1 Aiseā e Tatalo Ai?

TATALO. O le toʻatele o tagata e fiafia i lenei mataupu faale-Tusi Paia, ma fia malamalama i ai. Seʻi o tatou talanoaina fesili e fitu e masani ona fesiligia e uiga i le tatalo; ona tatou iloiloina lea o tali mai i le Tusi Paia. Ua saunia nei mataupu ina ia fesoasoani iā te oe e tatalo, amata ona tatalo, pe ia faaleleia foʻi au tatalo.

O LOO tatalo tagata i so o se vaega o le lalolagi, e tusa po o le ā le aganuu ma le lotu. E tatalo pe a na o i latou, pe a o faatasi foʻi ma nisi tagata. E latou te tatalo i falesā, malumalu, sunako, po o falelotu o Musalimi. E latou te faaaogā fala ua tusia ai tatalo, rosalio, uili ua iai tatalo, tupua, tusi tatalo, po o tatalo ua tusia i ni tamaʻi laupapa ae faatautau i luga.

O le tatalo o se tasi lea o mea ua ese ai tagata mai i isi foafoaga ola uma i le lalolagi. E moni e iai mea e tutusa ai i tatou ma meaola. E pei o meaola, e tatou te manaʻomia meaʻai, le ʻea ma le vai. E tatou te fananau foʻi, feola ma feoti. (Failauga 3:19) Peitaʻi e na o tagata e tatalo. Aiseā?

Atonu o le tali faigofie, ona e tatou te mananaʻo e tatalo. Auā e masani ona vaai i le tatalo o se auala lea e fesootaʻi atu ai tagata i se mea e manatu i ai e paia, mamalu ma faavavau. Ua faaalia i le Tusi Paia na faia i tatou ma lenā faanaunauga. (Failauga 3:11) Na fetalai Iesu Keriso: “E fiafia o ē e naunau i mea faaleagaga.”—Mataio 5:3.

Ona o le “naunau i mea faaleagaga,” o lea ua anoanoaʻi ai fale tetele o lotu, mea eseese e faaaogā i tapuaʻiga, ma tele itula e tatalo ai. E moni o nisi tagata ua faalagolago iā i latou lava po o isi, ina ia faamalieina o latou faanaunauga faaleagaga. Ae pe e te lagona e gata mai le mea e mafai e tagata ina ia fesoasoani atu ai? E tatou te vaivai, puupuu o tatou olaga ma papaʻu lo tatou tofā. E na o sē e sili atu ona atamai, malosi ma tumau i lo o i tatou, e mafai ona saunia mea o loo tatou manaʻomia. O ā la nisi o nei faanaunauga faaleagaga ua uunaʻia ai i tatou e tatalo?

Seʻi manatu foʻi: Pe na iai se taimi na e fia maua ai se taʻitaʻiga, le atamai, po o ni tali i fesili e foliga mai e lē iloa e tagata tali? Pe na e manaʻomia se faamāfanafanaga ina ua mafatia i le maliu o se tasi, se taʻitaʻiga ina ua feagai ma se filifiliga faigatā, po o se faamagaloga ina ua nutimomoia i le lagona nofosala?

E tusa ai ma le Tusi Paia, o māfuaaga tāua uma na e tatalo ai. O le Tusi Paia o le tusi lea e sili ona aogā i lenei mataupu, ma o loo tusia ai tatalo a le toʻatele o tane ma fafine faamaoni. Na latou tatalo mo se faamāfanafanaga, taʻitaʻiga, faamagaloga, ma tali i fesili e sili ona faigatā.—Salamo 23:3; 71:21; Tanielu 9:4, 5, 19; Sapakuka 1:3.

E ui e eseese nei tatalo, ae e iai se mea e tutusa uma ai. Sa iā i latou se mea e tāua ina ia taulau manuia ai tatalo, lea e lē o iloa pe lē amanaʻia e tagata o lenei lalolagi. Na latou iloa lē e tatau ona tatalo atu i ai.