O se Tusi Mai Grenada

O se Aso i le Matafaga

E TE lagona le fiafia tele pe a e mauaina se tofiga e auauna ai o se misionare i se atunuu mamao. O le a pei oe o se tamaitiiti e fia iloa le tele o mea, e te tomānatu pe e faapeʻī tagata o lenā atunuu, o le siʻosiʻomaga, ma mea o le a tutupu ai i le talaʻiga.

Ina ua tofia i maʻua ma laʻu avā i Grenada, lea e iai matafaga pe tusa ma le 45 i lona talafatai matagofie, na ma tomānatu pe e faapeʻī na matafaga. Ua toe o se aga ona ma olioli lea i se mea o le a tupu i se matafaga, e lē ona o se tafaoga ae ona o tagata.

E lē mamao lo ma fale i Grenada mai i le matafaga o le Grand Anse, ma o se vaaiga mataʻina le malaga i lea auala! O se auala e fepiʻopiʻoaʻi, e iloa atu ai ni vaaiga e sili ona matagofie. E lanu lauʻava ona atumauga. O so o se itu e tilotilo i ai, e ma te iloa atu mauga, o vaomatua, o afu, ma vaaiga matagofie o le sami. E lētioa a gasolo i ai turisi mai le lalolagi aoao! Ona o le matagofie o lenei atunuu, e tatau ai ona faaeteete le avetaavale neʻi meanē sioa i na vaaiga matagofie, ae lē tilotilo ai i le auala. O nisi taimi e te taumānatu ai pe e fetoʻai taavale o loo fepasiaʻi, ona o le vaiti ma le fepiʻopiʻoaʻi o auala.

Na ma taunuu i le maota e fai ai le tauaofiaga, lea o loo tū i le auala i tafatafa o le matafaga o le Grand Anse. E leʻi umi ae faapotopoto ai Molimau a Ieova e tusa ma le toʻa 600, ina ia faatasitasi ma le fiafia ma faalogologo i lauga faale-Tusi Paia. Ae o se aso faapitoa mo Lesley ma Daphne, o se ulugalii faaipoipo ua silia i le taʻi 70 o la tausaga, auā o le a papatiso ai Lesley. Ua leva ona naunau fiafia Daphne ina ia aulia lenei aso, auā na papatiso o ia o se Molimau a Ieova i le 1958.

E tāua tele i Molimau a Ieova le papatisoga, lea e faatofu atoa ai i lalo le tino o se tasi i le vai. O le gaoioiga lenā e faia e se tasi, pe a uma ona ia aʻoaʻoina upu moni o le Tusi Paia ma faatatau i lona olaga. O se sauniga e faia i luma o le lautele, lea e faaalia ai e le tagata, ua uma ona tuuina atu lona ola iā Ieova le Atua.

Na tofia aʻu e lauga atu i le aofia e faatatau i le aʻoaʻoga a le Tusi Paia i le papatisoga. Ina ua māeʻa le lauga, na tutulaʻi ai Lesley ma isi sui papatiso e toʻalua. O le ofutino paʻepaʻe o Lesley na fai ma lona fusiua, ma na vaaia foʻi ona laufofoga fiafia. Na ou  fesili atu: “Po ua e salamō mai i au agasala ma tuuina atu oe iā Ieova e faia lona finagalo?” E te iloa lava lo latou faamaoni, a o latou tali mai ma le lotoatoa, “Ioe!”

Na faagaeetia aʻu ona na ou malamalama i le tulaga o Lesley. O le tele o tausaga e leʻi manaʻo o ia e suʻesuʻeina le Tusi Paia. Ona la asiasi atu lea ma lana avā i se isi motu. Na fai la laʻua tonu ma lana avā, e alu le tagata i lana lava lotu a o iai i le motu. Na fai atu Lesley iā Daphne: “Alu oe i lau lotu, ae ou alu i laʻu lotu.”

Na momoli e Lesley Daphne i le Maota mo Sauniga, ona alu lea i le lotu Egelani i lea lava vaipanoa. Na toe foʻi ane Lesley i le Maota mo Sauniga e piki lana avā ina ua tuua lana lotu. Ina ua taunuu i le maota, na faafeiloaʻi ma le fiafia o ia e ni tagata mata ʻataʻata ma le agalelei, e ui lava e leʻi feiloaʻi muamua i ai. Na faagaeetia o ia, auā e leai se tasi o lana lotu na faamālō ane iā te ia. Na faapea atu Lesley iā Daphne: “Ou te lē toe foʻi i le lā lotu. E leai se tasi na faamālō mai iā te aʻu, e oo lava i le faifeʻau. E leʻi talanoa mai foʻi se tasi iā te aʻu.” Na amata mai i lenā taimi, e leʻi toe alu lava Lesley i lana lotu.

Na amata ai loa ona faia ni lesona faale-Tusi Paia a Lesley. A o lenei ua sauni o ia e papatiso. Na savavali atu sui papatiso i le matafaga, ae matou mulimuli atu i tua. Talu ai na latalata ane le sami, e matou te leʻi faia ai se tapu taʻele mo le papatisoga, e pei ona faia i le tele o tauaofiaga a Molimau a Ieova. Ae na matou savavali atu i le isi itu o le auala.

E lua maila le umī o le matafaga o le Grand Anse, o se matafaga e paʻepaʻemā, e māfanafana le sami i le tausaga atoa. Na faateʻia turisi ina ua vaavaai mai iā i matou i le matafaga, o loo laʻei lelei tane ma fafine. Na fai le mitiafu ma le ofuvae pupuu o Lesley. Seʻi manatu i le fiafia o Daphne e vaavaai atu i si ana tane o loo papatiso, ae ua silia ma le 50 tausaga talu ona papatiso o ia! O se aso lagi lelei, ma ua sagisagi fiafia Daphne. Na fiafia foʻi turisi e matamata mai i le papatisoga. Na latou patipati faatasi ma i matou ina ua papatiso tagata taʻitoʻatasi.

O lenei matafaga paʻepaʻemā, o le lagi lanu moana, ma le fafati mālie mai o galu, ua viia ai Lē na Faia mea uma lava. Peitaʻi, na matuā viia o Ia ina ua ō aʻe mai i le vai tagata e toʻatolu o ē na papatiso. Na sili atu ona māfanafana o matou loto i le vaavaai atu iā i latou, nai lo o le māfanafana o le susulu mai o le lā. Ioe, o se aso faapitoa! O se aso e sili ona fiafia i le matafaga mo Lesley ma Daphne.