5 Pe e Tāua le Nofoaga ma le Taimi e Tatalo Ai?

E LĒ taumatea ua e iloa o le tele o lotu autū, e tāua iā i latou le iai o ni fale matagofie ma faatulaga ni taimi maʻoti e fai ai tatalo. Po o faatulaga mai i le Tusi Paia ni nofoaga ma taimi patino e tatalo ai?

Ua faaalia i le Tusi Paia e iai taimi talafeagai e tatalo ai. O se faataʻitaʻiga, a o leʻi taumamafa Iesu ma ona soo, na tatalo Iesu e faafetai i le Atua. (Luka 22:17) Ina ua faapotopoto ona soo mo le tapuaʻiga, sa latou tatalo faatasi. Sa latou mulimuli i se faiga ua leva ona faia i sunako o tagata Iutaia ma le malumalu i Ierusalema. Sa finagalo le Atua ia avea le malumalu ma “fale tatalo mo nuu uma.”—Mareko 11:17.

Pe a potopoto ma tatalo faatasi auauna a le Atua, e mafai ona taulau manuia a latou talosaga. Pe afai e autasi manatu o ē o loo faapotopoto ma ōgatusa la latou tatalo ma taʻiala a le Tusi Paia, o le a fiafia le finagalo o le Atua. Atonu e uunaʻia ai o ia e faataunuu mea na semanū e na te lē faia. (Eperu 13:18, 19) E tatalo e lē aunoa Molimau a Ieova i a latou sauniga. E valaaulia ma le māfana oe e talaaao mai i se Maota mo Sauniga e latalata atu i lou vaipanoa, ma faafofoga i na tatalo.

Peitaʻi, e lē o faatulaga mai i le Tusi Paia se taimi po o le nofoaga patino e tatalo ai. Ua taʻua i le Tusi Paia ni tala e uiga i auauna a le Atua, na tatalo i so o se taimi ma so o se nofoaga. Na fetalai Iesu: “Pe a e tatalo, ia ulu atu i lou potu, ma tapuni le faitotoʻa, ma tatalo atu i lou Tamā o loo i le mea lilo. Ona tauia ai lea o oe e lou Tamā, o lē o loo silasila mai iā te oe mai le mea lilo.”—Mataio 6:6.

Pe e lē o se valaaulia matagofie ea lenā? E mafai moni lava ona e talanoa atu i le Pule Silisili Ese o le aoao o mea, i so o se taimi i se mea tau lava na o oe, ma o le a faafofoga mai o ia. E lētioa ona saʻili soo e Iesu se nofoaga e iai na o ia ina ia tatalo ai! Na tatalo atu foʻi o ia i se pō atoa i le Atua, ina ia saʻilia lana taʻitaʻiga i se filifiliga e sili ona tāua.—Luka 6:12, 13.

Ua tusia foʻi i le Tusi Paia isi tane ma fafine na tatalo ina ua feagai ma ni filifiliga tāua po o ni luʻi faigatā. O nisi taimi na latou tatalo leotetele ma o nisi taimi e lē leoa; na tatalo a o faatasi ma nisi pe a o na o i latou. O le mea tāua sa latou tatalo. Ua valaaulia e le Atua ana auauna: “Ia tatalo e lē aunoa.” (1 Tesalonia 5:17) E lotomalie o ia e faafofoga mai pea lava pea i ē e faia lona finagalo. Pe e lē o se valaaulia māfana ea lenā?

Ae i lenei lalolagi masalosalovale, ua taumānatu le toʻatele o tagata i le aogā o le tatalo. Atonu e te ono fesili, ‘Pe e aogā moni iā te aʻu le tatalo?’

[Faamatalaga faaopoopo i le itulau 9]

Tatou te ono tatalo i so o se taimi ma so o se nofoaga