʻi faalētonu ni fanau e fananau mai. Ae ua faapea mai F. LaGard Smith i le tusi The Narrated Bible in Chronological Order: “E foliga mai na toe fefaaipoipoaʻi nei uluaʻi tuagane ma tuafāfine, e ui na manatu tupulaga mulimuli ane e lē o se mea e talafeagai.” E lē gata i lea, na faatoʻā aloaʻia ona faasā le feusuaʻi o ni tagata vavalalata o le aiga, ina ua maua e Mose tulafono a le Atua mo Isaraelu i le 1513 T.L.M.—Levitiko 18:9, 17, 24.

I aso nei, ua faitau afe tausaga talu mai le taimi na lelei atoatoa ai o tatou uluaʻi mātua. Atonu e leʻi aafia i laʻua i āuga o sela faafanautama ma le tino augavale ua tuufaasolo mai iā i tatou. E lē gata i lea, o suʻesuʻega talu ai nei e pei o lea na lomia i le Journal of Genetic Counseling, ua faaalia ai e itiiti ni faalētonu o fanau a ni tausoga muamua e faaipoipo, i lo o le mea ua manatu i ai le toʻatele. O lona uiga la, e leʻi popole tagata i nei mataupu i taimi a o ola Atamu pe i tua mai foʻi a o leʻi oo i aso o Noa. O lea la, e mafai ona tatou faapea atu o le avā a Kaino, o se tamaʻitaʻi o lona aiga.